ول كەزدە بەكزات وڭتۇستىك وڭىرىنە ءبىراز تانىلىپ قالعان ەدى. بوكستان جاستار اراسىنداعى ەل بىرىنشىلىگىنىڭ جەڭىمپازى ءارى سپورت شەبەرى اتاعى بار. سول سەبەپتى دە ساتتارحانوۆ العاشقى شىعارماشىلىق ەمتيحاننان بوساتىلدى. ال مەندە ونداي اتاق جوق. سول سەبەپتى بارشاعا بىردەي ورتاق تالاپ بويىنشا ەمتيحان تاپسىردىم. ايتەۋىر, سول سىناقتان سۇرىنبەي ءوتتىم. سودان كەيىن بارلىعىمىز ۆاتۋتينا كوشەسىندەگى جۇرتشىلىق «قىرداعى كورپۋس» اتاپ كەتكەن عيماراتتىڭ كەڭ اۋديتورياسىنا تەست تاپسىرۋعا جينالدىق. بەكزات, عالىمجان (ول ارىس قالاسىنىڭ تۋماسى, تانىمال بوكسشى, قازاقستاننىڭ ەڭبەك سىڭىرگەن جاتتىقتىرۋشىسى نۇرعالي ءسافيۋلليننىڭ شاكىرتتەرىنىڭ ءبىرى) ۇشەۋمىز سىناق تاپسىرۋ ءۇشىن قاتارلاسا جايعاستىق. ۇيىمداستىرۋشى تەست پاراقشاسى مەن ءتۇرلى نۇسقالارعا بولىنگەن سۇراقتاردىڭ جيناعىن تاراتقاننان كەيىن تالاپكەرلەرگە تولى ءزاۋلىم زالدىڭ ءىشى تىم-تىرىس. تەك كىتاپشا پاراقتارىنىڭ بەتتەگەن دىبىس پەن قالامساپتىڭ قاعازعا سۇيكەلىسى عانا ەستىلەدى. سىناق جاۋابىن بەلگىلەيتىن ءبىر قالامدى ۇشكە ءبولىپ بەلگىلەدىك تە, تولتىرىلعان تەست پاراعىن بىرتىندەپ تاپسىردىق. تاعاتسىزدانا كۇتكەن تەست جاۋابى ەكى كۇن وتە اۋلاداعى اقپارات تاقتاسىنا ءىلىنىپ, قاتارلاسا وتىرعان ۇشەۋمىز دە تف 97-2ك توبىنىڭ ستۋدەنتى اتاندىق. توبىمىزدا – ەكى قىز, قالعانى – ۇلدار.
توپتاعى وزگە 20 ستۋدەنتتەن بەكزاتتىڭ ساباققا ۇلگەرىمى ارتىق بولماسا دا, بويىنداعى ۇقىپتىلىعى, تالپىنىسى مەن يماندىلىعى ەرەكشە ەدى. تۇركىستان تۋرالى تاقىرىپتىڭ ۇشى شىقسا بولدى, اڭگىمە تىزگىنىن ءوز قولىنا الادى. «كەلەشەكتە تۇركىستاندا تاشكەنتتەگىدەي ديسنەيلەند پەن ساياباق سالىنادى. قۇداي قالاسا, قالا كوركەيەدى», دەپ كونە شاھاردىڭ جاڭاراتىنىنا سەنىمى مەن تۋعان ولكەسىنە, اتا-بابالارىنىڭ رۋحىنا دەگەن قۇرمەتى باسىم ەدى. راسىندا دا, تاريحي قالادا تۋىپ-وسكەنى بولاشاق بوكس جۇلدىزىنىڭ ىشكى جان دۇنيەسىنە زور اسەر ەتكەنى بايقالىپ-اق تۇر. جاھاندانۋ زامانىندا تاريحىمىزدى ۇمىتپاي, وتكەندى ءوزى ءومىر سۇرگەن كەزەڭمەن بايلانىستىرىپ, ۇلتتىق بولمىسىن جوعالتپاعان بەكزات ساتتارحانوۆتىڭ ۇلتجاندىلىعى بۇگىنگى سپورتشىلارعا ۇلگى بولارى – حاق.
ارا-تۇرا وقۋ عيماراتىنان بوكسشىنىڭ جەكە باپكەرى اناتولي ۆيزيرياكيندى كورىپ قالساق, «بۇگىن-ەرتەڭ بەكزات جاۋاپتى ءبىر جارىسقا نەمەسە وقۋ-جاتتىعۋ جيىنىنا جول تارتادى» دەپ بولجايمىز. ەكىنشى كۋرستا ب.ساتتارحانوۆتىڭ جاتتىعۋ جيىندارى كۇردەلەنە ءتۇستى. ول قازاقستاننىڭ جاستار قۇراماسىنىڭ ساپىنا قابىلداندى. سودان كەيىن تولاسسىز ساپارلار باستالدى. ول بۇكىل رەسپۋبليكانى شارلادى, شەتەلگە دە ءجيى شىعىپ تۇردى. اتاعى مەن ابىرويى دا ارتا ءتۇستى. دەسەك تە, بەكزات مۇمكىندىگىنشە ۋنيۆەرسيتەتكە باس سۇعىپ, ساباقتان قالماۋعا تىرىساتىن.
سوڭعى رەت بەكزاتپەن وقۋ عيماراتىندا 2000 جىلدىڭ كوكتەمىندە كەزدەسىپ, 10-15 مينۋتتاي اڭگىمەلەسۋدىڭ ءساتى ءتۇستى. شىنىعىپ, ابدەن شىڭدالعان سپورتشىنىڭ بار ويى, ارمان-ماقساتى سيدنەي وليمپياداسىندا اتوي سالۋ ەدى. ءسوز ورايى كەلگەندە, جاھاندىق جارىستا توپ جارۋىنا تىلەكتەس ەكەنىمدى ءبىلدىردىم. ارادا بىرەر اي وتكەننەن سوڭ جاسىل قۇرلىقتا جاسىنداي جارقىلداعان كۋرستاسىم وليمپيا ويىندارىنىڭ جەڭىمپازى اتاندى. سول ساتتە بارشا الاش جۇرتى بوركىن اسپانعا اتىپ قۋاندى. قاسىندا جۇرسەڭ, شۋاعىنان جانىڭا جىلۋى سەزىلەتىن امانكەلدى سەيىتحان اعامىزدىڭ تەلەديداردان «بەكزات بۇل جەڭىسىن تۇركىستاننىڭ 1 500 جىلدىق مەرەيتويىنا ارنادى» دەپ جەر-جاھانعا جار سالعاندا, قۋانباعان قازاق جوق-اۋ, ءسىرا!
«دايىن اسقا – تىك قاسىق» دەمەكشى, بەكزاتتىڭ سول مەزەتتە قالاي عانا قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ستۋدەنتى بولا قالعانى ماعان دا جانە بىرگە وقىعان كۋرستاستارىنا دا بەيمالىم. بالكىم, ونىڭ ءبىز بىلمەيتىن ءبىر سىرى بار شىعار. بىراق بۇل ماسەلە قازىر ماڭىزدى ەمەس.
بولاشاق وليمپيادا چەمپيونىنىڭ قالاداعى تۇرمىستىق جاعدايىنا كەلسەك, ول شىمكەنتتەگى «اباي» ساياباعىنىڭ ماڭىنداعى ستۋدەنتتەرگە ارنالعان وقمۋ-دىڭ №4 جاتاقحاناسىندا ءتورتىنشى قاباتتاعى 412-بولمەدە تۇردى. جاتاقحانانى سۋرەتتەسەم, ءبىز وقىعان 1997-1998 جىلدارى قىس مەزگىلىندە سالقىن, جىلۋ تۇگىلى جارىق جانسا, قۋاناتىن كەز. بولمەلەرگە كۇننىڭ ساۋلەسى از تۇسەدى. ۇزىن ءدالىزدىڭ باس-اياعىندا سالبىراپ سىعىرايعان ەلەكتر جارىعى, قابىرعاسى جارتىلاي كوك تۇسكە سىرلانعان, اس ازىرلەيتىن بولمەسى, القام-سالقامى شىققان گاز پليتاسى بار, ال دارەتحاناسى توبىققا جەتەر كولكىگەن سۋعا تولعان.
بۇل كۇندەرى ءبىز دە ءوسىپ-جەتىلىپ, ءوز سالامىزدىڭ بىلىكتى مامانى بولدىق. مەملەكەتتىك جاتتىقتىرۋشى رەتىندە ءتۇرلى جارىستارعا بارىپ تۇرامىن. سپورتشىلاردىڭ وقۋ-جاتتىعۋ جيىندارىن كورىپ قايتامىز. سول كەزدەرى سانامىزدى سانسىز ويلار شارلايدى. توقسانىنشى جىلدار مەن حح عاسىردىڭ باسىنداعى كۇيسىزدىكتى كورگەن مەن بۇگىنگى تاڭدا ونەر كورسەتىپ جۇرگەن كەيبىر سپورتشىلاردىڭ حالىقارالىق جارىستاردا سۇرىنگەن تۇستا «جاعداي جاسالمادى» دەپ سىلتاۋ ايتىپ, اقتالاتىندارىنا تاڭىم بار. مۇمكىن ولاردىڭ جاقسى كورسەتكىشكە قول جەتكىزۋىنە كەسىرىن تيگىزىپ جاتقان كەدەرگىلەر بار دا شىعار. بىراق بۇلاي ايتۋعا تۇرمايتىن مايدا-شۇيدە ماسەلە. توقسانىنشى جىلدارمەن سالىستىرعاندا, قازىرگى سپورتشىلاردىڭ جاعدايى الدەقايدا جاقسى. ولار – تولىقتاي مەملەكەتتىڭ قامقورلىعىندا. وقۋ-جاتتىعۋ جيىندارى ۇزدىكسىز وتەدى, جارىستاردان قالمايدى. ودان قالسا, دەمەۋشىلەر مەن جەكەلەگەن اۋقاتتى ازاماتتاردىڭ كومەكتەرى تاعى بار.
مەنىڭ جاڭاتاستىق جەڭىس دوسىمنىڭ بولاشاق جارى ءمادينانىڭ جاتاقحاناداعى بولمەسى سول بەكزات تۇرعان بولمەنىڭ ۇستىندە, بەسىنشى قاباتتا ورنالاسقان ەدى. سول جاققا كەش باتا اپتاسىنا ەكى-ءۇش رەت كەلەمىز. دوسىمنىڭ ماحابباتى – ماگنيت. ءمادينانىڭ بولمەسىندەگى جىلۋى جوق جىلىتقىش رادياتوردى قاسىقپەن سوقسام, بەكزات بولمەسىندە بولسا, جاۋاپ قايتارادى. وسىلاي قاۋىشىپ تۇراتىنبىز.
17 جاستاعى جىگىتتىڭ ءبىر كۇندىك كەستەسى قاۋىرت شارۋاعا تولى بولدى. كۇندە جاتتىعۋ, قاتاڭ رەجىم ساقتالعان. بەكزات «جاتتىعۋدان سوڭ دەمالۋىم كەرەك» دەپ سەرىپپە ءتارىزدى, جاتساڭ بەلى ەدەنگە دەيىن سوزىلاتىن تەمىر كەرۋەتىنەن تۇرمايدى. بولمەسى سالقىن, جامىلعانى – ماقتا كورپە. ەكەۋمىز ءتۇرلى تاقىرىپتا اڭگىمە ايتامىز. ول رينگتەگى بارلىق قارسىلاسى تۋرالى مالىمەتتەر جيناپ جۇرەتىن. ءار جەكپە-جەگىن داپتەرگە ءتىزىپ, جان-جاقتى ساراپتاما جاسايدى. بولاشاق وليمپيادا چەمپيونى جاتاقحانانىڭ جاستارى ءجيى باس قوساتىن ءتۇرلى كەشتەرگە دە كوپ قاتىسپايتىن. تاماعىن تالعاممەن, ماڭايداعى اسحانادان ۋاقتىلى ىشەتىن.
سول بەكزات باتىرىمىزدىڭ سپورتتاعى جەڭىسى, ونىڭ جارقىن بەينەسى, قايسار ءارى بيىك ادامگەرشىلىك قاسيەتى, جۇمساق مىنەزى, اققان جۇلدىزداي وتە شىققان قىسقا دا, ماعىنالى عۇمىرى بارشا قازاق حالقىنىڭ جادىندا ماڭگى ساقتالاتىنىنا سەنىمدىمىن.
نۇرپەيىس قونىسباەۆ,
اۆتوموتوسپورتتان مەملەكەتتىك جاتتىقتىرۋشى
