فوتو: ۇلتتىق ۇلان
ماسەلەن, 22 ناۋرىز كۇنى ساعات 13:40 شاماسىندا «ەسىل» اۋدانىندا قوعامدىق ءتارتىپتى ساقتاۋ جونىندەگى پاترۋلدىك-بەكەتتىك قىزمەتتى اتقارۋ كەزىندە ايەل ادام اسكەري جاساققا جوعالعان نەمەرەسىن تاۋىپ بەرۋدى وتىنگەن.
اسكەري جاساق باستىعى-قاتارداعى ءمادي يساەۆ پەن قاتارداعى جاۋىنگەر ادىلەت زاكەنوۆ بۇل تۋرالى پاترۋلدىك توپ باستىعىنا بايانداپ, جاقىن ماڭداعى جاساقتاردى حاباردار ەتتى. قىسقا ۋاقىتتان كەيىن ساربازدار ءتورت جاسار بالانى تاۋىپ, ونى اجەسىنە تاپسىردى. جەرگىلىكتى تۇرعىن ساربازدارعا جاۋاپتى قىزمەتى مەن جەدەلدىگى ءۇشىن العىس ايتتى.
ەكىنشى جاعداي ساعات 17:15 شاماسىندا بولدى. قاتارداعى جاساق باستىعى نۇرداۋلەت ەسەنباەۆ پەن پاترۋلدىك قاتارداعى جاۋىنگەر تىلەك سەرىكبولسىنوۆ EXPO اۋدانىندا پاترۋلدەۋ كەزىندە جەتى جاسار قىزدىڭ جوعالعانى تۋرالى حابار العان.
– باعداردى العاننان كەيىن ءبىز بىردەن جوعالعان بالانى ىزدەۋگە كىرىستىك. پوليتسيا قىزمەتكەرلەرىمەن 30 مينۋتتىق بىرلەسكەن ىزدەۋ شارالارىنان كەيىن ءبىز جوعالعان بالاعا ۇقساس بەلگىلەرى بار قىزدى تاپتىق. ودان كەيىن ونى اتا – اناسىمەن قاۋىشتىردىق, - دەدى اسكەري جاساق باستىعى قاتارداعى جاۋىنگەر ن. ەسەنباەۆ.
ءۇشىنشى جاعداي ساعات 20:30 شاماسىندا بولدى. اسكەري جاساق باستىعى قاتارداعى جاۋىنگەر داميرحان نۇرحان مەن پاترۋلدىك قاتارداعى جاۋىنگەرلەر الىشەر ايتباەۆ پەن نۇراسىل چاۋباەۆتان جاساقتالعان اسكەري جاساق پاترۋلدەۋ باعىتىندا «IPhone 14» ماركالى سمارتفوندى تاپتى. بۇل جاعداي تۋرالى ولار اعا باستىقتارعا بايانداعان.
– قۇرىلعىنىڭ كىمگە تيەسىلى ەكەنىن ىزدەي باستاعان كەزدە تەلەفونعا سمارتفون يەسىنەن قوڭىراۋ ءتۇستى. كەيىن ول تەلەفونى تابىلعان جەرگە كەلدى. اڭگىمە بارىسىندا ءبىز سمارتفوننىڭ وسى جاس جىگىتكە تيەسىلى ەكەنىنە كوز جەتكىزىپ, تەلەفوندى قولىنا ۇستاتتىق, – دەيدى اسكەري جاساق باستىعى قاتارداعى جاۋىنگەر داميرحان نۇرحان.
وسىدان كەيىن جاس جىگىت ساربازدارعا قىراعى جانە ادال قىزمەت ەتكەنى ءۇشىن العىس ءبىلدىردى.
