اۋقىمدى جانە ماعىنالى جيىننىڭ الدىندا ءار باعىتتا بىرنەشە سەكتسيالىق وتىرىس وتكىزىلىپ, قۇرىلتاي مۇشەلەرىنىڭ ءتۇرلى تاقىرىپتاعى پىكىرلەرى تىڭدالدى. ادام قۇقىن قورعاۋ, وتباسىلىق زورلىق-زومبىلىقتارعا توسقاۋىل قويۋ, ءماسليحاتتاردىڭ ءرولىن ارتتىرۋ, جەرگىلىكتى قوعامدىق كەڭەستەردى ناعىز حالىقتىڭ وكىلدى ورگاندارىنا اينالدىرۋ تۋرالى ناقتى پىكىرلەر ايتىلدى. مەملەكەت باسشىسى قاسىم-جومارت توقاەۆ قۇرىلتايدا كوپشىلىك كۇتكەندەي ەلىمىزدىڭ بولاشاعى, تاۋەلسىزدىگىمىزدىڭ باياندىلىعى جولىندا جاسالىنۋعا ءتيىس ءبىرشاما باستامانى تىلگە تيەك ەتتى. دىنىمىزگە, تىلىمىزگە قاتىستى ءبىراز ماسەلە اشىق ايتىلدى.
اتا-بابالارىمىزدىڭ تاريحىمەن بىرگە جالعاسىپ كەلە جاتقان دىنىمىزدەن اينىماي, مازھابىمىزدىڭ ماقساتىن بۇزباي, ۇلتتىق ناقىشتارىمىزعا لايىق كيىم ۇلگىسىنەن تايماي, يسلام ءدىنىنىڭ تالاپتارىنا بەرىك بولۋعا بولاتىندىعىن جەتكىزدى. شىندىعىندا دا ءار ادامنىڭ يمانى – جۇرەگى مەن تىلەگىندە. سونىمەن بىرگە مىڭداعان جىل بويى حالقىمىزدىڭ داستۇرىمەن بىرگە جاساپ كەلە جاتقان ءابۋ حانيفا مازھابى ۇستانىمىنان تايماۋىمىز كەرەكتىگىن پرەزيدەنت ەرەكشە ايتتى. قازاق ەلىنە يسلامدى تاراتىپ, ورنىقتىرعان ياساۋي بابامىزدىڭ رۋحاني قۇندىلىقتارىن دارىپتەۋدىڭ تاريحي ءمانى زور ەكەنىن, ونىڭ كەسەنەسىنە الەمگە ايگىلى جادىگەر رەتىندە ەرەكشە كوڭىل ءبولۋ كەرەگىن, ءتىپتى جاتقان جەرىندەگى كوك تاستىڭ جامىلعىشىن قالپىنا كەلتىرۋ تۋرالى تاپسىرماسى ەلدى ەلەڭ ەتكىزەتىن جاڭالىق بولدى دەپ ەسەپتەيمىز.
ال قازاق ءتىلى قازىرگى زامانعا لايىق ەكونوميكا, ءوندىرىس, تەحنيكا مەن تەحنولوگيا تىلىنە اينالۋعا بارىنشا مۇمكىندىگى بار ەكەنىن پرەزيدەنت انىق ايتتى. مەملەكەت باسشىسىنىڭ باستامالارى اراسىنان حالقىمىز ءۇشىن, اسىرەسە جاستارىمىز ءۇشىن بەس جامان ادەتتەن قۇتىلىپ, التى قۇندىلىققا ۇمتىلۋ قاجەتتىگى تۋرالى باعدارلامالىق سوزدەرىن ەرەكشە اتاپ وتكىم كەلەدى. ۇكىمەت پەن ۇكىمەتتىك ورگاندارعا وزدەرىنىڭ جۇمىستارىن دا, مەملەكەتتىك باعدارلامالاردى دا وسىعان سايكەستەندىرۋ تۋرالى تاپسىرمالار دا بەردى.
وسى ايتىلعاننىڭ بارلىعى ادال ادام فورمۋلاسىنىڭ قاعيداتتارىنا تولىق سايكەس كەلەدى. ول – ادىلەتتى قازاقستاندى قالىپتاستىرۋدىڭ ايقىن جولى.
ءالي بەكتاەۆ,
سەنات دەپۋتاتى
