كونفەرەنتسيادا ەكى كۇن بويى تۇركى الەمىنىڭ تاريحي-مادەني مۇراسىن زەرتتەۋ مەن ساقتاۋعا جانە ونىڭ قازىرگى تۇركى ەلدەرى قوعامىنداعى دامۋدىڭ ءتۇرلى اسپەكتىلەرىنە ىقپالىن تەرەڭىرەك تۇسىنۋگە باعىتتالعان ءتۇرلى تاقىرىپتار قامتىلماق.
شارانىڭ اشىلۋ سالتاناتىندا تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋراليەۆ, ازەربايجان رەسپۋبليكاسىنىڭ مادەنيەت ءمينيسترى ءادىل كارىملي, تۇركى اكادەمياسىنىڭ پرەزيدەنتى شاھين مۇستافاەۆ, اتاتۇرىك اتىنداعى مادەنيەت, ءتىل جانە تاريح جوعارى كەڭەسىنىڭ توراعاسى دەريا ءورس, ازەربايجان رەسپۋبليكاسى مەملەكەتتىك تۋريزم اگەنتتىگىنىڭ توراعاسى فۋاد ناگيەۆ, تۇركيانىڭ يۋنەسكو ىستەرى جونىندەگى ۇلتتىق كوميسسياسىنىڭ توراعاسى ودجال وعىز, حالىقارالىق تۇركى مادەنيەتى ۇيىمىنىڭ (TURKSOY) باس حاتشىسى سۇلتان راەۆ, تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا جانە «يچەري شاھار» مەملەكەتتىك تاريحي-ساۋلەت قورىعى باسقارماسىنىڭ توراعاسى شاھين سەيدزادە ءسوز سويلەدى.
تۇركى اكادەمياسىنىڭ پرەزيدەنتى شاھين مۇستافاەۆ تاريحي-مادەني ەسكەرتكىشتەر مەن مۇرالار نىساندارىن يۋنەسكو قاعيداتتارىن نەگىزگە الا وتىرىپ, قورعاۋ, قالپىنا كەلتىرۋ, دارىپتەۋ جانە ءتيىمدى پايدالانۋدىڭ ماڭىزدىلىعىنا توقتالدى.
تاقىرىپتىق سەسسيالار بارىسىندا حالىقارالىق ۇيىمداردىڭ باسشىلارى, يۋنەسكو ىستەرى جونىندەگى ۇلتتىق كوميسسيانىڭ وكىلدەرى, عالىمدار مەن اكادەميالىق قايراتكەرلەر بولاشاق ۇرپاق ءۇشىن تۇركى الەمىنىڭ تاريحي-مادەني مۇراسىن ساقتاۋ مەن ناسيحاتتاۋدىڭ ماڭىزدىلىعىن اتاپ ءوتتى. سونداي-اق تاريحي ەسكەرتكىش نىسانداردى, جادىگەرلەردى, سالت-داستۇرلەردى, تىلدەر مەن ادەت-عۇرىپتاردى قورعاۋدىڭ قاجەتتىلىگى ايتىلدى.
ءىس-شاراعا قاتىسۋشىلار تۇركى تاريحي-مادەني مۇراسىن تۇگەندەۋدىڭ جانە وسى سالاداعى جۇيەلى ىنتىماقتاستىقتى نىعايتا ءتۇسۋ ءۇشىن قاجەتتى تەتىكتەردى قۇرۋ تۋرالى ۇستانىمدارعا ءبىراۋىزدان قولداۋ ءبىلدىردى.
تاقىرىپتىق تالقىلاۋلارمەن قاتار, ءىس-شارا ازەربايجان ۇلتتىق كىلەم مۇراجايىنداعى «توقىما ونەرىندەگى مۇرا: تۇركىلەردىڭ كيىمدەرى, كىلەمدەرى جانە ويۋ-ورنەكتەرى» كورمەسىنە بارۋ جانە يچەري-شەحەر تاريحي نىساندارىن ارالاپ كورۋ سەكىلدى مادەني باعدارلامالار قاراستىرىلعان.
