كورمەنىڭ اشىلۋىندا وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ميرا قازبەكوۆا ۇلتتىق قولونەر ءداستۇرىن دامىتقان جاڭاشىل جانر شەبەرىنىڭ جۇمىستارى وسىعان دەيىن دە ەلىمىزدىڭ ءار تۇكپىرىندە كورەرمەن نازارىنا ۇسىنىلعانىن اتاپ ءوتتى. «مەملەكەت باسشىسىنىڭ كرەاتيۆتى يندۋستريانى دامىتۋ باعىتىنداعى تاپسىرماسىن ورىنداۋ ماقساتىندا بىلتىر عانا اشىلعان «اناعا تاعزىم» ورتالىعى جۇيەلى جۇمىس جاساپ تۇر. ورتالىقتىڭ ءبىرىنشى قاباتىندا جەرگىلىكتى شەبەرلەردىڭ كورمەلەرى, ءتۇرلى جارمەڭكەلەر ۇيىمداستىرىلىپ كەلەدى. ونداعى «قازاق ەلىنىڭ ۇلى انالارى» كارتيناسى اۆتورلارىنىڭ ءبىرى بۇگىنگى كورمە يەسى داۋلەتبەك تويشىباەۆ», دەدى باسقارما باسشىسى.
شاعىن كىلەمدەر بەتىنە تۇسكەن ساق سۇلۋى, سىعاناق ارۋى, بەگىم انا, قىز جىبەك, دينا كۇيشى, جالپى 12 كىلەم-كارتيناداعى بەينەنىڭ ءبارى سىر قىزدارىنىڭ ارنايى تۇسكەن فوتولارىنان كوشىرىلگەن. «جالپى, وسى جۇمىسىم ارقىلى مەن قازاقتىڭ بەلگىلى انالارىنىڭ گالەرەياسىن زاماناۋي ادىسپەن جاساعىم كەلدى. جۇرت قىزىعۋشىلىعى مەن سۇرانىسقا قاراعاندا تالابىم تەرىس بولماعان سياقتى», دەيدى رەاليست سۋرەتشى.
جەرگىلىكتى قورقىت اتا ۋنيۆەرسيتەتىن بىتىرگەن ول وسى ۋاقىتقا دەيىن بىرقاتار بايقاۋدىڭ باس جۇلدەسىن يەلەنىپ, جۇمىستارى رەسپۋبليكالىق, حالىقارالىق كورمەلەرگە قويىلعان. زاماناۋي سۋرەتشى سترينگ-ارت ءادىسى ارقىلى قالا ساۋلەتىن كرەاتيۆتى مۋرالدارىمەن بايىتىپ جۇرگەن ونەر
يەسى.
قىزىلوردا
