«جاقسىدان ۇيرەنىپ, جاماننان جيرەنە ءبىلۋىمىز قاجەت. ياعني شىن مانىندە وزىق ۇلت بولۋ ءۇشىن جاقسىلىققا ۇمتىلۋمەن قاتار, ەلىمىزدىڭ ءوسىپ-وركەندەۋىنە كەدەرگى بولاتىن جامان ادەت, جاعىمسىز قىلىق جانە قاۋىپتى كەسەلدەن قۇتىلۋىمىز كەرەك», دەدى قاسىم-جومارت كەمەل ۇلى. دەنساۋلىق ساقتاۋ سالاسىنىڭ وكىلى رەتىندە پرەزيدەنتتىڭ بۇل پىكىرىن تولىعىمەن قولدايمىن.
بىرىنشىدەن, قازىر ەسىرتكى ساۋداسى, اتاپ ايتقاندا سينتەتيكالىق ەسىرتكىنىڭ اينالىمى بەلەڭ الىپ تۇر. مەملەكەت باسشىسى ايتقانداي, تەك بىلتىر ەسىرتكىگە قاتىستى 7,5 مىڭنان اسا قىلمىس انىقتالدى. زاڭسىز اينالىمنان 41 توننا ەسىرتكى الىندى. استانا مەديتسينا ۋنيۆەرسيتەتى بولاشاق دارىگەرلەردى دايارلايتىن ءبىلىم ورداسى بولعاندىقتان بۇل كەسەلدىڭ قانشالىقتى زيان ەكەنىن جاقسى بىلەدى ءارى بۇل باعىتتاعى پروفيلاكتيكالىق اعارتۋ جۇمىستارىن بەلسەندى جۇرگىزىپ جاتىر. وكىنىشتىسى, ناشاقورلىق – جاس ۇرپاقتىڭ اراسىندا تەز تارالىپ جاتقان قاۋىپتى ىندەتتىڭ ءبىر ءتۇرى. سول سەبەپتى ونى ەڭ اۋىر قىلمىسقا تەڭەستىرۋ قاجەت دەگەن باستاما قۇپتارلىقتاي.
ەكىنشىدەن, قۇرىلتايدا مەملەكەت باسشىسى تۇتاستاي حالقىمىزدىڭ بولاشاعىنا وراسان زور زيان كەلتىرىپ جاتقان ۆەيپ ماسەلەسىن تاعى ءبىر مارتە كوتەردى. قاسىم-جومارت توقاەۆتىڭ باستاماسىمەن پارلامەنتتە ۆەيپتەردى ەلىمىزگە اكەلىپ, ونى ءوندىرىپ تاراتقان ادامداردى قىلمىستىق جاۋاپقا تارتۋدى كوزدەيتىن زاڭ جوباسى قارالىپ جاتىر. وسى امال سانگە اينالعان قاۋىپتى ءۇردىستى شەكتەپ, بەتىن قايتارادى دەگەن ۇمىتتەمىز.
ۇشىنشىدەن, ادام اعزاسىنا زيان تاعى ءبىر وعاش ادەتتىڭ ءبىرى – ناسىباي اتۋ. ونىڭ قۇرامىندا ءتۇرلى دەرتتى, مىسالى ونكولوگيالىق اۋرۋلاردى قوزدىراتىن زاتتار بار. شىندىعىنا كەلگەندە, اتالعان زاتتى پايدالانىپ, جەر-دۇنيەنى لاستاۋدى اتا داستۇرگە بالاۋ قيسىنسىز. سوندىقتان بۇل كورىنىستى تەجەۋ قاجەت.
تورتىنشىدەن, قازىر لۋدومانيا قوعامنىڭ باس اۋرۋىنا اينالىپ وتىر. ەلىمىزدە قانشاما ازامات بار جيناعان قاراجاتى مەن تاپقان-تايانعانىن قۇمار ويىندارعا جۇمساپ, ءتىپتى وسى ماقساتتا كرەديت الىپ جاتقاندار دا بار. بۇل سۇمدىق جاعداي. راسىمەن دە لۋدومانيا – بەيبىت كۇندە ەلدىڭ شىرقىن بۇزىپ وتىرعان قاتەر. مۇنىڭ سالدارىنان زاڭدى بۇزىپ, قىلمىسقا بارىپ وتىرعان ازاماتتار جەتەرلىك. وسى دەرتتىڭ ءسۋيتسيدتىڭ ارتۋىنا دا سەپ بولىپ وتىرعانى جاسىرىن ەمەس. قىنجىلتاتىنى ونلاين-ويىندار بالالاردىڭ ەرمەگىنە اينالىپ بارادى. پرەزيدەنت ۇكىمەتكە لۋدومانيامەن كۇرەسكە قاتىستى جوسپار قابىلداۋدى تاپسىرعان بولاتىن. وسىلايشا, قۇمار ويىندارعا زاڭ جۇزىندە شەكتەۋ قويىلماق.
بەسىنشىدەن, قوعامدا اگرەسسيانىڭ كۇشەيىپ بارا جاتقانىن اڭعارۋ قيىن ەمەس. بوتەن ادامعا ءتىل تيگىزىپ, ار-نامىسىن تاپتاۋ, ءتىپتى جۇدىرىعىن الا جۇگىرۋ ۇيرەنشىكتى قۇبىلىسقا اينالدى. قوعامدىق كولىك پەن جەدەل جاردەم جۇرگىزۋشىلەرىنە قاتىگەزدىك تانىتۋ, اسىرەسە مەديتسينا قاۋىمىن الاڭداتىپ وتىرعانى راس. پرەزيدەنتىمىزدىڭ بۇل ماسەلەگە دە نازار اۋدارۋى ءبىزدى قۋانتتى. ياعني قوعامدا ءتارتىپ ورناپ, زاڭنىڭ سالتانات قۇراتىنىنا سەنىم مول.
«بەس نارسەدەن قاشىق بول, بەس نارسەگە اسىق بول» دەپ ۇلى حاكىم اباي ايتقانداي, جوعارىدا تىزىلگەن ماسەلەلەردى جونگە كەلتىرىپ, جولعا قويساق تاۋەلسىزدىگىمىز تۇعىرلى, ەلدىگىمىز عۇمىرلى بولادى دەگەن ويدامىن.
كامالجان نادىروۆ,
استانا مەديتسينا ۋنيۆەرسيتەتىنىڭ باسقارما توراعاسى-رەكتور
