سۋرەتتى تۇسىرگەن – پاۆەل ميحەەۆ
جۋرناليست شاڭعىشىلاردىڭ حالىقارالىق كلۋبى بار, بۇل SCIJ (The Ski Club of International Journalists) دەپ اتالادى. جىل سايىن ءار ەلدە وتىرىسى وتەدى. بيىلعى 69-وتىرىستى وتكىزۋ مارتەبەسى قازاقستانعا بۇيىردى. الەمنىڭ ءار قيىرىنداعى 30-عا تارتا ەلدەن كەلگەن 150-گە جۋىق جۋرناليست اپتا بويى الاتاۋ بوكتەرىندە ايالدادى. جالپى, جۋرناليست شاڭعىشىلاردىڭ حالىقارالىق كلۋبىنىڭ وتىرىسىن وتكىزۋ تەك جارىس ۇيىمداستىرىپ, شۇلەن تاراتقانداي مويىندارىنا مەدال ءىلىپ قويا بەرۋ ەمەس. باستى ماقسات – ءتۋريزمدى دارىپتەۋ. الماتىعا ات بايلاعان جۋرناليستەر اپتا ىشىندە شىمبۇلاقتىڭ بوكتەرىندە سىرعاناپ قانا قويعان جوق, الدى تۇركىستانعا دەيىن قىدىرىپ بارىپ ەلىمىزدىڭ كورىكتى جەرلەرىن تاماشالاپ, ءتاۋ ەتىپ قايتتى. قازاقتىڭ سالت-ءداستۇرى مەن ادەت-عۇرپىنا قانىقتى, مادەنيەتى مەن رۋحانياتىن كوردى.
حالىقارالىق كلۋب وتىرىسىنىڭ سالتاناتتى اشىلۋ راسىمىندە ءسوز العان تۋريزم جانە سپورت ۆيتسە-ءمينيسترى سەرىك جاراسپاەۆ بۇل ءىس-شارا شەتەلدەن كەلگەن مەيماندارعا ەلىمىزدىڭ تۋريستىك ورىندارىن ارالاتىپ تانىستىرۋعا تاماشا وراي ەكەنىن ايتتى. «شىمبۇلاق» تاۋ-شاڭعى كەشەنىندەگى كەلەلى كەڭەس بارىسىندا ءتۇرلى كەزدەسۋ, جيىن دا ءوتىپ, ۇلتتىق تاعامدارىمىزدى تانىستىرۋ, ەلدىڭ وزەگى سانالاتىن قۇندىلىقتار دا ايتىلدى. «Kazakh Tourism» ۇلتتىق كومپانياسى باس سەرىكتەس بولىپ, الماتى قالاسىنىڭ اكىمدىگى قولداپ وتكىزگەن اۋقىمدى ءىس-شارانىڭ شاراپاتى ىشكى ءتۋريزمدى تۇلەتۋگە تيەتىنى ءسوزسىز.
شاڭعىشى جۋرناليستەردىڭ مۇشەسى سلوۆەنيادان كەلگەن البينا پودبەۆسەكتىڭ جاسى – 82-دە. شاڭعىنى بويجەتكەن شاعىنان تەبەدى ەكەن. سەكسەننىڭ سەڭگىرىندەگى شاڭعىشى اجەيمەن تىلدەسكەنىمىزدە«شىمبۇلاق جونىندە باس بارماعىن كورسەتىپ, ەرەكشە اسەر العانىن اڭعارتتى.
«سلوۆەنيانىڭ تريگلاۆ ۇلتتىق پاركىنىڭ تەرريتورياسىنداعى ۆوگەل تاۋ-شاڭعى كۋرورتى شىمبۇلاققا قاراعاندا الدەقايدا الاسا ەكەن. وسىنداي مۇزارت شىڭ باسىنان ەتەككە قاراي قۇلديلاپ ءتۇسۋ قانداي كەرەمەت. 82 جاسقا كەلىپ قازاقستاننىڭ كوركەم تابيعاتىمەن تۇڭعىش تانىسىپ وتىرمىن. ماعان ەرەكشە اسەر ەتتى. ەۋروپا ەلدەرىندە, ونىڭ ىشىندە ءبىزدىڭ تريگلاۆ شىڭىنىڭ بوكتەرىنە قار ەرەكشە قالىڭ جاۋادى. سىرعاناۋ ماۋسىمى كەي جىلدارى ءساۋىردىڭ سوڭىنا دەيىن سوزىلادى. مۇندا دا سونداي ۇقساستىقتى بايقادىم, الماتى قالاسىندا كۇن جىلىنىپ, كوكتەمنىڭ لەبى ەسەدى, ال الاتاۋدىڭ بوكتەرىندە ءسىرى قارى سول كۇيى جاتىر. الداعى ۋاقىتتا دا ءدام تارتسا, قازاقستانعا قىدىرىپ كەلۋدى جوسپارلاپ وتىرمىن. باسقا ەلدەردىڭ تاۋ-شاڭعى كۋرورتى قالادان تىم شالعايدا ورنالاسقان. ءتىپتى 70-80 شاقىرىم جەر ءوندىرىپ دەمالىس ورنىنا جەتەسىز. ال شىمبۇلاق الماتىنىڭ ءدال يەگى استىندا, اسا قاشىق تا ەمەس ەكەن», دەدى البينا پودبەۆسەك.
SCIJ قازاقستان كلۋبى 2013 جىلدان بەرى «شىمبۇلاق» تاۋ-شاڭعى كەشەنىمەن مەموراندۋم جاساسىپ, تىزە قوسىپ تالاي شارۋانى جۇزەگە اسىردى. سونىڭ ىشىندەگى ەلەۋلىسى – وسى دۇنيەجۇزىنىڭ جۋرناليست شاڭعىشىلارىن جيناپ وتكەرگەن باسقوسۋ. بۇلاي دەۋگە نەگىز دە جوق ەمەس. بۇعان دەيىن حالىقارالىق كلۋبتىڭ جىل سايىنعى وتىرىسى دامىعان ەلدەردىڭ تاڭداۋلى كۋرورتتى كەشەندەرىندە وتكىزىلىپ كەلدى. 1955 جىلدان بەرى 69 مارتە ۇيىمداستىرىلدى. پيرەنەي سىلەمدەرىندەگى Baqueira-Beret تاۋ-شاڭعى كۋرورتىندا (يسپانيا), 2006 جىلى تۋرين قىسقى وليمپياداسىن وتكىزۋگە ۇلەسى تيگەن يتاليانىڭ Sestriere كەشەنىندە, فرانتسيانىڭ Val Cenis Vanoise, Val d’Arly كەشەندەرىندە, رەسەيدىڭ روزا حۋتور, بولگاريانىڭ پامپوروۆو سىندى تاۋلى ولكەسىندەگى كۋرورتتى كەشەندەرىندە جوعارى دەڭگەيدە ءوتتى. ال بىلتىر كانادانىڭ ايگىلى Marble Mountain شيپاجايىندا ۇيىمداستىرىلدى.
«شىمبۇلاق» كومپانيالار توبىنىڭ باس ديرەكتورى رينات ءابدىراحمانوۆ جۋرناليست شاڭعىشىلاردىڭ حالىقارالىق كلۋبى الماتىعا ايالداۋى ەلىمىز ءۇشىن زور مارتەبە ەكەنىن ايتتى.
ء«بىز بۇل ءىس-شارانى ءوز دەڭگەيىندە وتكىزۋگە بىرنەشە جىل ازىرلىك جۇرگىزدىك. SCIJ قازاقستان كلۋبىنا مۇشە جۋرناليستەردىڭ شىمبۇلاق ەكىنشى ءۇيى سانالادى. جىل سايىن قىسقى ماۋسىم اشىلعاننان باستاپ جۋرناليستەر دە كوپشىلىكپەن بىرگە سىرعاناپ دەمالىسىن وڭتايلى وتكىزىپ ءجۇر. دۇنيەنىڭ ءار قيىرىنان كەلگەن جۋرناليستەرگە قولايلى سىرعاناۋ سوقپاعىن ازىرلەۋدە دە از جۇمىس اتقارىلعان جوق. مۇنىڭ بارلىعى دا ەلىمىزگە تۋريست تارتۋدىڭ قامى ءۇشىن جۇزەگە اسىرىلدى», دەدى ر.ءابدىراحمانوۆ.
جەتپىسجىلدىق تاريحى بار جۋرناليست شاڭعىشىلاردىڭ حالىقارالىق كلۋبىنا قازاقستان 2013 جىلدان بەرى مۇشە.
ء«بىز العاش 2012 جىلى تۇركيادا وتكەن كلۋبتىڭ حالىقارالىق جيىنىنا قوناق رەتىندە قاتىستىق. 2013 جىلى يتاليا جەرىندە رەسمي تۇردە مۇشەلىككە قابىلدادى. سول كەزدە SCIJ قازاقستان كلۋبىنىڭ مۇشەلىگىندە ءۇش جۋرناليست قانا بار ەدى. ون جىلدىڭ ىشىندە قاتارىمىز ارتىپ, 50-گە تايادى. حالىقارالىق كلۋبتىڭ كەزەكتى جيىنىن قازاقستاندا وتكىزۋگە ۇسىنىس جولداپ تالپىنىس جاسادىق. ناتيجەسىندە, قازاقستاندا قىسقى ءتۋريزمدى ناسيحاتتاۋدىڭ زور مۇمكىندىگى تۋدى. جۋرناليست شاڭعىشىلار ءوز ەلىنە بارعان سوڭ قازاقستان جايىندا اسەرىن ءبولىسىپ, اينالاسىنا ايتا جۇرەرى ءسوزسىز. بۇل – ءبىزدىڭ ون جىلدىڭ بەدەرىندەگى زور تابىسىمىز», دەدى SCIJ قازاقستان كلۋبىنىڭ پرەزيدەنتى يرينا باجەنوۆا.
يگى ءىس-شاراعا جينالعان جۋرناليست شاڭعىشىلار اراسىندا بەيرەسمي الەم چەمپيوناتى سانالاتىن حالىقارالىق تۋرنير دە ۇيىمداستىرىلدى. جاس ەرەكشەلىگىنە قاراي بىرنەشە توپقا ءبولىنىپ بايگەگە تۇسكەن ۇزدىكتەر اراسىندا ارىپتەستەرىمىز دە بار. تاۋ-شاڭعى سايىسىنان ەگور يلين كۇمىس مەدال يەلەندى. «الاتاۋ» شاڭعى-بياتلون كەشەنىندە (تالعار اۋدانى) وتكەن شاڭعىمەن جۇگىرۋ دوداسىندا جەرلەستەرىمىز توپ جاردى. سۇڭقار قارابالين مەن ەگور يلين ءوز توپتارىندا قارا ءۇزىپ كەلسە, اندرەي كۋكۋشكين قولا مەدالعا قول جەتكىزدى. ايەلدەر اراسىنداعى سايىستا ناتاليا كاچالوۆا كۇمىس جۇلدەگەر اتاندى. شاڭعى سپورتىمەن كاسىبي شۇعىلدانىپ, مانسابىن اياقتاعان سوڭ كوممەنتاتورلىققا بەت بۇرعان يتاليالىق لۋيدجي برەچچيارولي دە قازاقستانعا قايتا اينالىپ سوعاتىنىن ايتتى. ءالپىنىڭ اڭعارىندا شاڭعى تەبەتىن كوممەنتاتور شىمبۇلاقتا شيىرلاعان ءىزى تۋرالى جىلى لەپەسىن «ەلىمە جەتكىزەمىن» دەپ كەتتى.
