ءورت ادامداردىڭ سالعىرتتىعىنان, قاۋىپسىزدىك ەرەجەلەرىن ساقتاماۋىنان تۇتانادى. «سوندىقتان ءتىلسىز جاۋدان ۇنەمى ساق بولۋعا شاقىرامىز», دەيدى وبلىستىق تجد باسشىسىنىڭ ورىنباسارى دميتري راستيحين.
جۋىردا عانا «ايمان» اۆتوسەرۆيسىنىڭ الاڭىندا اياقاستى ءورت تۇتاندى. تاڭعى ءتورت جارىمدا باستالعان جالىندى اۋىزدىقتاۋعا ءورت ءسوندىرۋ قىزمەتىنىڭ 14 تەحنيكاسى مەن 46 ادام جۇمىلدىرىلعان. وسىلايشا, ءورت تاڭعى 7-دە عانا تولىق سوندىرىلەدى. جۇمىس ۋاقىتى بولماعاندىقتان, ەشكىم زارداپ شەكپەگەن. الدىن الا جاسالعان تۇجىرىمعا قاراعاندا, ءورت ەلەكتر سىمدارىنىڭ قىسقا تۇيىقتالۋىنان شىققان. بىراق بۇل جەردە دە ادام فاكتورىنىڭ قاتىسى جوق ەمەس, ەلەكتريك سىمداردى قاراپ, اۋىستىرۋعا ءتيىس بولعان.
د.ءراستيحيننىڭ ايتۋىنشا, ءورت كوبىنە جەكەمەنشىك ۇيلەر ورنالاسقان ايماقتاردان شىعادى. بارلىق ءورتتىڭ 74 پايىزى – وسى ۇيلەردىڭ «ۇلەسىندە». ونىڭ كوبى پەش ورناتقاندا تۇرعىنداردىڭ ءورت قاۋىپسىزدىگىن ساقتاماعاندىعىنان بولاتىن كورىنەدى. ماسەلەن, بيىلعى بارلىق 67 ءورتتىڭ 33-ءى پەشتەردىڭ دۇرىس ورناتىلماعاندىعىنان شىققان. بۇرىن پەش ورناتاتىن ارنايى ادامدار بولاتىن, قازىر ونداي مامان جوق. سوندىقتان ءۇي تۇرعىزعاندا تۇرعىندار پەشتى ءوز قالاۋىنشا قالايدى دا, كوبىنە ءورت قاۋىپسىزدىگى ساقتالمايدى.
ەلەكتر قۇرىلعىلارىن پايدالانۋدا ءورت قاۋىپسىزدىگى تالابىن ورىنداماعاننىڭ كەسىرىنەن 25 رەت ءورت شىققان. تۇرمىستىق گازدى پايدالانۋدا دا كەيبىر تۇرعىندار قاۋىپسىزدىكتى ساقتاي بەرمەيدى. بيىلعى ەكى ايدا عانا گازدىڭ جارىلۋىنان 3 رەت ءورت شىققان.
بىلتىر كۇزدە جەكەمەنشىك ۇيدەن ءورت شىعىپ, 20 جاستاعى كەلىنشەك پەن ەكى بالدىرعان ەسىككە ءبىر مەتردەي عانا جەتە الماي, تۇنشىعىپ ولگەن ەدى. لاۋلاعان وتتى تەرەزەسىنەن كورگەن كورشىسى تاڭعى ساعات 9-دا ءورت سوندىرۋشىلەردى شاقىرادى. جالداپ تۇرىپ جاتقان بۇل ۇيدە 40 جاستاعى ايەل ۇلى مەن كەلىنىمەن تۇرعان ەكەن. ۇلىنىڭ ءبىر جارىم جاستاعى جانە ءوزىنىڭ بەس جاستاعى ەكىنشى بالاسى بولعان. ەكى بالدىرعان مەن كەلىنى تۇتىنگە تۇنشىعىپ ولگەن, ال تورگى ۇيدە جاتقان جىگىت تەرەزە ارقىلى سىرتقا شىعىپ ۇلگەرگەن. ايتۋىنشا, ول ايەلىن دە دالاعا سۇيرەپ شىعارماق بولعان, بىراق قۇتقارىپ ۇلگەرە الماعان. ال ءۇي يەسى سول ءتۇنى جۇمىستا بولعان ەكەن. ءورتتىڭ قايدان شىققانى بەلگىسىز, ماماندار ەلەكتر سىمدارىنىڭ قىسقا تۇيىقتالۋىنان بولۋى مۇمكىن دەپ بولجاپ وتىر. ويتكەنى جالىن توبەگە سالىنعان ماتەريالداردى كۇيدىرگەن. ال پەش سول كۇنى جاعىلماعان.
2021 جىلدان بەرى قالالىق جانە اۋداندىق اكىمدىكتەر جەكەمەنشىك تۇرعىن ۇيلەر سەكتورىنا گاز بەن ءتۇتىن شىقسا دابىل بەرەتىن 5 مىڭ ءيىس سەزگىش اپپارات ورناتتى. وسى قۇرىلعى ارقىلى بيىل 5 ادام اجالدان امان قالعان.
قازىر ءورت سوندىرۋشىلەر اكىمدىك وكىلدەرىمەن بىرگە تۇرعىن ۇيلەر سەكتورلارىنا رەيدتەر جۇرگىزىپ, پەشتەردى, ەلەكتر سىمدارىنىڭ جاڭالىعىن, گاز بەن ءتۇتىندى انىقتايتىن اپپاراتتاردىڭ ورناتىلۋىن قاداعالاپ ءجۇر. بىراق ءورت قاۋىپسىزدىگى الدىمەن تۇرعىن ءۇي يەسىنىڭ وزىنە قاجەت. حالىق وسىنى تۇسىنگەندە عانا ءورت قاۋپى ازايادى. ءورت ءسوندىرۋ قىزمەتى وسىنى ەسكەرىپ, بىلتىر باق ارقىلى 483 ماتەريال جاريالاپ, 100 مىڭعا جۋىق جادىناما تاراتقان. سونداي-اق ينتەرنەت رەسۋرستارىندا ءورت قاۋپى تۋرالى 435 اقپارات ورنالاستىرىلعان.
سولتۇستىك قازاقستان وبلىسى
