ەلدە ۇنەمى اتىپ جۇرگەن مىلتىعى دا, كوزدەيتىن نىساناسى دا قاراپايىم, قارابايىر دۇنيەلەر ەكەن-اۋ. الەم كۋبوگىندە جاعداي وزگەشە. مىلتىقتارى – سوڭعى ۇلگىدەگى ءمىنسىز قۇرالدار. نىسانالارى دا بىزدەگىدەي ۇلبىرەگەن قاعاز ەمەس. جاڭا مىلتىققا ماشىقتانىپ ۇيرەنۋ ءۇشىن دە ۋاقىت كەرەك. ال جارىس كۇتىپ تۇرمايدى عوي. نار تاۋەكەل دەگەن ىشتەي. ەركىن تىلەۋقابىل ۇلى ەر مىنەزدى قازاقتىڭ وسى ءبىر ءسوزىن ىشتەي جاقسى كورەدى. ءوزى دە تاۋەكەل ەتىپ تاس جۇتۋعا ءاماندا دايىن. ال قيىندىق اتاۋلىنى كەزىكتىرىپ تۇرعانى بۇگىن عانا ەمەس قوي. ەمەننىڭ ءيىر بۇتاعىنداي جاراتىلىسىنان مىعىم جىگىت تاعدىردىڭ تالكەگىن كوپتەن بەرى كوتەرىپ كەلەدى ەمەس پە؟
قىرسىق دەيمىز بە, جوق الدە جازمىش پا ەكەن, كاتەپتى قارا نار عانا كوتەرەتىن ءزىلماۋىر سالماق سوناۋ 2006 جىلى كەزىككەن. كەزىككەندە دە ەندى قايتىپ ايىرىلماستاي, قادام باسىپ جۇرگىزبەستەي, الداعى بار ءۇمىتىن كوكتەي سولدىرارداي بولدى ەمەس پە؟! وبلىس ورتالىعىنداعى قۇرىلىس جۇمىسىندا جازىم بولىپ, توعىزىنشى قاباتتان قۇلديلاپ قۇلاپ كەتكەن. كورەر جارىعى بار ەكەن, ايتپەسە ەكىنشى, نە ءۇشىنشى قابات ەمەس, تۋ سوناۋ توعىزىنشى قابات. وبلىستىق اۋرۋحانادا وپەراتسيا جاسالدى. ەندى قايتىپ اياعىن باسا المايتىنى بەلگىلى بولدى. «باسقا تۇسسە باسپاقشىل» دەمەكشى, تاعدىردىڭ سالعان ىسىنە كوندىككەن. كەيىن حالىققا قىزمەت كورسەتۋ ورتالىعىنا ورنالاسقان. الماتى ەكونوميكا جانە ستاتيستيكا ينستيتۋتىنىڭ كوكشەتاۋ فيليالىن ءبىتىرىپ ماماندىق العانى كادەگە استى.
قولارباعا تاڭىلىپ قالعاننان كەيىن ءبىر-اق ءبىلدى. قۇرىلىس فيرماسى ويدا جوق جەردە مۇمكىندىگى شەكتەلىپ قالعان ادامعا زاڭ بويىنشا تولەنەتىن جاردەماقى بەرگىسى كەلمەگەن. دەس بەرگەندە توعىزىنشى قاباتتان قۇلاعاندا قالتا تەلەفونى سىنباي امان قالىپتى. جۇمىس باستالاردىڭ الدىندا ەركىن قۇرىلىس الاڭىنىڭ تاستاي قاراڭعى, قورشاۋدىڭ ءتۇبى بوساپ, شايقالىپ تۇرعانىن ءتۇسىرىپ العان. كەيىن سوتتا قارالعان كەزدە دالەل بولىپ شىقتى. اۋىلداستارىنا ايتار العىسى دا از ەمەس. ادىلدىككە جەتۋ ءۇشىن ولار دا اتسالىستى. اسىرەسە شوق جۇلدىزداي قاراوزەك اۋىلىنىڭ تۋماسى, سول كەزدەگى وبلىستىق ءماسليحاتتىڭ دەپۋتاتى بولىپ جۇرگەن نارتاي ىسقاقوۆ اعاسى شىندىققا جەتۋ ءۇشىن جانىن سالىپ كىرىسكەن.
باسپانانىڭ زارى وتكەن سوڭ «اmanat» پارتياسى اقمولا وبلىستىق فيليالىنىڭ سول كەزدەگى توراعاسى عالىم بەكماعامبەتوۆكە جولىعىپ, ءوتىنىش ايتقان. عالىم مادەش ۇلى وبلىستىق ءماسليحاتتىڭ دەپۋتاتتار كورپۋسىنا جاعدايدى ءتۇسىندىرىپ, كومەك قولىن سوزۋىن سۇرادى. جاناشىر جانداردىڭ ارقاسىندا ءۇش بولمەلى پاتەرگە يە بولدى. بۇل جاي دا ەركىندى قاناتتاندىرا ءتۇستى. بىردە ءوزى ءتارىزدى تاعدىردىڭ تالكەگىنە تۇسكەن كوكشەتاۋداعى «اقنيەت» مۇگەدەكتەر قوعامدىق بiرلەستiگiنiڭ ءتورايىمى قىمبات دوسماعانبەتوۆا سپورتپەن اينالىسۋ تۋرالى كەڭەس بەرگەن. مىنە, سودان بەرى مىلتىق اتۋمەن شۇعىلدانىپ كەلەدى. وبلىس ورتالىعىنداعى №4 ورتا مەكتەپ عيماراتىندا «مەرگەن» سپورت كلۋبى بار. وسى كلۋبتا جاتتىعادى. 2022 جىلى قازاقستان چەمپيوناتىندا توپ جاردى. 2023 جىلى پاراليمپيادالىق ويىنداردا ءبىرىنشى ورىنعا يە بولدى. بۇل جولى ءۇندىستاندا قازاق ەلىنىڭ اتىن شىعاردى. 619 ۇپاي جيناپتى, ال الەمدىك رەكورد – 631 ۇپاي.
– سپورتتىق كەرەك-جاراعىمىز تۇگەل بولسا, نامىستى قولدان بەرمەس ەدىك, – دەيدى سپورتشىنىڭ ءوزى. – باعزى زاماندا الاشتىڭ قۇرالايدى كوزگە اتقان مەرگەندەرى جاققا جەبەنى سالىپ تۇرىپ «تارتا الماسام – ماعان سەرت, تيمەي كەتسەڭ – ساعان سەرت» دەيدى ەكەن عوي. بىزدە دە سولاي. وسى جولى وركەنيەتتى ەلدەردىڭ سپورتشىلارىن كورىپ قىزىققانىمىزدى نەسىن جاسىرايىق. ستاندارتقا ساي سپورتتىق كيىمى, اتاتىن مىلتىعى مەن تاپانشاسى, وعىنا دەيىن وزگەشە.
اتتىعا ەرىپ جارىسسا دا كەۋدەسىندە نامىس وتى جانعان كوكشەتاۋلىق سپورتشى بايگە سوڭىندا شاڭ قاۋىپ قالماي, الدىڭعى لەكتەن كورىنگەن. جالاۋى جەلبىرەپ كەلگەن سپورتشىنى كوكشەتاۋلىق تىلەكتەس قاۋىم كۇرە جولدىڭ بويىنداعى قۇلاگەر ەسكەرتكىشىنىڭ جانىنداعى ات ارقاسىنداي الاڭقايدا قارسى الدى. جاتتىقتىرۋشىسى ءمۇسىلىم سارسەمبەكوۆ قيانداعى جارىستىڭ قالاي وتكەنىن تاراتىپ ايتىپ بەردى. تۋعان اۋىلى قاراوزەكتەن جەتكەن قاۋىم استىنا ات مىنگىزىپ, يىعىنا شاپان جاپتى. جازعى پاراليمپيادا ويىندارىندا جەڭىسكە جەتۋدى تىلەدى. كوزدەگەنى ءمۇلت كەتپەيتىن سۇرمەرگەن نىساناسىنا ءدوپ تيگىزەرىنە ءبىز دە سەندىك. ەركىننىڭ نىساناسى مىلتىقتىڭ قاراۋىلىنا ىلىنەتىن كادىمگى نىسانا عانا ەمەس, ءوز بويىنداعى قاجىر مەن قايراتتىڭ, ەرلىك پەن ورلىكتىڭ جاس تولقىننىڭ بويىنا دارىتسام دەگەن ادال نيەتى. ءبىز سۇرمەرگەننىڭ بۇل جولدا دا ءمۇلت كەتپەيتىنىنە كامىل سەندىك.
كوكشەتاۋ
