تاشكەنتتە وزبەكستان پرەزيدەنتى شاۆكات ميرزيوەۆ قازاقستان ۇكىمەتىنىڭ باسشىسىن قابىلدادى. كەزدەسۋ بارىسىندا قازاق-وزبەك قارىم-قاتىناستارى جوعارى دەڭگەيدەگى سەنىم مەن ءوزارا تۇسىنىستىككە نەگىزدەلگەن ستراتەگيالىق ارىپتەستىكتىڭ جارقىن ۇلگىسى ەكەنى اتاپ ءوتىلدى. وتكەن جىلدىڭ قورىتىندىسى بويىنشا قازاقستان مەن وزبەكستان اراسىنداعى ەكىجاقتى تاۋار اينالىمى 4,5 ملرد دوللاردى قۇرادى. ەكى ەل ۇكىمەتتەرى تاۋار اينالىمىن ودان ءارى ارتتىرۋ ءۇشىن ينۆەستيتسيالىق جانە ونەركاسىپتىك جوبالاردى ىسكە اسىرۋ بويىنشا جۇيەلى جۇمىس جۇرگىزىپ كەلەدى.
ءوز كەزەگىندە وزبەكستان پرەمەر-ءمينيسترى ابدۋللا اريپوۆپەن جۇرگىزىلگەن ۇكىمەتتىك دەڭگەيدەگى كەلىسسوزدەر ساۋدا-ەكونوميكالىق, ينۆەستيتسيالىق, سۋ-ەنەرگەتيكالىق, ترانزيتتىك كولىك جانە مادەني ىنتىماقتاستىقتى كەڭەيتۋ, سونداي-اق جەتكىزىلەتىن تاۋارلار نومەنكلاتۋراسىن كەڭەيتۋ ارقىلى اۋىل شارۋاشىلىعى سالاسىنداعى ءوزارا ءىس-قيمىلدى نىعايتۋ بويىنشا قابىلدانىپ جاتقان شارالارعا ارنالدى.
«ەكى ەلدىڭ پرەزيدەنتتەرى قازاق-وزبەك ىنتىماقتاستىعىن ساپالى جاڭا دەڭگەيگە شىعارۋ مىندەتىن قويدى. تاۋار اينالىمىن ارتتىرۋ ءۇشىن زور الەۋەت بار ەكەنىن كورىپ وتىرمىز, سونداي-اق ەكىجاقتى جانە كوپجاقتى فورماتتارداعى ءوزارا ءىس-قيمىلدىڭ جوعارى ناتيجەلەرىنە جەتۋ ءۇشىن بارلىق قاجەتتى كۇش-جىگەردى جۇمىلدىرامىز», دەدى و.بەكتەنوۆ.
ءوز تاراپىنان ابدۋللا اريپوۆ ەكى مەملەكەت باسشىلارى دەڭگەيىندەگى سەنىمدى جانە دوستىق قاتىناستار ستراتەگيالىق ارىپتەستىك پەن وداقتاستىقتى نىعايتۋدىڭ ماڭىزدى فاكتورى ەكەنىن ايتتى.
«ەكى ەلدىڭ كوشباسشىلارى قازاقستان مەن وزبەكستان اراسىنداعى كوپجوسپارلى قاتىناستاردى ودان ءارى كەڭەيتۋ بويىنشا ناقتى مىندەتتەردى ايقىندادى. وسى مىندەتتەردى ورىنداۋ ءۇشىن بارلىق قاجەتتى شارانى قابىلداۋعا دايىن ەكەنىمدى بىلدىرەمىن», دەدى ا.اريپوۆ.
تاراپتار ونەركاسىپتىك كووپەراتسيا سالاسىنداعى ەلەۋلى پروگرەستى اتاپ ءوتتى جانە ونى ءارى قاراي دامىتۋعا زور الەۋەت بار ەكەنىن اتاپ ءوتتى. قازىرگى ۋاقىتتا ونەركاسىپتىك كووپەراتسيا اياسىندا 13,3 مىڭنان استام جۇمىس ورنىن قۇرا وتىرىپ, جالپى سوماسى 2,6 ملرد دوللار بولاتىن 60 جوبا ىسكە اسىرىلىپ جاتىر. قوسىمشا 43 جوبانىڭ پەرسپەكتيۆاسى دا جوعارى بولىپ وتىر. ەكىجاقتى ساۋدا الەۋەتىن ودان ءارى كەڭەيتۋدە «ورتالىق ازيا» حالىقارالىق ونەركاسىپتىك كووپەراتسيا ورتالىعىنا ماڭىزدى ءرول بەرىلەدى. سونىمەن قاتار ەكى ەل اراسىندا اۋىل شارۋاشىلىعى سالاسىندا تولىق ءوزارا تۇسىنىستىك جولعا قويىلعان.
كەلىسسوزدەر بارىسىندا قازاقستان ۇكىمەتىنىڭ باسشىسى وڭىردەگى ترانزيتتىك كولىك الەۋەتىن ودان ءارى ارتتىرۋ قاجەتتىگىن ايتتى. سونداي-اق سۋ پايدالانۋ سالاسىنداعى ءوزارا ءىس-قيمىلعا ەرەكشە نازار اۋدارىلدى. وعان قوسا ولجاس بەكتەنوۆ قازاقستاندىق تاراپتىڭ وزبەكستانعا 255 پوزيتسيا بويىنشا 500 ملن دوللار سوماسىنا ەكسپورتتىق جەتكىزىلىمدەردى كەڭەيتۋگە دايىن ەكەنىن اتاپ ءوتتى.
كەلىسسوزدەر قورىتىندىسىندا ولجاس بەكتەنوۆ پەن ابدۋللا اريپوۆ قازاقستان مەن وزبەكستان ۇكىمەتتەرىنىڭ ەكىجاقتى ءوزارا ءىس-قيمىلدىڭ بارلىق سپەكترى بويىنشا اراداعى ىنتىماقتاستىقتى كەزەڭ-كەزەڭمەن دامىتۋعا بار كۇش-جىگەردى سالۋعا دايىن ەكەنىن راستادى.
جۇمىس ساپارى بارىسىندا قازاقستان پرەمەر-مينيسترىنە كەدەندىك رەسىمدەۋ ورتالىعىنىڭ ەلەكتروندىق دەكلاراتسيالاۋعا كوشۋ ارقىلى اكىمشىلەندىرۋدى جەتىلدىرۋ سالاسىنداعى تاجىريبەسى كورسەتىلدى.
سونداي-اق ولجاس بەكتەنوۆ Texnopark-قا بارىپ, ونەركاسىپتىك, ەلەكتروندىق, قۇرىلىس ونىمدەرىن, ونەركاسىپتىك جانە كوممۋنالدىق ەنەرگەتيكا جابدىقتارىن, ونىڭ ىشىندە ليفتىلەر مەن ەسكالاتورلاردى جوعارى تەحنولوگيالىق ءوندىرۋ ۇدەرىسىمەن تانىستى.
