ينفوگرافيكانى جاساعان – زاۋرەش سماعۇل ,«EQ»
قۇرىلتايدىڭ العاشقى وتىرىسى ۇلىتاۋدا باستاۋ السا, بىلتىر كيەلى تۇركىستاندا ءوتتى. بيىلعى قۇرىلتايدا پرەزيدەنت «ادال ادام – ادال ەڭبەك – ادال تابىس» تاقىرىبىندا مازمۇندى ءسوز سويلەپ, ادىلەتتى قازاقستاننىڭ الداعى ساياسي-ەكونوميكالىق, رۋحاني-يدەولوگيالىق باعدارىن ايقىنداپ بەردى.
مادەنيەت جانە اقپارات مينيسترلىگىنىڭ «ەسىك» مەملەكەتتىك تاريحي-مادەني مۋزەي-قورىعىنىڭ ۇجىمى ۇلتتىق قۇرىلتايدا كوتەرىلگەن ماسەلەلەردى قولداي وتىرىپ, ماڭىزدى جيىننىڭ ماقساتتارىن ىسكە اسىرۋدا جۇيەلى جۇمىس اتقاراتىن بولادى. بۇل جولعى قۇرىلتايدا دا پرەزيدەنت ەلىمىزدىڭ تاريحىن جان-جاقتى زەرتتەۋ, تامىرى تەرەڭ تاريحي-مادەني مۇرالارىمىزدى قورعاۋ ماسەلەلەرىنە ەرەكشە توقتالدى.
بيىل جوشى ۇلىسىنىڭ نەگىزى قالانعانىنا 800 جىل تولىپ وتىر. مەملەكەتتىلىگىمىزدى ايقىندايتىن وسىناۋ تاريحي داتا كەڭ كولەمدە اتالىپ وتىلمەك. بۇل ورايدا مەملەكەت باسشىسى ءتول تاريحىمىزعا شىنايى كوزبەن قاراپ, ۇلتتىق سانا مەن قوعامدىق قۇندىلىقتاردى جاڭعىرتۋدىڭ ماڭىزدىلىعىن اتاپ ءوتتى.
قۇرىلتايدا سويلەگەن سوزىندە پرەزيدەنت: ء«بىز باي تاريحي-مادەني مۇرالارىمىزدى ساقتاۋ ءۇشىن ارحەولوگيا سالاسىندا ءتارتىپ ورناتۋىمىز كەرەك», دەي كەلە ەلىمىزدە كاسىبي ارحەولوگتەردىڭ تاپشى ەكەنىن, ارحەولوگيالىق قازبا جۇرگىزۋ ءۇشىن ليتسەنزيا بەرۋ ىسىندە شەشىمىن تاپپاعان تۇيتكىلدەر بار ەكەنىن اتاپ ءوتتى. وسى ورايدا مەملەكەت باسشىسى تاريحي-مادەني مۇرا ساناتىنا كىرەتىن نىساندارعا رەستاۆراتسيا جاساۋ ءىسىن رەتكە كەلتىرەتىن شارالاردى كۇشەيتۋ جانە تاريحي جادىگەرلەرىمىزدى شەتەل مۇراجايلارىنان قازاقستانعا قايتارۋ جۇمىستارىن جانداندىرۋ قاجەتتىگىن ايتتى. بۇل باعىتتا «ەسىك» مەملەكەتتىك تاريحي-مادەني مۋزەي-قورىعىنىڭ عالىمدارى شەتەلدىك ماماندارمەن بىرلەسىپ ارحەولوگيالىق زەرتتەۋ جۇمىستارى مەن قۇندى جادىگەرلەردى ساقتاپ, ناسيحاتتاۋدا ناتيجەلى جۇمىستار اتقارىپ كەلەدى.
قۇرىلتايدا ايتىلعان كەلەلى ويلار مەن ۇسىنىس-پىكىرلەردەن تۇيگەنىمىز: تاريحي-مادەني قۇندىلىقتارىمىزدى جاڭعىرتۋ – ۇلتتىق بىرەگەيلىگىمىزدى نىعايتا تۇسەتىنى ءسوزسىز.
مەملەكەت باسشىسى مەملەكەتتىك ءتىلىمىزدىڭ قولدانۋ اياسىن كەڭەيتۋ, جاستاردىڭ پاتريوتتىق تاربيەسىن كۇشەيتۋ, ولاردى كىتاپ وقۋعا, ءبىلىم, عىلىمعا ىنتالاندىرۋ ماسەلەلەرىنە ايرىقشا ءمان بەرۋگە شاقىردى. قۇرىلتايدا ادىلەتتى قازاقستان قوعامىن دامىتۋ ءۇشىن ءتارتىپ پەن زاڭ ۇستەمدىگىن قامتاماسىز ەتۋ, ازاماتتاردىڭ قۇقىعىن قورعاۋ ماسەلەلەرى دە نازاردان تىس قالمادى. پرەزيدەنت ايتىپ وتكەندەي, ەلىمىزدىڭ ەندىگى ۇستاناتىن باستى باعىتى – «ادىلەتتى قازاقستان – ادال ازامات – وزىق ويلى ۇلت» قاعيداسى.
مادەني-گۋمانيتارلىق سالانىڭ جانە يدەولوگيانىڭ جاڭا باعدارى ايقىندالعان ءۇشىنشى قۇرىلتاي بارشامىزعا ۇلكەن مىندەت جۇكتەپ وتىر. بۇل – ءبىرىنشى كەزەكتە ءبىزدىڭ ۇلتتىق بىرەگەيلىگىمىزدى نىعايتۋ جانە ەلىمىزدى قارقىندى دامىتۋ ءۇشىن وتە ماڭىزدى.
گۇلميرا مۇحتاروۆا,
«ەسىك» مەملەكەتتىك تاريحي-مادەني مۋزەي-قورىعىنىڭ ديرەكتورى
