بۇگىندە قانشاما وقۋلىق شىعىپ جاتىر. وسىعان بايلانىستى ءۇش كەمشىلىكتى اتاپ ايتايىن. بىرىنشىدەن, مازمۇنى دۇرىس ەمەس, كوڭىلدەن شىقپايدى. ەكىنشىدەن, جۇيەلىلىك جويىلعان. ۇشىنشىدەن, ديداكتيكانىڭ قاعيداتىندا ەڭ قاراپايىمنان كۇردەلىگە بىرتىندەپ كوشۋى كەرەك. بۇل تالاپ ساقتالماي وتىر.
وقۋشى وقۋلىقتاعى تاقىرىپتى تىڭداپ, تالداۋ جاسايدى. سودان سوڭ العان ءبىلىمىن بىرىكتىرىپ, سينتەزدەيدى. ال سينتەزدەلگەن ءبىلىمىن بىرىكتىرگەن سوڭ, تۇجىرىمعا اينالدىرادى. ەگەر ونداي تاپسىرمالار بولماسا, وقۋشىلار مەكتەپتە العان تۇجىرىمدى قالاي بەكىتەدى؟ وسىدان كەيىن رەپەتيتوردان, نە مۇعالىمىنەن قوسىمشا ءدارىس الۋعا ءماجبۇر بولادى.
سوندىقتان اتا-انالارعا, بالالارعا, مۇعالىمگە تۇسىنىكتى بولاتىن بىرىڭعاي فۋندامەنتالدى وقۋلىق شىعارىلسا دەگەن ويدامىن. بۇل ءۇشىن مەكتەپ مۇعالىمدەرىنىڭ تاجىريبەسى ەسكەرىلۋى قاجەت. جاڭا وقۋلىقتى سىناقتان وتكىزۋدىڭ ماڭىزى زور. سىناق كەزىندە وقۋشىلاردىڭ قانشا پايىزى وقۋلىقتاعى تاپسىرمالاردى ورىنداي الاتىنى ەسكەرىلگەنى ءجون. سودان سوڭ وقۋلىقتى بارلىق مەكتەپكە تاراتۋعا بولادى.
قازىر وقۋشىنىڭ ساباقتا ءموبيلدى تەلەفون قولدانۋىنا رۇقسات جوق. بۇل – دۇرىس تالاپ. بىراق ءۇزىلىس كەزىندە وقۋشىعا تىيىم سالا المايمىز. وقۋشى ۇزىلىستە ءارتۇرلى سايتقا كىرىپ, ويىن وينايدى, نە ءتۇرلى اقپاراتپەن تانىسادى. ال مۇعالىم ساباق كەزىندە ينتەرنەتكە الاڭداعان بالانىڭ زەيىنىن اۋدارۋعا ءتيىس. وعان تاعى دا ۋاقىت كەرەك. بالانىڭ العان اقپاراتتارى جۇيكە جۇيەسىندەگى نەيرونداردان تۇراتىن شەڭبەردە ساقتالىپ قالادى. بۇل ءار بالادا فيزيولوگيالىق ەرەكشەلىگىنە بايلانىستى 5–10 مينۋتقا دەيىن سوزىلۋى مۇمكىن. وسى جاعداي بالانىڭ ساباقتان ەشقانداي پايدا الماۋىنا اكەلىپ سوعادى. بالانىڭ اتا-اناسىنا ەسكەرتىپ, وقۋشىعا تەلەفوندى مەكتەپتەگى ساباعىن تولىق اياقتاعان سوڭ عانا ۇستاتۋ كەرەك. سوندا عانا ساپالى ءبىلىم الادى.
قوعامدا ءتۇرلى ويمەن بالانى وزىنە تارتاتىن ادامدار توبى بار. وقۋشىنى سونداي توپتارعا ۇيىرسەك بولماۋى ءۇشىن قوسىمشا ءبىلىم بەرۋ توبىنا, نە سپورتتىق ۇيىرمەلەرگە كوبىرەك تارتۋ قاجەت. جاسوسپىرىمدەر مەكتەپتەن كەيىنگى ۋاقىتىن ءوزى قالاعان سپورتتىق ۇيىرمەلەردە وتكىزسە, دەنى ساۋ ۇرپاق رەتىندە قالىپتاسار ەدى.
الما شۇكىجانوۆا,
سەمەي قالاسىنداعى №7 مەكتەپ-ليتسەيىنىڭ مۇعالىمى,
قازاقستاننىڭ ەڭبەك ەرى
