جالپى, قۇرىلتاي مۇشەلەرىنىڭ جىلىنا ءبىر رەت القالى جيىندا باس قوسۋى يگى داستۇرگە اينالدى. اسىرەسە جاڭارۋ مەن جاڭعىرۋ كەزەڭىندە ءوتىپ جاتقان باسقوسۋدا ەلدىڭ دامۋى جولىندا جاڭا مىندەتتەر جۇكتەلىپ, جاڭا ماقساتتار ايقىندالاتىنى انىق.
قۇرىلتاي جيىنىندا مەملەكەت باسشىسى ەل تۇتاستىعى زيالى قاۋىم بىرلىگىنەن باستالاتىنىن ايتتى. «ەڭ الدىمەن, حالىقتىڭ بەرەكە-بىرلىگىن ساقتاۋ ەلدىگىمىز ءۇشىن اسا ماڭىزدى. بۇل تۋرالى ۇنەمى ايتىپ جۇرگەنىمدى بىلەسىزدەر. ىنتىماعى جاراسقان, ورتاق ماقساتقا ۇيىسقان ۇلت ەشقاشان ۇتىلمايدى. ەشتەڭەدەن قۇر قالمايدى. بۇل ىستە زيالى قاۋىم ايرىقشا ءرول اتقارادى. اسىرەسە ەلگە ءسوزى وتەتىن اعا بۋىننىڭ ورنى بولەك. ولار – قازاقتىڭ قايماعى, ۇلتتىڭ ماقتانىشى. ەلدىڭ تۇتاستىعى زيالى قاۋىمنىڭ بىرلىگىنەن باستالادى. ياعني الدىمەن ەل اعالارىنىڭ اراسىندا اۋىزبىرشىلىك بولۋى كەرەك. ولار ۇرپاققا ونەگە بولاتىن كەسەك اڭگىمە ايتۋى قاجەت», دەدى مەملەكەت باسشىسى.
پرەزيدەنت سونداي-اق كورنەكتى تۇلعالار ءبىرىن-ءبىرى مويىنداپ, ءوزارا قۇرمەت كورسەتە بىلسە, ۇلتىمىز ۇيىسا تۇسەتىنىن جەتكىزدى. ونوماستيكا سالاسىندا بەلگىلى تاريحي تۇلعالارمەن قاتار, جالپىۇلتتىق قۇندىلىقتار دا نازاردان تىس قالماۋعا ءتيىس ەكەنىن اتاپ ءوتتى. اتا-باباسىن ۇلىقتاۋدى سۇراپ ۇجىمدىق حات جازۋدى ادەتكە اينالدىرىپ جۇرگەندەر جايىندا دا ءسوز ەتتى.
«كەيىنگى كەزدە اتا-باباسىنىڭ, جەرلەسىنىڭ ەسىمىن ۇلىقتاۋدى سۇراپ, ۇجىمدىق حات جازۋ ادەتكە اينالىپ بارادى. اتاسىنا ەسكەرتكىش قويۋدى, كوشەگە اتىن بەرۋدى وتىنەتىندەر كوبەيدى. بۇل – جاعىمسىز جاعداي. مۇنداي ۇستانىمدار ەلىمىزدىڭ ءبىرتۇتاس يدەولوگيالىق كەڭىستىگىنە زيان كەلتىرەدى. ۇرپاق تاربيەسىنە كەسىرىن تيگىزەدى. ءتىپتى شەتەلدە ءبىزدى كونە زامانعا جانە كەڭەستىك كەزەڭگە قاتىستى مونۋمەنتتەر قاپتاعان «ەسكەرتكىشتەر ەلى» دەپ ايتاتىن بولدى», دەدى پرەزيدەنت.
راسىندا, ءاربىر ادام ءۇشىن اتا-باباسىن قۇرمەتتەۋ – پارىز. رۋحىنا تاعزىم ەتىپ, اس بەرسىن. بىراق بۇل ماسەلەنى ساياسيلاندىرىپ جىبەرۋگە بولمايدى.
ۇلتتىق قۇرىلتاي جيىنىندا ءسوز بولعان ەل بولاشاعىنا باعىتتالعان جانە بۇگىنگى كۇننىڭ وزەكتى ماسەلەسىنە اينالعان وزگە دە ماسەلەلەر وڭتايلى شەشىم تابادى دەپ سەنەمىن.
ۇلاسبەك سادىبەكوۆ,
ءماجىلىس دەپۋتاتى
