باتىس قازاقستان وبلىسى كاسىپكەرلىك باسقارماسىنىڭ مالىمەتىنە سايكەس, وڭىردە بىلتىر ينۆەستورلاردىڭ كۇشىمەن 45 جوبا ىسكە قوسىلعان ەكەن. وسىنىڭ اياسىندا 1 مىڭ جاڭا جۇمىس ورنى اشىلعان. جالپى العاندا 2023 جىلدىڭ قورىتىندىسى بويىنشا نەگىزگى كاپيتالعا سالىنعان ينۆەستيتسيا كولەمى 16,4%-عا ءوسىپ, 645,6 ملرد تەڭگەنى قۇراعانىمەن, ونىڭ باسىم بولىگى قاراشىعاناق كەن ورنى ارقىلى تارتىلعان ينۆەستيتسيا بولاتىن.
«مەملەكەت باسشىسىنىڭ ءتۇرلى دەڭگەيدەگى اكىمدەرگە قويىپ وتىرعان ەڭ باستى مىندەتتىڭ ءبىرى – ەلىمىزدىڭ مىقتى ونەركاسىپتىك نەگىزىن قالىپتاستىرۋ جانە ەكونوميكامىز ءوزىمىزدى تولىق قامتاماسىز ەتە الاتىن جاعدايعا جەتكىزۋ. سوندىقتان وبلىس ەكونوميكاسىن ودان ءارى ءارتاراپتاندىرۋ, سونىڭ ىشىندە وڭدەۋ سالاسىن دامىتۋ باعىتىندا ناقتى ىستەردى قولعا الىپ جاتىرمىز», دەيدى ناريمان تورەعاليەۆ.
2023 جىلدىڭ قورىتىندىسىنا قاراعاندا وبلىستا ونەركاسىپ ءونىمىنىڭ كولەمى 3,5 ترلن تەڭگەنى قۇراپ, 6,6%-عا وسكەنى بايقالادى. سونىڭ ىشىندە وڭدەۋ ونەركاسىبىنىڭ كولەمى 308 ملرد تەڭگەنى قۇراپ, 7,4%-عا ارتقان. ءوسىم مەتاللۋرگيا ونەركاسىبى, مۇناي وڭدەۋ ونىمدەرى, ماشينا جاساۋ, جيھاز, قۇرىلىس يندۋسترياسى سالالارىندا بايقالعان.
اقپان ايىندا ۇكىمەتتىڭ كەڭەيتىلگەن وتىرىسىندا مەملەكەت باسشىسى بىراقاتار تاپسىرما بەردى. ونىڭ ىشىندە وڭىرلەرگە ينۆەستيتسيا تارتۋ – اسا ماڭىزدى ماسەلە بولىپ وتىر.
وبلىس ەكونوميكاسىن ءارتاراپتاندىرۋ ءۇشىن الداعى 5 جىل ىشىندە جالپى قۇنى 2,4 ترلن تەڭگە بولاتىن 67 ينۆەستيتسيالىق جوبا جوسپارلانعانىن ايتقان ءوڭىر باسشىسى 2024 جىلى 100 ملرد تەڭگەلىك 15 جوبانى ىسكە اسىرۋ جوسپارلانعانىن حابارلاعان بولاتىن.
«بۇل ينۆەستيتسيالىق جوبالاردى جۇزەگە اسىرۋ وڭىرىمىزدە قوسىمشا جاڭا جۇمىس ورىندارىن قۇرۋعا, سالىقتىق تۇسىمدەردى كوبەيتۋگە, جاڭا تەحنولوگيالاردى ەنگىزۋگە مۇمكىندىك بەرەتىن بولادى», دەگەن ەدى جۋرناليستەرمەن كەزدەسۋ كەزىندە ناريمان تورەعاليەۆ.
الايدا 12 ناۋرىز كۇنى شۇعىل جيىن وتكىزگەن اكىم وبلىسقا قاراستى قالالار مەن اۋداندار, باسقارمالار تاراپىنان ينۆەستيتسيا تارتۋ باعىتىنداعى جۇمىس باياۋ جۇرگىزىلىپ جاتقانىن ايتىپ, دابىل قاقتى. ماسەلەن, اۋدانداردىڭ جارتىسىنان كوبى جالپى قۇنى 1 ملرد تەڭگەگە جەتپەيتىن ينۆەست جوبالار ۇسىنعان. ونىڭ ىشىندە بوكەي ورداسى, قاراتوبە, قازتالوۆ, شىڭعىرلاۋ اۋداندارى ۇسىنعان جوبالاردىڭ جالپى قۇنى 205 ملن تەڭگەدەن دە تومەن دەڭگەيدە.
ناريمان تورەعاليەۆ اسىرەسە اۋدان اكىمدەرىنە ينۆەستيتسيا باعىتىنداعى جۇمىستاردى كۇشەيتۋدى تاپسىردى. ء«بىز ناقتى ىستەردى قولعا الۋىمىز قاجەت», دەدى اكىم.
ورال قالاسى وبلىس ورتالىعى بولعانىنا قاراماستان 2023 جىلدىڭ قورىتىندىسى بويىنشا نەگىزگى كاپيتالعا سالىنعان جەكە ينۆەستيتسيا كولەمى 6,8%-عا تومەندەگەن. بۇل دەگەنىڭىز 83 ملرد تەڭگە دەگەن ءسوز. سونداي-اق بىرقاتار اۋداندا دا كورسەتكىش كوڭىلدەن شىقپايدى.
وبلىس باسشىسى ءار اۋدان اكىمىنىڭ, ءار باسقارما باسشىنىڭ جۇمىسى تىكەلەي ينۆەستيتسيا تارتۋمەن بايلانىستى بولۋى كەرەك ەكەنىن ەسكەرتتى.
«ينۆەستيتسيا تارتۋ بويىنشا جۇمىس جۇرگىزبەسەڭدەر, ورىندارىڭدى بوساتاسىڭدار. مەن كادرلىق شەشىم قابىلدايتىن بولامىن. ناقتى جوبالار كەرەك. ناتيجە كەرەك», دەپ اتاپ ءوتتى ايماق باسشىسى.
باتىس قازاقستان وبلىسىنداعى اۋدانداردىڭ باسىم بولىگى, سونىڭ ىشىندە جوعارىدا ينۆەستيتسيالىق تارتىمسىز دەپ اتالعان وڭىرلەر نەگىزىنەن مال شارۋاشىلىعىمەن اينالىسادى. كوبى وبلىس ورتالىعىنان شالعاي جاتىر. مۇندا كوممۋنيكاتسيا جەلىلەرى جەتىلمەگەن. قازاقستان بويىنشا ساپاسى ەڭ تومەن جولدار دا وسى وبلىستا. ەلەكتر جەلىلەرىنىڭ 80 پايىزى توزعان. سوڭعى جىلدارى جول قۇرىلىسىندا وڭ وزگەرىس بولعانىمەن, تاقتايداي جول تۇسكەن اۋىل سانى از. 2024 جىلعا ارنالعان جوسپار بويىنشا بيىل باتىس قازاقستان وبلىسىنىڭ جولدارىن جوندەۋگە 100 ملرد تەڭگەدەن اسا قارجى جۇمسالىپ, 502 شاقىرىم جول سالىنباق. ەگەر بۇل مەجە ورىندالسا, وبلىس اۋماعىندا قاناعاتتانارلىق جولدىڭ كولەمى 58%-عا جەتۋى كەرەك.
باتىس قازاقستان وبلىسى
