قوس ءوڭىر ونەرپازدارىنا اقىن, قازاقستاننىڭ ەڭبەك سىڭىرگەن قايراتكەرى ءجۇرسىن ەرمان باستاعان توپ قازىلىق ەتتى. ءتول ونەرگە جاناشىر ازامات زالعا كىرىپ كەلگەندە كۇللى كورەرمەن ورنىنان تۇرىپ, قول سوعىپ قوشەمەت كورسەتتى. ايتىسكەرلەردەن بولەك, كۇيشى, جىرشى, تەرمەشىلەر جانە ءداستۇرلى انشىلەر ونەرىنە باعا بەرگەن القا قۇرامىندا فيلولوگيا عىلىمدارىنىڭ دوكتورى قويلىباي اسانوۆ, اقىن, فيلولوگيا عىلىمدارىنىڭ كانديداتى سەرىكزات دۇيسەنعازين, اقىن, مادەنيەت سالاسىنىڭ ۇزدىگى قۇدايبەرلى مىرزابەكوۆ, ءداستۇرلى ءانشى, قازاقستاننىڭ حالىق ءارتىسى رامازان ستامعازيەۆ, كۇيشى, قازاقستاننىڭ ەڭبەك سىڭىرگەن قايراتكەرى جانعالي جۇزباەۆ پەن جىرشى-تەرمەشى, مادەنيەت سالاسىنىڭ ۇزدىگى ەربولات شالدىباەۆتار بولدى.
قىزىلوردا وبلىسى اكىمىنىڭ ورىنباسارى ارداق زەبەشەۆ, وبلىستىق ءماسليحات توراعاسى ناۋرىزباي بايقاداموۆ, كورشى ءوڭىر ونەرپازدارىن باستاپ كەلگەن شىمكەنت قالاسى اكىمىنىڭ ورىنباسارى سارسەن قۇرانبەك كوماندالارعا ساتتىلىك تىلەدى. سارسەن اباي ۇلى قىزىلوردالىقتارعا شىمكەنت قالاسى اكىمىنىڭ سالەمىن جەتكىزىپ, الامانعا ارنايى كەلگەن ءجۇرسىن ەرمانعا كوپ الدىندا قۇرمەت تانىتتى. ءسوز سايىسىن قازاقستاننىڭ ەڭبەك سىڭىرگەن قايراتكەرى, ءماجىلىس دەپۋتاتى امانجول ءالتاي جۇرگىزدى.
«بيىلعى ناۋرىزدان باستالىپ, كەلەر جىلى وسى ۋاقىتتا تۇيىندەلەتىن مەگا جوبانىڭ سىر ەلىنەن باستاۋ الىپ جاتقانى تەگىن ەمەس. جاقىندا عانا حالىقارالىق تۇركسوي ۇيىمىنىڭ «ۇزدىك مادەني ءوڭىر» اتالىمىن جەڭىپ العان سىر ءوڭىرى تەك ءبىزدىڭ مەملەكەتتىڭ عانا ەمەس, وردالى ورتا ازيانىڭ تورىندەگى مادەني, رۋحاني الەۋەتى كەمەلدەنگەن قۇتتى ءوڭىر», دەدى امانجول دۇيسەنباي ۇلى.
دالا ءدىلمارى, ءوز زامانىنىڭ قابىرعالى قايراتكەرى اتانعان ايتەكە ءبيدىڭ 380 جىلدىعىنا ارنالعان كوماندالىق ايتىستىڭ تانىستىرۋ ءۇردىسىن, ءسۇيىنشى ءسوزىن شىمكەنتتىك ونەرپازدار تاراپىنان باتىرحان بايدانوۆ, سىربويىلىق توپ اتىنان جاس دارىن نوسەر ايدوس ۇلى ورىندادى. اقىنداردىڭ ەپيكالىق تىنىسىن, ۇلتتىڭ وي-ءورىسىنىڭ بايتاقتىعىن تانىتاتىن سۇرە ايتىسقا ءبىرجان بايتۋوۆ پەن ەرجان ءامىروۆ شاقىرىلدى.
زاماننىڭ بەت-بەينەسىن, ساياسي احۋال مەن قوعامداعى قۇبىلىستاردى تىلگە تيەك ەتكەن ءسوز سايىسىندا قازىر سىرتتاعى جۇرت وزىنە تەلىپ العان ۇلت تۇلعالارى جايلى ءبىرجان بايتۋوۆ «ايتىس بولعان جەرى دە قازاقتىكى, قايتىس بولعان جەرى دە قازاقتىكى» دەسە, ەرجان ءامىروۆ «ناشا شەككەن ادامدار ازايمايدى, ناشا ساتقان ادامدار ۇستالماسا» دەپ بۇگىنگىنىڭ تاعى ءبىر سوقتالى ماسەلەسىن ءسوز ەتتى. قوس اقىننىڭ ونەرىن باعالاعاندار ءبىرجان بايتۋوۆقا 37, ەرجان امىروۆكە 40 ۇپاي بەردى.
كورەرمەن الدىندا شىمكەنتتىك ابىلاي ءبورىحانوۆ «اقىرەتتەن حات» اتتى جىردى ورىنداسا, جەرگىلىكتى ونەرپاز تولەۋباي بيسەنبەك «كورۇعلىنى» تولعاپ, قازىلار شەشىمىمەن باسىم ءتۇستى. تۇرە ايتىستا ءاناپيا نۇرعاليمەن ءسوز سايىستىرعان قىزىلوردالىق ايتىسكەر بەكسۇلتان ورىنباساروۆ العا شىقتى. قىز بەن جىگىت ايتىسى مەن ءان سايىستا كورشى ءوڭىر ونەرپازدارى نۇرلان ەسەنقۇلوۆ پەن تۇرار المەنوۆتىڭ دەسى باسىم بولدى. قايىم ايتىستا قاتار شاپقان مەيىرجان جارىلقاپ پەن مۇحتار نيازوۆ تەڭ تۇسسە, تەرمەدەن ەربول قالمىرزاەۆ قىزىلوردالىق ءادىلحان قۋاڭباەۆتان ءبىر ۇپاي ارتىق الدى.
قىزىلوردا وبلىسى اكىمدىگى مەن «Amanat» پارتياسى ۇيىمداستىرعان ونەر بايگەسىنىڭ قورىتىندىسىندا جەرگىلىكتى كوماندا العا شىعىپ, كەلەسى ايتىسقا جولداما الدى. ەكى توپقا دا تەڭدەي قۇرمەت كورسەتىلىپ, ءار اقىنعا 500 مىڭ تەڭگەدەن سىياقى بەرىلدى. ال جىرشى, تەرمەشى, ءداستۇرلى ءانشى مەن كۇيشىلەرگە 250 مىڭ تەڭگەدەن تابىستالدى.
جەڭىمپاز اتانعان قىزىلوردا وبلىسىنىڭ كومانداسىنا قازالى اۋدانى اكىمدىگىنىڭ ايتەكە ءبيدىڭ 380 جىلدىعىنا تاعايىنداعان «بابالار اماناتى» اتتى ارنايى سىيلىعى تاپسىرىلدى.
قىزىلوردا
