ونىڭ جۇمىسىنا قارۋلى كۇشتەر تۇرلەرىنىڭ باس قولباسشىلارى, اسكەر تەكتەرىنىڭ, وڭىرلىك قولباسشىلىقتار اسكەرلەرىنىڭ قولباسشىلارى قاتىستى. قورعانىس مينيسترلىگىنىڭ, باس شتابتىڭ جانە قارۋلى كۇشتەر قۇرىلىمدىق بولىمشەلەرىنىڭ باستىقتارى بەينەكونفەرەنتسبايلانىس رەجيمىندە قوسىلدى.
كەڭەستە قارۋلى كۇشتەر قۇرلىق اسكەرلەرىنىڭ 2024 جىلدىڭ ءبىرىنشى توقسانىنداعى قىزمەتىنىڭ قورىتىندىسى شىعارىلدى. قۇرلىق اسكەرلەرى باس قولباسشىسىنىڭ ورىنباسارلارى ءتيىستى باعىتتارى بويىنشا بايانداما جاسادى.
جاۋىنگەرلىك جانە جۇمىلدىرۋ دايىندىعىنىڭ جاي-كۇيى تالدانىپ, ونى جەتىلدىرۋ شارالارى ۇسىنىلدى. تاكتيكالىق بۋىن وفيتسەرلەرىنىڭ كاسىبي جانە كومانديرلىك دايارلىعىنىڭ جاعدايى قارالدى. اۋماقتىق قورعانىس بولىمشەلەرىنىڭ دايىندىعىن ۇيىمداستىرۋ ماسەلەلەرىنە نازار اۋدارىلدى.
اسكەري ءتارتىپ پەن قۇقىقتىق ءتارتىپتى ارتتىرۋ جونىندە اتقارىلعان جۇمىستىڭ قورىتىندىسى ايتىلدى. ودان وزگە ماتەريالدىق قۇرالداردى ساقتاۋدى ۇيىمداستىرۋ جانە ولاردىڭ ساقتالۋىن قامتاماسىز ەتۋ تۋرالى دا قوزعالدى. قارۋ-جاراق, اسكەري تەحنيكا مەن وق-دارىلەردى ساقتاۋ ورىندارىن جەتىلدىرۋ شارالارى قارالدى.
قۇرلىق اسكەرلەرىنىڭ باس قولباسشىسى گەنەرال-مايور اسان ءجۇسىپوۆتىڭ جالپى قىزمەتتىك ءىس-قيمىل تۋرالى بايانداماسى تىڭدالدى. باس قولباسشى پروبلەمالىق ماسەلەلەرگە نازار اۋداردى. بۇدان بولەك ول سانى جاعىنان قارۋلى كۇشتەردىڭ ەڭ كوپ ءتۇرىنىڭ قىزمەتىنىڭ تيىمدىلىگىن ارتتىرۋعا بايلانىستى ۇسىنىستارىن ايتتى.
قورعانىس ۆەدومستۆوسىنىڭ باسشىسى قارۋلى كۇشتەردىڭ اسكەري جانە تۇرعىن ءۇي-كوممۋنالدىق ينفراقۇرىلىمىن دامىتۋ پەرسپەكتيۆالارى تۋرالى ايتىپ بەردى. ول كازارمالىق قوردى قالپىنا كەلتىرۋ, سارىوزەك گارنيزونىنداعى تانك پولكىنىڭ پاركىن جايلاستىرۋ جانە جابدىقتاۋ جونىندەگى جۇمىستاردىڭ جاقسى جۇرگىزىلىپ جاتقانىن اتاپ ءوتتى.
قورىتىندىلاي كەلە قورعانىس ءمينيسترى وفيتسەرلەر قۇرامى مەن كەلىسىمشارت بويىنشا اسكەري قىزمەتشىلەر ءۇشىن الەۋمەتتىك-تۇرمىستىق جاعداي جاساۋدى ءبىرىنشى ورىنعا قويۋ كەرەك دەدى. ول گارنيزوندا قر قارۋلى كۇشتەرى ۇلتتىق اسكەري-پاتريوتتىق ورتالىعىنىڭ فيليالىن اشۋدى تاپسىردى.
«گارنيزوننىڭ اسكەري بولىمدەرى ءىرى ەلدى مەكەندەردەن الىستا ورنالاسقان. سوندىقتان, ءبىز, ءوزىمىز اسكەري قىزمەتشىلەردىڭ بالالارىنا ارنالعان مادەني-دەمالىس ءىس-شارالارىن وتكىزۋ, كينولار كورسەتۋ, ۇيىرمەلەر مەن سەكتسيالار ۇيىمداستىرۋعا قولداۋ كورسەتۋىمىز كەرەك. جەكە قۇرامنىڭ جاۋىنگەرلىك رۋحى وسى فاكتورلارعا تىكەلەي اسەر ەتەدى», دەپ اتاپ ءوتتى گەنەرال-پولكوۆنيك رۋسلان جاقسىلىقوۆ.
بۇدان وزگە ول جەرگىلىكتى اتقارۋشى بيلىك وكىلدەرىمەن, اۋداندىق جانە وبلىستىق ءماسليحات دەپۋتاتتارىمەن اسكەري ينفراقۇرىلىم وبەكتىلەرىن جوندەۋگە, پايدالانۋعا, جاستارعا اسكەري-پاتريوتتىق تاربيە بەرۋ جۇمىستارىن جۇرگىزۋگە بايلانىستى ماسەلەلەردى شەشۋدە ءوزارا قارىم-قاتىناستى بارىنشا قولداۋ قاجەتتىگىن مالىمدەدى.
