بىلتىر تۇركىستاندا وتكەن ۇلتتىق قۇرىلتاي وتىرىسىندا پرەزيدەنت قاسىم-جومارت توقاەۆ ەلدىڭ جاڭا يدەولوگيالىق ستراتەگياسىن ىسكە اسىرۋ جونىندەگى ناقتى قادامداردى بەلگىلەپ بەرگەن ەدى. ونىڭ باستى باسىمدىقتارى رەتىندە مەملەكەت باسشىسى ۇلتتىڭ جاڭا ساپاسىن قالىپتاستىرۋدى, ۇلتتىق قۇندىلىقتار جۇيەسىن نىعايتۋدى ايقىندادى. بۇل – ادەپ پەن ءپاتريوتيزمنىڭ مۇراتتارى, ەڭبەك پەن بىلىمگە بەرىلۋ, زاڭدىلىق پەن ءتارتىپتى ساقتاۋ, گۋمانيزم مەن جاۋاپكەرشىلىك.
مەملەكەت باسشىسى اتاپ وتكەندەي, ۇلتتىق قۇرىلتاي قوعامدىق ديالوگتىڭ بىرىڭعاي ينستيتۋتسيونالدىق مودەلىن قالىپتاستىرىپ, حالىق پەن بيلىك اراسىن بايلانىستىراتىن دانەكەر, وسى ماقساتتارعا جەتۋ جولىنداعى قوعامدىق بىرىگۋدىڭ جانە ناقتى قادامداردىڭ جاڭا ستراتەگياسىن ازىرلەۋدىڭ نەگىزگى تۇعىرناماسى بولۋعا ءتيىس. سەبەبى بۇگىندە قوعامنىڭ بىرلىگى عانا ەلىمىزدىڭ دامۋىنا سەرپىن بەرە الادى, ءبىز تەك كۇش بىرىكتىرگەندە عانا ادىلەتتى قازاقستاندى قۇرا الامىز.
ۇلىتاۋ جانە تۇركىستاندا وتكەن ۇلتتىق قۇرىلتايدىڭ الدىڭعى ەكى وتىرىسىنىڭ ناتيجەسىندە ورتاق قۇندىلىقتارىمىزدى, ونىڭ ىشىندە ساياسي سيپاتتاعى جانە الەۋمەتتىك-گۋمانيتارلىق باعىتتاعى ماسەلەلەردى نىعايتۋ جانە ىلگەرىلەتۋ جونىندە ۇسىنىستار ازىرلەندى. ەڭ باستىسى, ءبىز ۇلتتىق قۇندىلىقتاردى ىلگەرىلەتۋ, جاڭا قازاقستاندىق بىرەگەيلىكتى قالىپتاستىرۋ بويىنشا ناقتى قادامدار جاساي الدىق دەگەن سەنىمدەمىن.
ۇلتتىق قۇرىلتاي ءوزىنىڭ اينالاسىنا ۇلكەن ينستيتۋتسيونالدىق الەۋەتى بار بارلىق وبلىستىق قوعامدىق كەڭەستى, سونداي-اق ازاماتتىق قوعامنىڭ بەلسەندى وكىلدەرىن, قوعامدىق پىكىر كوشباسشىلارىن, عالىمداردى شوعىرلاندىردى. بۇل ينستيتۋتتىڭ جۇمىسىنا تەك ساياسي قايراتكەرلەر مەن زيالى قاۋىم وكىلدەرىنىڭ ەمەس, سونىمەن قاتار ەلدىڭ دامۋ ماسەلەلەرىنە بەيجاي قارامايتىن ازاماتتاردىڭ, ءوندىرىستىڭ, ءىرى, شاعىن جانە ورتا بيزنەس وكىلدەرىنىڭ دە قوسىلعانى ماڭىزدى. بۇل ديالوگتە پليۋراليزم بار ەكەنىن كورسەتەدى جانە قوعامدىق پىكىرتالاستىڭ ساپاسى مەن وسى الاڭنىڭ تيىمدىلىگىن ايتارلىقتاي ارتتىرادى.
ءارتۇرلى ءدىن, مەنتاليتەت, ەتنوس وكىلدەرىنەن تۇراتىن قوعامنىڭ ارالۋاندىلىعى ۇلتتىق قۇرىلتايدان شەت قالعان جوق. وسىنىڭ ارقاسىندا ءبىز بۇگىنگى قوعامدى تولعاندىراتىن ەڭ وزەكتى ماسەلەلەر بويىنشا يدەيالار مەن پىكىرلەردىڭ تولىق سپەكترىن تىڭداي الامىز. ويتكەنى ديالوگكە قاتىسۋشىلاردىڭ بارلىعىنىڭ ورتاق مۇددەسى بار, بۇل – مەملەكەتىمىزدى دامىتۋ جانە ەل تاۋەلسىزدىگىن نىعايتۋ.
سونىمەن قاتار Quryltai ارنايى ءموبيلدى قوسىمشاسىن قۇرۋ بارلىق وتانداسىمىزعا قوعامنىڭ ماڭىزدى ماسەلەلەرىن تالقىلاۋعا قاتىسۋعا مۇمكىندىك بەردى. ۇلتتىق قۇرىلتاي مۇشەلەرىنەن 400-گە جۋىق ۇسىنىس ەنگىزىلدى, ولاردىڭ 40-قا جۋىعى وتىرىس كەزدەرىندە ايتىلدى.
ءبىز بۇگىن وسى جۇمىستىڭ ناتيجەسىن كورىپ وتىرمىز. بۇل قابىلدانعان زاڭ جوبالارىندا, ايەلدەر مەن بالالاردىڭ قۇقىقتارىن قورعاۋعا, وتانداستارىمىزدىڭ دەنساۋلىعىن قورعاۋعا, تاريحي قۇندىلىقتاردى ناسيحاتتاۋعا قاتىستى تالقىلاناتىن زاڭنامالىق باستامالاردا كورىنىس تابادى. قازىر وسى ماسەلەلەر بويىنشا سەناتتىڭ بارلىق كوميتەتىندە اۋقىمدى جۇمىس جۇرگىزىلىپ جاتىر, ناتيجەسى قوعامدى دامىتۋعا جانە وتانداستارىمىزدىڭ ءال-اۋقاتىن ارتتىرۋعا باعىتتالعان زاڭدار بولاتىنى ءسوزسىز.
بيبىگۇل جەكسەنباي,
سەنات دەپۋتاتى, ۇلتتىق قۇرىلتاي مۇشەسى
