سۋرەتتەردى تۇسىرگەن – ەرلان ومار, «EQ»
مادەنيەت جانە اقپارات ءمينيسترى ايدا بالاەۆا ناۋرىز مەيرامىن تويلاۋدىڭ جاڭا فورماتىنا توقتالىپ, ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى ءسوز ەتكەن نەگىزگى تەزيستەردى اتاپ ءوتتى.
«بيىلدان باستاپ ەلىمىز ناۋرىزدى جاڭا فورماتتا اتاپ ءوتىپ جاتىرمىز. ناۋرىزنامانىڭ ارنايى تۇجىرىمداماسى ازىرلەنىپ, ونىڭ اياسىندا ءار كۇننىڭ ءوز اتاۋى بەلگىلەندى. ناۋرىزنامانىڭ سوڭعى كۇنى – 23 ناۋرىز – جاڭا جىلدى جاڭا ماقساتپەن, جاڭا ۇمىتپەن قارسى الۋدىڭ سيمۆولى. بۇل كۇنى قازاقستاننىڭ بارلىق وڭىرىندە جالپىۇلتتىق ەكولوگيالىق اكتسيالار وتەدى. ارينە, ناۋرىز مەيرامىن وسىنداي اۋقىمدا اتاپ ءوتۋ ۇلتتىق بىرەگەيلىگىمىزدى نىعايتۋعا, قوعامدى ءبىر ماقساتقا شوعىرلاندىرۋعا سەپتىگىن تيگىزەدى», دەدى ايدا بالاەۆا.
سونىمەن قاتار مينيستر مادەني مۇرانى ناسيحاتتاۋ مەن ونى الەمدىك ارەنادا تانىتۋ ماقساتىندا مينيسترلىك تاراپىنان جاسالعان جوبالارعا توقتالدى. سونىڭ ىشىندە ءىس-شارا بارىسىندا تانىستىرىلىمى وتكەن «Qazaq سulture» اقپاراتتىق-تانىمدىق پورتالى بار. ونلاين پورتال مەملەكەت باسشىسىنىڭ ەلىمىزدىڭ مادەني مۇراسىن تانىتۋ, ۇلتتىق برەندتى, تاريح پەن مادەنيەتتى ناسيحاتتاۋ تاپسىرماسى اياسىندا ىسكە قوسىلىپ وتىر. «Qazaq سulturە» ەلىمىزدىڭ كوپقىرلى مادەنيەتى مەن باي تاريحىنىڭ ايرىقشا بەلگىسىنە اينالماق.
مەرەكەلىك ءىس-شارادا ەلىمىزدەگى تۇڭعىش كوپۇلتتى «Birlik» ءان-بي ءانسامبلى دە ونەرىن كورسەتتى. ۇجىم كوپۇلتتى بىرلىك پەن مادەنيەتارالىق ديالوگتىڭ بىرەگەي ۇلگىسىنىڭ بەلگىسىندەي. ەسكە سالساق, انسامبل بيىل الەم حالىقتارىنىڭ مادەني مۇراسىن ساقتاۋ جانە ناسيحاتتاۋ, ءداستۇرلى مۋزىكا مەن ءبيدى دارىپتەۋ ماقساتىندا جاساقتالدى.
سونداي-اق كەش قوناقتارىنا جاڭادا قۇرىلعان «Zhoshy» فولكلورلىق ءانسامبلى تانىستىرىلدى. انسامبل مۇشەلەرى جەلبۋاز, مەس سىرناي, ۋىلدەك, تاستاۋىق سياقتى سيرەك كەزدەسەتىن مۋزىكالىق اسپاپتاردا وينايدى. ولاردىڭ شەبەرلىگى مەن تالانتى قازىردىڭ وزىندە كوپكە تانىلعان, جاقىن ارادا شىعارماشىلىق ۇجىم قىتايعا گاسترولدىك ساپارمەن بارماق.
ديپلوماتيالىق بالدىڭ قۇرمەتتى قوناقتارى دا ەلىمىزدى ناۋرىز مەيرامىمەن قۇتتىقتادى. «ناۋرىز مەرەكەسىمەن شىن جۇرەكتەن قۇتتىقتايمىن! بارشا قازاقستاندىقتارعا زور دەنساۋلىق, باقىت, جاقسىلىق پەن اماندىق تىلەيمىن! بۇل قۋانىش پەن جاڭارۋ كەزەڭى سىزدەردىڭ جۇرەكتەرىڭىزگە جارقىن جانە جىلى سەزىم ۇيالاتسىن, ال ۇيلەرىڭىزگە بەيبىتشىلىك پەن اماندىق اكەلسىن», دەدى بۇۇ-نىڭ تۇراقتى ۇيلەستىرۋشىسى ميكاەل فريبەرگ-ستوري.
«ناۋرىز كوكتەمنىڭ العاشقى لەبىمەن بىرگە كەلدى. كوكتەمگى كۇن مەن ءتۇننىڭ تەڭەلۋ كۇنى ءار وتباسىنا باقىت, قۋانىش اكەلەتىنىنە, جاڭا جىلدا جاقسى وقيعالار بولاتىنىنا سەنىمدىمىن», دەدى گەرمانيا فەدەراتيۆتىك رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مونيكا يۆەرسەن ءوز قۇتتىقتاۋىندا.
ال ورتالىق ازيا بويىنشا سۋبايماقتىق ۇيلەستىرۋشى, قازاقستان, قىرعىزستان, تۇرىكمەنستان جانە وزبەكستانداعى حكۇ ميسسياسىنىڭ باسشىسى زەينال گادجيەۆ ۇلىق مەرەكەنىڭ ادامنىڭ جانىنا, تانىنە, مىنەزىنە دە جاڭالىق سىيلايتىنىن اتاپ ءوتتى. «بۇل مەيرام – ادامدارعا باقىتتى ءومىر سۇرۋگە, دامۋعا, وركەندەۋگە, دوستىق, بەرەكە مەن ماحابباتقا ءۇمىت سىيلايتىن كوكتەمگى جاڭارۋ مەرەكەسى. ناۋرىز – بىرلىك پەن تۇراقتىلىق مەيرامىنا اينالىپ, ۇيلەرىڭىزگە باقىت اكەلسىن, ويلاعان دۇنيەنىڭ بارلىعى جۇزەگە اسسىن», دەدى ول.
ناۋرىز بالىنىڭ اياسىندا ۇلتتىق ونەر تۇرلەرىنەن شەبەرلىك ساعاتتارى دا ۇيىمداستىرىلدى. ماسەلەن, كيىز باسۋدىڭ ەكى ءتۇرىن دە (قۇرعاق جانە ىلعالدى ءادىس) بايقاپ, شەبەرمەن بىرگە جاساپ كوردىك. ايتا كەتەيىك, اۋقىمدى ءىس-شارانى مادەنيەت جانە اقپارات مينيسترلىگى ۇيىمداستىرىپ وتىر.
