ءىس-شاراعا «Amanat» پارتياسى فراكتسياسىنىڭ جەتەكشىسى ەلنۇر بەيسەنباەۆ, «اۋىل» حالىقتىق-دەموكراتيالىق پاتريوتتىق پارتياسى فراكتسياسىنىڭ جەتەكشىسى سەرىك ەگىزباەۆ, «Respublica» پارتياسى فراكتسياسىنىڭ جەتەكشىسى ايداربەك قوجانازاروۆ, «اق جول» قازاقستان دەموكراتيالىق پارتياسى فراكتسياسىنىڭ جەتەكشىسى ازات پەرۋاشەۆ, قازاقستان حالىق پارتياسى فراكتسياسىنىڭ جەتەكشىسى ماگەررام ماگەرراموۆ, جالپىۇلتتىق سوتسيال-دەموكراتيالىق پارتياسى فراكتسياسىنىڭ جەتەكشىسى اسحات راقىمجانوۆ, سونداي-اق پرەزيدەنتتىڭ پارلامەنتتەگى وكىلدىگىنىڭ باسشىسى امىربەك وسپانبەكوۆ قاتىستى.
باسقوسۋعا قاتىسۋشىلار ۇلتتىق قۇرىلتايدىڭ «ادال ادام – ادال ەڭبەك – ادال تابىس» اتتى ءۇشىنشى وتىرىسىندا مەملەكەت باسشىسى بەرگەن تاپسىرمالار مەن باستامالاردى ءتيىمدى جۇزەگە اسىرۋ جولدارى مەن تاسىلدەرى تۋرالى پىكىر الماستى.
مەملەكەتتىك كەڭەسشى پرەزيدەنتتىڭ كوپتەگەن باستاماسىن ناقتى ورىنداۋ ءۇشىن زاڭنامالىق تۇرعىدان قولداۋ كورسەتۋ جانە وعان دەپۋتاتتاردىڭ بەلسەندى اتسالىسۋى قاجەت ەكەنىن اتاپ ءوتتى. ەڭ الدىمەن, ەسىرتكىنى ءوندىرۋ, لۋدومانيا, ۆانداليزم, تۇرمىستىق زورلىق-زومبىلىق ءۇشىن جاۋاپكەرشىلىكتى كۇشەيتۋ, سونداي-اق مەملەكەتتىك ناگرادالار, ونوماستيكا, ارحەولوگيالىق قىزمەت تۋرالى جانە باسقا دا زاڭدارعا تۇزەتۋلەر ەنگىزۋ قاجەت.
جيىندا ونوماستيكا, ەسىرتكىگە جانە ۆانداليزمگە قارسى كۇرەس تۋرالى زاڭ جوبالارى ءماجىلىستىڭ قاراۋىندا, ال تۇرمىستىق زورلىق-زومبىلىققا قارسى كۇرەس تۋرالى زاڭدى ءماجىلىس قابىلداپ, قۇجاتتىڭ سەناتقا جىبەرىلگەنىنە نازار اۋدارىلدى.
بۇل رەتتە ۆانداليزم دەگەنىمىز ەسكەرتكىشتەر مەن تابيعي نىسانداردى عانا ەمەس, قوعامدىق ورىندارداعى م ۇلىكتى دە ءبۇلدىرۋ ەكەنىنە باسا ءمان بەرىلدى. دەپۋتاتتار ۆانداليزم جانە باسقا دا تۇرمىستىق قۇقىق بۇزۋشىلىقتار ءۇشىن جازانى قاتاڭداتۋ قاجەتتىگى تۋرالى ايتتى. سونداي-اق فراكتسيا جەتەكشىلەرى پرەزيدەنت ۇسىنعان جالپىۇلتتىق قۇندىلىقتاردى دارىپتەۋگە قاتىستى ۇسىنىستارىن ورتاعا سالدى.
