ءىس-شارانىڭ اشىلۋىندا عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ توراعاسى گۇلزات كوبەنوۆا نازارباەۆ ۋنيۆەرسيتەتىنىڭ ءبىلىم بەرۋ جۇيەسىندە كوشباسشى دايارلاۋداعى ۇلەسى مول ەكەنىن ايتتى.
72 ساعاتتىق ترەنينگ گيبريدتى فورماتتا ۇيىمداستىرىلىپ, ول ونلاين جانە تالىمگەرلىك سەسسياعا جالعاستى. توپتىق ساباق كەزىندە تىڭداۋشىلاردى وقىتۋ ۇدەرىسىنە تارتۋ ءۇشىن وقىتۋدىڭ بەلسەندى جانە ينتەراكتيۆتى ءادىسى مەن ءتۇرلى تسيفرلىق قۇرالى پايدالانىلدى. سونداي-اق وقۋ ۇدەرىسىنىڭ تيىمدىلىگى ءۇشىن Moodle ءبىلىم بەرۋ پلاتفورماسى قولدانىلدى.
ينتەنسيۆتى كۋرستا پيا كولحو, ەسسي ريۋمين, يوحاننا ەرلينگ, اري پوككا جانە قايرات قۇراقباەۆ سەكىلدى حالىقارالىق جانە وتاندىق ساراپشىلار ءبىلىم بەرۋدەگى كوشباسشىلىقتا جاڭا تەحنولوگيانى قولدانۋعا بايلانىستى تاقىرىپتاردى قوزعادى.
«بۇل سەمينار بىزگە اۋىل مەكتەبىن قالا مەكتەپتەرىنىڭ دەڭگەيىنە جەتۋگە تالپىندىرا ءتۇستى. ءبىز مۇندا ۇجىممەن تىعىز جۇمىس ىستەپ, ءار ادامنىڭ ويى قۇندى ەكەنىن ۇيرەندىك. قاتەلەسۋدەن قورىقپاۋدى تۇسىندىك. ويتكەنى ءبىز بۇعان دەيىن قاتەلەسۋدى ايىپ كورۋشى ەدىك. ەندى اۋىلعا بارعاننان كەيىن وسىندا العان تاجىريبەمدى ارىپتەستەرىممەن بولىسەمىن», دەدى جەتىسۋ وبلىسىنداعى جەتىجال ورتا مەكتەبىنىڭ ديرەكتورى ادىلەت نۇرعاليەۆ.
كۋرس بارىسىندا قاتىسۋشىلار ساراپشىلارمەن بىرگە ءبىلىم بەرۋ سالاسىنا بايلانىستى تاپسىرمانى ورىنداپ, قورىتىندى جوبامەن جۇمىس ىستەدى. ءۇش توپقا بەيىمدەلگەن جاڭا ءبىلىم بەرۋ باعدارلامانى ىسكە اسىرۋدىڭ وزىندىك جول كارتاسى جاسالدى. ماسەلەن, جوعارى وقۋ ورىندارىنىڭ باسشىلارى بولاشاق كوزقاراسقا سايكەس قىزمەتكەرلەر مەن رەسۋرستاردى باسقارۋعا نازار اۋدارسا, ساپانى قامتاماسىز ەتۋ جونىندەگى ۋنيۆەرسيتەت دەپارتامەنتتەرىنىڭ وكىلدەرى جاڭا ءبىلىم بەرۋ باعدارلاماسىنىڭ قاعيداتىنا سايكەس كەلەتىن ساپانى ۇزدىكسىز ىشكى باعالاۋ ۇدەرىسىن قۇرۋعا ءمان بەردى. ال مەكتەپ ديرەكتورلارى جاڭا ءبىلىم بەرۋ باعدارلاماسىنا قاتىستى جوعارى وقۋ ورىندارى مەن مەكتەپتەر اراسىنداعى ىنتىماقتاستىق بايلانىسقا تەرەڭىرەك ءۇڭىلدى.
«ترەنينگتە تالقىلانعان وزەكتى ماسەلەنىڭ ءبىرى – مەكتەپ پەن ۋنيۆەرسيتەت اراسىنداعى بايلانىس. ءبىز وسى ماسەلەنىڭ شەشۋ جولىن ىزدەستىرىپ, ارىپتەستەرمەن وي بولىستىك. مىسالى, مەن ۋنيۆەرسيتەتتىڭ وقۋ بولىمىندە ىستەيمىن. سوندىقتان وسى كۋرستا وقۋ ۇدەرىسىن باسقارۋ, وعان جەتەكشىلىك جاساۋ جانە ۇيىمداستىرۋدا ءبىراز تاجىريبە الدىم. ەندى ونى جۇمىس بارىسىندا قولدانامىن», دەدى ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ قىزمەتكەرى جۇماگۇل قاراباەۆا.
ايتپاقشى, اتالعان ترەنينگ عىلىم جانە جوعارى ءبىلىم مينيسترلىگى مەن وقۋ-اعارتۋ مينيسترلىگى جانە دۇنيەجۇزىلىك بانكتىڭ قولداۋىمەن «پەداگوگيكالىق ءبىلىم بەرۋ مودەلىن ەنگىزۋ جانە ونىڭ مازمۇنىن نىعايتۋ» اتتى اۋقىمدى جوبا اياسىندا ءوتتى. بيىلعى قاڭتار-ماۋسىم ايى ارالىعىندا وسى جوبا شەڭبەرىندە ەلىمىزدەگى جوعارى وقۋ ورىندارى مەن مەكتەپتەردىڭ 2 150 مامانىن بىلىكتىلىك ارتتىرۋ كۋرسىنان وتكىزۋ جوسپارلانعان.
