فوتو: gov.kz
ناۋرىز – تۋىستىق بايلانىستاردى ساقتاۋعا جانە قادىرلەۋگە ۇندەيتىن وتباسىلىق مەرەكە. 17 ناۋرىزدىڭ تاقىرىبى وتباسى ينستيتۋتىنىڭ ماڭىزدىلىعىمەن بايلانىستى بولعاندىقتان, تۋىستىق قارىم-قاتىناستاردى نىعايتۋعا سەبەپ بولادى. وسى باعىتتا مۋزىكالىق جاس كورەرمەن تەاترىندا 14 وتباسى جەمىستى ەڭبەك ەتىپ جاتىر. شىعارماشىلىق الەمىندە ولاردىڭ وزىندىك قولتاڭبالارى بار. سونداي جۇپتاردىڭ ءبىرى – تەاتردىڭ بەلدى اكتەرى سالامات مۇقاشەۆ پەن تەاتر قىزمەتكەرى ايدانا ەڭگەباي. بۇگىندە ەكى ۇل تاربيەلەپ وتىرعان جاس جۇپتىڭ كىشى ۇلدارى ءالي-احمەت ءبۇلدىرشىننىڭ تۇساۋى كەسىلدى.
«تەاتر تەك مادەنيەت ورتاسى عانا ەمەس, شىن مانىندە تەاتر شاڭىراقتىڭ ءرولىن اتقارىپ جاتىر. قويىلىم بارىسىندا ءبىز كورەرمەنگە وتباسى قۇندىلىقتارىن ناسيحاتتاي وتىرىپ, جانۇياداعى سىيلاستىق, مەيىرىمدىلىك سەكىلدى ىزگى سەزىمدەردىڭ بولۋىن جەتكىزەمىز. تەاتر ارتىستەرىنىڭ وتباسىنداعى قۋانىش, توي, تۇساۋكەسەر, شىلدەحانا سياقتى راسىمدەردىڭ بارلىعى ساحنادا كورەرمەن الدىندا وتكىزىلەدى. ۇجىمداعى جيىرما سەگىز جاننىڭ ۇيدە دە, تۇزدە دە بىرگە بولىپ, جاستارعا ۇلگى كورسەتۋى ارينە قۋانتادى», دەدى مۋزىكالىق جاس كورەرمەن تەاترىنىڭ ديرەكتورى اسحات ماەميروۆ.
مەرەكەلىك ءىس-شاراعا جينالعان كورەرمەندەر تەاترداعى تاماشا ءساتتىڭ كۋاگەرى بولىپ, جاس وتباسىلارمەن بىرگە قۋاندى. ءبۇلدىرشىننىڭ تۇساۋى كەسىلگەننەن سوڭ, شاشۋ شاشىلىپ, اسحات ماەميروۆ اق باتاسىن بەرىپ, ىزگى تىلەگىن جەتكىزدى. جيىن بارىسىندا تاعدىر توعىستىرعان جۇپتار ونەرلەرىن ورتاعا سالدى.
«قازاقتىڭ ۇيىتقىسى – شاڭىراق. ءومىر جولىندا سۇرىنبەي, ەشكىمنىڭ الا ءجىبىن اتتاماي, كوكتەي ءوسىپ-ءونىپ, ءومىرى بەرەكەلى بولسىن دەگەن نيەتپەن بالامىزدىڭ تۇساۋكەسەر ءراسىمىن كيەلى ساحنادا وتكىزدىك. وتباسىمىز دا تەاترمەن بىرگە جاساپ كەلەدى. ءبىزدى توعىستىرعان – ونەر. ەكەۋمىزدىڭ ونەرگە دەگەن شىنايى ماحابباتىمىز بولار, شىعارماشىلىق جولىمىزدا دا ءبىر-بىرىمىزگە دەمەۋ بولامىز», دەدى تەاتر اكتەرى سالامات مۇقاشەۆ.
