جۇرت دارىحاناعا كوبىنە مال قۇلاعىنداعى قۇرتتى تۇسىرەتىن ءدارى, قوتىرعا قارسى جاعاتىن جاقپا مايلار جانە كوتەرەم مالدى وڭالتاتىن دارۋمەندەر سۇراپ كەلەدى ەكەن. ايشولپان كەلۋشىلەرگە كوپ تارالعان مال اۋرۋلارىنىڭ الدىن الۋ جولدارىن ءتۇسىندىرىپ, تەگىن كەڭەس بەرەدى. ويتكەنى جاس كاسىپكەردىڭ نەگىزگى ماماندىعى – مال دارىگەرى. تىنىمسىز ەڭبەگىنىڭ ارقاسىندا وتكەن جىلى ايشولپان باۋبەكقىزى ويىل اۋدانىنىڭ «ۇزدىك جاس كاسىپكەرى» اتاعىنا يە بولدى.
ون بەس مىڭنان استام تۇرعىنى بار, وبلىس ورتالىعىنان 350 شاقىرىم قاشىقتا ورنالاسقان ويىل اۋدانىندا وسى كەزگە دەيىن ۆەتەرينارلىق ءدارىحانا بولماعان. اۋدان تۇرعىندارى ءتورت ت ۇلىكتىڭ ءدارىسىن قالادان ساتىپ اكەلەتىن.
ايشولپان ەكى جىل بۇرىن جوعارى وقۋ ورنىن ۆەتەرينار ماماندىعى بويىنشا بىتىرگەن. جانۋارلارعا ارنالعان ءدارىحانا اشۋ تۋرالى وي 4-كۋرستا كاسىپكەرلىك نەگىزدەرى ساباعىندا شارۋاشىلىق جۇرگىزۋ جوسپارىن جاساپ وتىرعاندا كەلگەن. «پاندەميا كەزىندە ەلىمىزدە ونلاين ساۋدا, جەتكىزۋ قىزمەتى ەرەكشە قارقىن الدى. جۇرت ۇيدەگى يت-قۇسىنا, قوراداعى مالىنا قاجەتتى ءدارى ىزدەپ كەتكەندە, نەگە ونلاين ءدارىحانا اشپاسقا دەگەن وي كەلدى. ءبىزدىڭ تۇسىنىگىمىزدە, ءدارىحانا بۇل جۇرت ءوز اياعىمەن بارىپ, ساۋدا جاسايتىن مەديتسينالىق مەكەمە. نەگە ەكەنى بەلگىسىز, ءدارىحانا جەلىسىندە ونلاين ساۋدا, ونلاين كەڭەس بەرۋ قىزمەتى ونشا دامىماعان. وسىدان ءۇش جىل بۇرىن ويىل اۋدانىنىڭ جىگىتىنە تۇرمىسقا شىعىپ, اتا-ەنەمىزبەن بىرگە تۇراتىن بولىپ شەشتىك. بالامەن ۇيدە وتىرعاندا, نەگىزىنەن مال شارۋاشىلىعىمەن اينالىساتىن اۋداندا بىردە-ءبىر ۆەتەرينارلىق ءدارىحانا جوقتىعىن, الىستاعى شارۋا قوجالىعىندا جۇمىس ىستەيتىندەردىڭ مال دارىگەرى جازىپ بەرگەن قاراپايىم دارىلەردى تاپپاي ساندالىپ جۇرگەنىن كوردىم. ءدارىحانا اشۋ جوسپارىمدى جولداسىما ايتىپ, اتا-ەنەممەن اقىلداسقاندا ولار مەنى بىردەن قولدادى. ءۇيدىڭ شارۋاسىنا, بالاعا الاڭداماي شارۋاڭدى جاساي بەر دەگەن سوڭ جەكە كاسىپكەر رەتىندە تىركەلۋگە قۇجات دايىندادىم. سودان اۋداندىق كاسىپكەرلىك بولىمىنەن كەڭەس الىپ, «اتامەكەن» ۇكپ وڭىرلىك فيليالىنان ارنايى كۋرس وقىپ, بيزنەس-جوبامدى ازىرلەپ جۇرگەندە, اۋدان اكىمشىلىگى قىزمەتكەرلەرى «اۋىل اماناتى» جوباسىنا قاتىسۋعا كەڭەس بەردى. بۇل جوباعا قۇجات دايىنداۋ قيىن بولعان جوق. كاسىپ باستاعىسى كەلگەن ادام الدىنا ناقتى جوسپار قۇرىپ, بيزنەس-جوباسىندا ءبارىن ويلاستىرا بىلسە, ەشقانداي كەدەرگى كەزدەسپەيدى. كوپ كەشىكپەي ەسەپشوتىما بەس جىل وتەۋ مەرزىمىمەن 3 ميلليون 500 مىڭ تەڭگە ءتۇستى. مەن ءدارى ساقتاۋعا ارنالعان ارنايى توڭازىتقىش, قاجەتتى شكافتار مەن سورەلەر, باسقا دا ۆەتەرينارلىق قۇرال-جابدىقتار ساتىپ الىپ, قاجەتتى ءدارى-دارمەك تۇرلەرىنە ونلاين تاپسىرىس بەردىم. اۋدان ورتالىعىنداعى ءبىر قاباتتى عيماراتتان جەلدەتكىشى بار شاعىن بولمەنى جالعا الدىم. «اۋىل اماناتى» جوباسى ارقىلى الىنعان جەڭىلدەتىلگەن نەسيەنىڭ ەكى ارتىقشىلىعى بار: بىرىنشىدەن, كاسىپكەر العاشقى جىلى نەسيە تولەۋدەن بوساتىلادى. ءبىر جىل بويى ەشكىم مەنى مازالاعان جوق. بيىل جازدان باستاپ اي سايىن نەسيە تولەۋگە كىرىسەمىن. ەكىنشى ارتىقشىلىعى, نەسيە تولەۋ مەرزىمىن ىڭعايلى ەتىپ بەكىتۋگە بولادى. ماسەلەن, نەسيەنى اي سايىن ەمەس, بىردەن جارتى جىلعا تولەپ تاستاۋعا بولادى», دەيدى جاس كاسىپكەر.
ول قاجەتتى ءدارى-دارمەكتەردى نەگىزىنەن رەسەيدەن الدىرتادى. مۇندا ءتورت تۇلىكتىڭ دارىسىنەن وزگە, تورداعى توتىقۇس, اكۆاريۋم بالىقتارى مەن يت-قۇسقا ارنالعان ءتۇرلى دارۋمەندەر مەن جاقپا مايلار تولىپ تۇر. بۇل جەردە بايگە اتىنىڭ كۇتىمىنە ارنالعان قورەكتىك دارۋمەندەر, جاقپا مايلار, تاعالار, ساپالى ات ابزەلدەرى بار. ويتكەنى ويىل اۋدانىندا دا جەر-جەردەگىدەي جۇيرىك باپتايتىن اتبەگىلەر كوبەيىپ, ولار بايگە اتىنا قاجەتتى مينەرالدى قوسپالار مەن دارۋمەندەردى وسى جەرگە سۇراپ كەلە بەرگەن سوڭ تاپسىرىسپەن جەتكىزىپ بەرۋدى باستاپتى.
«ويىلدا ءونىم وندىرەتىن ۇلكەن كاسىپورىن جوق. تۇرعىندارى بىرىڭعاي مال شارۋاشىلىعىمەن اينالىساتىن اۋدانىمىزدا ءتورت تۇلىكتىڭ سانى ءوسىپ, ات بايگەسى, كوكپار ويىنى دامىپ كەلەدى. بايگەگە قوساتىن تۇلپاردى باپتاۋعا دا كوپ نارسە قاجەت. ەڭ باستىسى ەتىن جەپ, ءسۇتىن ءىشىپ وتىرعان ءار ءۇيدىڭ قوي-ەشكىسى مەن سيىرىنىڭ ىندەتتەن امان بولۋى ءۇشىن ۆەتەرينارلىق ءدارىحانا كەرەك. مەن كەلۋشىلەرگە مال اۋرۋىن ەمدەۋگە ارنالعان دارىلەردى قالاي پايدالانۋ جونىندە تەگىن كەڭەس بەرەمىن. مال دارىگەرى, ۆەتتەحنيك جازىپ بەرگەن ءمازىردى الىپ, قالادان دايىنداپ اكەلىپ بەرەمىن. قازىر كورشى اۋدانداردان, اتىراۋ وبلىسىنىڭ قىزىلقوعا اۋدانى تۇرعىندارىنان تاپسىرىس ءجيى تۇسەتىن بولدى. وعان قوسا الەۋمەتتىك جەلىلەردە پاراقشا اشتىق. TikTok, Instagram-داعى پاراقشامىزعا ءار وڭىردەن تاپسىرىستار تۇسەدى. اۋدان اكىمدەرى ۆەتەرينارلىق بەكەتتەر مەن لابوراتوريا, گيستولوگيالىق ورتالىقتارمەن بىرلەسە جۇمىس ىستەۋىنىڭ ارقاسىندا ەل ىشىندە مال ىندەتىنىڭ ءتۇرى ازايدى», دەيدى ءدارىحانا يەسى.
ايشولپاننىڭ جولداسى توتەنشە جاعدايلار قىزمەتىندە ءورت ءسوندىرۋشى بولىپ جۇمىس ىستەيدى. جاس وتباسىنىڭ ەكى كىشكەنتاي قىزى ءوسىپ كەلەدى. جۇمىسپەن جول ءجۇرىپ كەتكەندە, بالالارعا اتا-اجەسى باس-كوز بولادى ەكەن. جۇمىسىنا تىندىرىمدى جان كورشىلەس اۋدانداردا ءدارىحانا بولىمشەلەرىن اشقىسى كەلەدى. بۇل – بولاشاقتاعى جوسپارى. بۇگىنگى ارمانى – جەكە عيماراتقا قول جەتكىزۋ. سۇيىكتى ماماندىعىن كاسىپ كوزىنە اينالدىرعان جاس انا اۋىل جاستارىن بەلسەندىرەك بولۋعا, تابىس تابۋعا قۇلشىنىسپەن كىرىسۋگە شاقىرادى.
اقتوبە وبلىسى,
ويىل اۋدانى
