سۋرەتتى تۇسىرگەن – ەرلان ومار, «EQ»
وسىعان وراي كەشە پرەزيدەنت جانىنداعى ورتالىق كوممۋنيكاتسيالار قىزمەتىندە ناۋرىز مەيرامىن اتاپ وتۋگە قاتىستى بريفينگ ءوتتى. ءىس-شارادا ءسوز العان مادەنيەت كوميتەتى توراعاسىنىڭ ورىنباسارى ءسابيت بارلىباەۆ اقجولتاي حاباردى جەتكىزدى.
– بيىلدان باستاپ مەملەكەت باسشىسىنىڭ ۇسىنىسىمەن ەلىمىزدىڭ بارلىق وڭىرىندە ناۋرىز مەرەكەسىن جاڭا فورماتتا وتكىزۋ جوسپارلانىپ وتىر. مەرەكەنى 14-24 ناۋرىز ارالىعىندا وتكىزۋ ۇسىنىلدى. ناۋرىزدىڭ بىرەگەي لوگوتيپى بەكىتىلىپ, ەلىمىزدىڭ بارلىق ايماعىنا تارالدى. تاريحي تۇرعىدان العاندا ون كۇنگە جالعاساتىن بۇل ءىس-شارا ناۋرىزناما دەپ اتالادى. ارينە, ۇلىق مەيرام تۋرالى دەرەكتەر ءبىزدىڭ ۇلى فيلوسوفتارىمىز ماحمۇد قاشقاري, ءماشھۇر-ءجۇسىپ كوپەي ۇلى, مۇحتار اۋەزوۆتىڭ ەڭبەكتەرىندە كورسەتىلىپ جازىلعان. ال ەندى ناۋرىزناماعا كەلەتىن بولساق, 14 ناۋرىز – كورىسۋ كۇنى, امال مەرەكەسى دەپ تە اتالادى. بۇل ەلىمىزدىڭ باتىس وڭىرلەرىندە ساقتالعان. بۇگىنگى كۇنى اتالعان مەرەكەنى بارلىق ايماقتاردا تويلاۋ ۇسىنىلدى. 15 ناۋرىز – قايىرىمدىلىق كۇنى دەپ بەلگىلەندى. قوعامعا قايىرىمدىلىق مادەنيەتىن ءسىڭىرىپ, جاناشىرلىق پەن ءوزارا قولۇشىن بەرۋ قۇندىلىقتارىن قالىپتاستىرۋىمىز قاجەت. 16 ناۋرىز – مادەنيەت جانە ۇلتتىق سالت-ءداستۇر كۇنى اتالىپ وتەدى. مادەنيەتىمىز بەن ونەرىمىزدى ناسيحاتتاۋعا ارنالىپ, رەسپۋبليكا بويىنشا ءتۇرلى ءىس-شارا ۇيىمداستىرىلادى. 17 ناۋرىز – شاڭىراق كۇنى دەپ بەلگىلەندى. وتباسىلىق قۇندىلىقتاردى دارىپتەۋگە, بۇل كەزدە ونەگەلى ۇرپاق تاربيەلەگەن ۇلگىلى وتباسىلارعا ارنالعان ءىس-شارالار وتەدى. اقساقالدارىمىز جاس وتباسىلارعا باتا بەرەدى. 18 ناۋرىز – ۇلتتىق كيىم كۇنى. ەلىمىزدىڭ بارلىق وڭىرىندە ۇلتىق كيىمىمىزدى ناسيحاتتاۋعا باعىتتالعان ءتۇرلى ءىس-شارا جوسپارلانعان. 19 ناۋرىز – جاڭارۋ كۇنى كوكتەمگى اعاش ەگۋ داستۇرىمەن جالعاسادى. 20 ناۋرىز – ۇلتتىق سپورت كۇنى ەلىمىزدىڭ بارلىق ايماقتارىندا ءتۇرلى جارىستار ۇيىمداستىرىلادى. 21 ناۋرىز – ىنتىماق كۇنى جالپى حالىق ءبىر-بىرىنە دەگەن سىي-قۇرمەتتەرىن ارتتىرىپ, تاتۋلىق پەن بىرلىكتى ناسيحاتتاۋعا ارنالادى. 22 ناۋرىز – جىل باسى. بۇل كۇنى ەلىمىزدىڭ بارلىق وڭىرلەرىندە جالپىحالىقتىق مادەني-سپورتتىق ءىس-شارالار وتكىزىلىپ, ءستيلدى ەتنواۋىلدار مەن ءتۇرلى جارمەڭكە ۇيىمداستىرىلادى, كيىز ۇيلەر تىگىلىپ, ءتۇرلى جارمەڭكە ۇيىمداستىرىلىپ, مادەني شارالار وتكىزىلەدى, – دەدى ءسابيت بارلىباەۆ. سونىمەن قاتار ول 14-23 ناۋرىز ارالىعىندا «ناۋرىز بازارلىق» ماۋسىمى جاريالاناتىنىن بايان ەتتى. ءارتۇرلى ساۋدا ورنىندا جاپپاي ساتىلىمدار, جەڭىلدىكتەر قاراستىرىلىپ, حالىققا ىڭعايلى ساۋدا ءىسى ۇسىنىلماق. ال ناۋرىزنامانىڭ قورىتىندىسى – 24 ناۋرىز كۇنى تازارۋ كۇنى دەپ جاريالانىپ, ەلىمىزدىڭ بارلىق ايماعىندا جالپىۇلتتىق ەكولوگيالىق اكتسيا وتكىزىلمەك.
سونىمەن قاتار استانا قالاسى مادەنيەت باسقارماسى باسشىسىنىڭ ورىنباسارى نۇران قامزين ەلوردادا وتەتىن ءىس-شارالار تۋرالى ايتىپ ءوتتى.
– قالا اكىمدىگى ەلوردادا ناۋرىز مەيرامىنىڭ قارساڭىندا تۇرعىندار مەن قوناقتار ءۇشىن 200-گە جۋىق ءىس-شارا وتكىزۋدى جوسپارلاپ وتىر. EXPO حالىقارالىق كورمە ورتالىعىندا كوشپەلى ونەر فەستيۆالى وتەدى, قازىرگى ۋاقىتتا دايىندىق جۇمىستارى جۇرگىزىلىپ وتىر, 21-22 ناۋرىزدا ساعات 11.00-دەن 16.00-گە دەيىن قالامگەر مونۋمەنتى جانە باسقا ورىنداردا ەسترادا جۇلدىزدارىنىڭ قاتىسۋىمەن نەگىزگى مەرەكەلىك كونتسەرتتەر ۇيىمداستىرىلادى. سونىمەن قاتار قالانىڭ بەس اۋدانىندا 30-دان استام مەرەكەلىك كونتسەرت وتەدى, – دەدى ول.
وسىلايشا, ەلىمىزدىڭ رۋحاني قۋاتىن, ۇلتتىق تانىمىن كەڭەيتەتىن بىرەگەي مەرەكەمىز جاڭاشا اتالىپ وتپەك. بۇل – حالقىمىزدىڭ رۋحاني يممۋنيتەتىنە, سان عاسىرلىق بەرىك ۇلتتىق كودىنا وڭ اسەر ەتەرى ءسوزسىز.
