اتالعان جوعارى وقۋ ورنىنىڭ جاسۋشالىق بيولوگيا جانە گەنوميكا ينستيتۋتىنىڭ عىلىمي قىزمەتكەرى ءاسيا قۇسايىنوۆا 2013 جىلدان بەرى مولەكۋلالىق گەنەتيكا سالاسىندا ەڭبەك ەتەدى. عالىم رادون مەن اسبەست اسەرىنەن تۋىندايتىن وكپە وبىرى پاتوگەنەزىنىڭ مولەكۋليارلىق-گەنەتيكالىق اسپەكتىلەرىن زەرتتەيدى. ول جاس عالىمدارعا ارنالعان باعدارلامانىڭ ارقاسىندا ءبىر بولمەلى پاتەرگە قول جەتكىزدى.
ء«وز باسپاناڭنىڭ بولۋى ارقاشان تۇراقتىلىق پەن بولاشاققا دەگەن سەنىمدى ۇيالاتادى. جاس عالىمدارعا ارنالعان يپوتەكالىق باعدارلامانىڭ اشىلۋى مەنى قاتتى قۋانتتى. بۇگىن ءبىز ءتيىمدى شارتتارمەن جەكە باسپانا ساتىپ الۋ مۇمكىندىگىنە يە بولدىق», دەيدى ول.
ءىس-شارا بارىسىندا عالىمداردى ۋنيۆەرسيتەت رەكتورى ەرلان سىدىقوۆ پەن «وتباسى بانكى» اق ورتالىق فيليالى ديرەكتورىنىڭ ورىنباسارى جانار ىزىمبەتوۆا قۇتتىقتاپ, ولارعا نەسيە الۋ تۋرالى سەرتيفيكات پەن ەستەلىك سىيلىقتى تابىس ەتتى.
«سوڭعى جىلدارى وتاندىق عىلىمعا بولىنەتىن بيۋدجەت قاراجاتى بىرنەشە ەسە ءوستى. مەملەكەت باسشىسىنىڭ تاپسىرماسى اياسىندا عىلىم قىزمەتكەرلەرىنىڭ الەۋمەتتىك جاعدايىن جاقسارتۋ, ونىڭ ىشىندە تۇرعىن ۇيمەن قامتاماسىز ەتۋ ءۇشىن جاڭا مۇمكىندىكتەر جاسالىپ وتىر. عىلىم جانە جوعارى ءبىلىم مينيسترلىگى جانە «وتباسى بانكى» اق-مەن كەلىسىمگە قول قويىپ, جاس عالىمداردى باسپانامەن قامتاماسىز ەتۋدىڭ ارنايى باعدارلاماسىن ىسكە قوستى», دەدى ە. سىدىقوۆ.
ايتا كەتەيىك, بىلتىر جاس عالىمدارعا تۇرعىن ءۇي ساتىپ الۋعا ارنالعان جەڭىلدەتىلگەن نەسيەلەۋ باعدارلاماسى قولعا الىندى. وعان 40 جاسقا دەيىنگى عالىمدار قاتىسادى.
