كۇنى كەشە 14-23 ناۋرىز ارالىعىندا وتكىزىلەتىن ناۋرىزناما ونكۇندىگى جاريالاندى. ناۋرىزدىڭ بىرەگەي لوگوتيپى بەكىتىلدى. مەرەكەنىڭ باسى, كورىسۋ كۇنىنىڭ قارساڭىندا ۇلتتىق قۇرىلتاي جيىنى وتەيىن دەپ تۇر. ياعني جىل باستاماسى رەتىندە دە ماڭىزدى, مازمۇندى جيىن بولارى انىق.
جىل باسىندا «Egemen Qazaqstan» گازەتىنە بەرگەن سۇحباتىندا مەملەكەت باسشىسى ناۋرىز مەيرامىنا ەرەكشە ءمان بەرۋ كەرەكتىگىن, بيىلدان باستاپ مەرەكەنى جاڭاشا تويلاۋ قاجەتتىگىن ايتقان ەدى. سەبەبى ءبىرتۇتاس مادەني كەڭىستىك قۇرۋ, رۋحاني قۇندىلىقتارىمىزدى ناسيحاتتاۋ تۇرعىسىندا ماڭىزدى قادامدار جاساۋ – كەزەك كۇتتىرمەس ءىس-شارالار. سوندىقتان قۇرىلتاي جيىنىندا تىڭ يدەيالار مەن ۇسىنىستار ايتىلادى دەگەن ويدامىن. ۇلتتىق قۇرىلتايدا نەگىزىنەن رۋحاني-مادەني قۇندىلىقتار, الەۋمەتتىك-گۋمانيتارلىق سالالارداعى ماسەلەلەر باسا ايتىلىپ, شەشىلۋ جولدارى قاراستىرىلىپ كەلە جاتقانى بەلگىلى. بىلتىرعى تۇركىستانداعى جيىننان باستاپ ونىڭ باعىت-باعدارى مەن جۇمىسى الدەقايدا جاڭا سەرپىن الدى. ياعني ناقتى باعىتتاردىڭ اياسىندا جىلجي باستادى. ءبىرىنشىسى – ازاماتتىق قوعام, ەكىنشىسى – مادەنيەت, رۋحانيات, ونەر, ءۇشىنشىسى – ءبىلىم مەن عىلىم, ءتورتىنشىسى – الەۋمەتتىك سالا جانە وڭىرلەردى دامىتۋعا باعىتتالعان. وسى بويىنشا ءتيىستى مينيسترلىكتەر اقپارات ۇسىنىپ, ۇلتتىق قۇرىلتاي مۇشەلەرىمەن كەڭ ءارى اشىق تالقىلاۋلار وتكىزدى, ءارتۇرلى ۇسىنىس بەرىلدى.
سونداي-اق مەملەكەت باسشىسى بىلتىر قۇرىلتاي جۇمىسىمەن قوسا, ەلىمىزدەگى تالداۋ ورتالىقتارى مەن زەرتتەۋ ينستيتۋتتارىنىڭ الەۋەتىن ءتيىمدى پايدالانۋ تۋرالى ايتقان بولاتىن. ءبىز دە مادەنيەت جانە اقپارات مينيسترلىگىنە قاراستى قوعامدىق دامۋ ينستيتۋتى رەتىندە بۇل جۇمىسقا ۇلەس قوسىپ كەلەمىز. ءوزىمىزدىڭ الەۋمەتتىك ساۋالناما دەرەكتەرىن, زەرتتەۋ ناتيجەلەرىن ۇسىنۋ ارقىلى ساياسي شەشىمدەردىڭ جۇمىسىن جانداندىرۋدى الدىمىزعا مىندەت قويىپ وتىرمىز.
جوعارىدا اتالعان سۇحبات بارىسىندا پرەزيدەنت: «ۇلتتىق قۇرىلتاي جيىنىن كەيىنگە قالدىرماي, ەرتە كوكتەمدە وتكىزۋىمىز كەرەك», دەگەن ەدى. جيىندا بىرقاتار تىڭ يدەيا ايتىلادى, بۇل ۇسىنىستار ەرتەڭ زاڭ جوبالارىنا كىرەدى. ويتكەنى قۇرىلتاي مۇشەلەرىنىڭ وزدەرى ءتۇرلى توپتاردان جينالعاندىقتان, ءارتۇرلى يدەيالاردى جان-جاقتى تالقىلاۋعا مۇمكىندىك مول. سول تۇرعىدا ۇلتتىق قۇرىلتايدى بۇكىل حالىقتان ۇسىنىس, پىكىر جيناۋدىڭ الاڭى دەپ ايتۋعا بولادى.
قازىر ۇلتتىق قۇرىلتاي e-mobile قوسىمشاسىندا جۇمىس ىستەپ تۇر. ونىڭ ىشىندە دە حالىقتىڭ ۇسىنىس-پىكىرىنە ءاردايىم مونيتورينگ جاسالادى. سوندىقتان قۇرىلتاي وتىرىسىن ءار سالاداعى ازاماتتاردىڭ, ءار توپتاعى ادامداردىڭ, جالپى حالىقتىڭ مۇددەسىن جەتكىزەتىن الاڭ دەپ ايتۋعا بولادى. اتىراۋداعى قۇرىلتاي جيىنىندا دا وزەكتى ماسەلەلەر كوتەرىلەدى دەپ سەنەمىز.
ولجاس بەيسەنباەۆ,
قازاقستان قوعامدىق دامۋ ينستيتۋتىنىڭ ساراپشىسى
