فوتو: akorda.kz
پرەزيدەنت ازەربايجاندى قازاقستاننىڭ ستراتەگيالىق سەرىكتەسى رەتىندە اتاپ ءوتىپ, باۋىرلاس مەملەكەتكە جاساعان ساپارىنىڭ ءمان-ماڭىزىنا توقتالدى.
«بۇل مەملەكەتتىك ساپار ەلدەرىمىز اراسىنداعى ىنتىماقتاستىقتى ودان ءارى دامىتۋ تۇرعىسىنان وتە ماڭىزدى. مەنىمەن بىرگە ۇلكەن دەلەگاتسيا كەلدى. بۇل باۋىرلاس ازەربايجان ەلىنە جوسپارلانعان وسى مەملەكەتتىك ساپارعا مەيلىنشە تىڭعىلىقتى دايىندالعانىمىزدى بىلدىرەدى. بۇگىن ءبىز ءتيىستى قۇجاتتار مەن كەلىسىمدەرگە قول قويۋ راسىمىنە قاتىستىق. ەڭ باستىسى, اراداعى كەلىسىمگە سايكەس, ەكى ەل ۇكىمەتتەرى مەن باسقا دا سالالىق ۆەدومستۆولار جوعارى دەڭگەيدەگى كەزدەسۋلەر بارىسىندا قول جەتكىزىلگەن ۋاعدالاستىقتاردى تولىققاندى جۇزەگە اسىرۋعا بار كۇش-جىگەرىن جۇمسايدى», دەدى قازاقستان پرەزيدەنتى.
مەملەكەت باسشىسى قازاقستان مەن ازەربايجاننىڭ ىقپالداستىعى دوستىققا, سەنىمگە, ءبىر-ءبىرىنىڭ مۇددەسىن قۇرمەتتەۋگە جانە ەسكەرۋگە نەگىزدەلگەن مەملەكەتارالىق قاتىناستىڭ وزىق ۇلگىسى سانالاتىنىن ايتتى. قاسىم-جومارت توقاەۆتىڭ پىكىرىنشە, جوعارى دەڭگەيدەگى بايلانىستاردىڭ ءبارى ەكى ەل اراسىنداعى ستراتەگيالىق سەرىكتەستىك پەن وداقتاستىق قاتىناستاردى نىعايتۋ ءۇشىن وتە پايدالى. پرەزيدەنت جوعارى مەملەكەتارالىق كەڭەستىڭ العاشقى وتىرىسىندا تالقىلانعان ماسەلەلەردىڭ ماڭىزدىلىعىنا نازار اۋداردى.
ء«بىز بۇگىن بۇكىل الەمدە رەسۋرستاردان بولەك, كولىك-لوگيستيكا سالاسىنداعى مۇمكىندىكتەرگە قول جەتكىزۋ ءۇشىن باسەكەلەستىك كۇشەيىپ كەلە جاتقانى تۋرالى ايتتىق. بۇل – ستراتەگيالىق سالا. قازاقستان دا, ازەربايجان دا سەنىمدى سەرىكتەستىكتەر رەتىندە بۇل باعىتتا تىعىز قارىم-قاتىناس جاساپ جاتقانى قۋانتادى. سيان پورتىنان قازاقستان اۋماعى ارقىلى ازىربايجانعا دەيىنگى تەمىرجول باعدارىن اشۋدىڭ ءوزى كوپ نارسەنى اڭعارتادى. بۇل, شىن مانىندە, وتە ماڭىزدى شارا. ءبىز تسيفرلاندىرۋ, جاساندى ينتەللەكت جۇيەسىن قۇرۋ, كاسپي تەڭىزىنىڭ تابانى ارقىلى وپتيكالىق-تالشىقتى بايلانىس جەلىسىن تارتۋ باعىتتارىندا كۇش-جىگەر بىرىكتىرۋ تۋرالى پىكىرلەستىك. مۇنىڭ ءبارى – بىرەگەي جوبالار», دەدى پرەزيدەنت.
قاسىم-جومارت توقاەۆ مادەني-گۋمانيتارلىق ىنتىماقتاستىق ماسەلەلەرىنە ارنايى توقتالدى. سونداي-اق قازاقستاننىڭ مادەنيەت كۇندەرىن جوعارى دەڭگەيدە وتكىزگەنى ءۇشىن ازەربايجان تاراپىنا ريزاشىلىعىن ءبىلدىردى.
ء«بىز ءوز ەلىمىزدە ازەربايجان مادەنيەتىنىڭ مايتالماندارىن اسىعا كۇتەمىز. بۇل ءىس-شارانىڭ تابىستى وتەتىنىنە ەشقانداي كۇمان جوق. ويتكەنى ازەربايجان مادەنيەتىنە دەگەن قىزىعۋشىلىق قاشاندا جوعارى. تۋراسىن ايتقاندا, ءسىزدىڭ ەلدىڭ مادەنيەتىنە قازاقستان حالقىنىڭ ىقىلاسى ەرەكشە. ءبىز ازەربايجان ونەر قايراتكەرلەرىن قۇشاق جايا قارسى الامىز», دەدى مەملەكەت باسشىسى.
قازاقستان پرەزيدەنتى كوپجاقتى قۇرىلىمدار اياسىنداعى ىنتىماقتاستىقتى نىعايتۋ ماڭىزدى ەكەنىن ايتتى.
«بۇۇ, تمۇ, ەقىۇ, اوسشك, سپەكا جانە تمد سياقتى اسا ماڭىزدى حالىقارالىق ۇيىمدار اياسىنداعى ىقپالداستىعىمىزدى ايرىقشا اتاپ وتكىم كەلەدى. مەنىڭشە, بۇل قارىم-قاتىناستىڭ اۋقىمى كەڭ جانە حالىقارالىق دەڭگەيدەگى ىنتىماقتاستىعىمىز ودان ءارى جالعاسا بەرەدى. ستراتەگيالىق سەرىكتەستىك تۇرعىسىنان كەلگەندە, مۇنىڭ دا ءمانى زور», دەدى قاسىم-جومارت توقاەۆ.
ءوز كەزەگىندە ازەربايجان پرەزيدەنتى يلحام اليەۆ مەملەكەتتىك ساپارمەن كەلگەنى ءۇشىن قاسىم-جومارت توقاەۆقا العىس ايتىپ, كەلىسسوزدەردىڭ ناتيجەسىنە كوڭىلى تولاتىنىن جەتكىزدى.
«ترانسكاسپي كولىك ءدالىزى – ايماقتىق ىنتىماقتاستىق دەڭگەيىن انىقتايتىن ناقتى باعىت. ويتكەنى كورشى ەلدەرمەن جاقسى قارىم-قاتىناس ورناتپاي, ترانزيتتىك ەلگە اينالۋ مۇمكىن ەمەس. بۇل رەتتە قازاقستان دا, ازەربايجان دا وڭىرلىك ىنتىماقتاستىققا, كورشىلەرمەن قارىم-قاتىناسىن نىعايتۋعا بەيىلدى ەكەنىن تانىتىپ وتىر. ءبىزدىڭ ارامىزدى تەك كاسپي تەڭىزى عانا ءبولىپ جاتىر. الايدا بۇگىندە ونىڭ ءوزى كەدەرگى ەمەس. كەرىسىنشە, كاسپي تەك ەلدەرىمىزدى عانا ەمەس, كوپتەگەن مەملەكەتتەردىڭ اراسىن جالعايتىن كوپىر سانالادى. سەبەبى ترانسكاسپي كولىك باعىتى ءوزىنىڭ الەۋەتىن تولىق اشۋعا كىرىستى. بۇگىن ۇكىمەت مۇشەلەرى كوپتەگەن ماسەلە بويىنشا ەگجەي-تەگجەيلى بايانداما جاسادى. ءوزارا ىقپالداستىق پەن بىرلەسكەن ءىس-ارەكەتتەردىڭ ناتيجەلەرى, ەڭ باستىسى, بولاشاق جوسپارلارىمىز, شىن مانىندە, وتە اۋقىمدى», دەدى يلحام اليەۆ.
قازاقستان مەن ازەربايجان پرەزيدەنتتەرىنىڭ كەلىسسوزى ناتيجەسىندە مىناداي قۇجاتتارعا قول قويىلدى:
- قازاقستان رەسپۋبليكاسى مەن ازەربايجان رەسپۋبليكاسى جوعارى مەملەكەتارالىق كەنەسىنىڭ ءبىرىنشى وتىرىسىنىڭ شەشىمى;
- قازاقستان رەسپۋبليكاسىنىڭ كولىك مينيسترلىگى مەن ازەربايجان رەسپۋبليكاسىنىڭ تسيفرلىق دامۋ جانە كولىك مينيسترلىگى اراسىنداعى تەڭىز كەمەلەرى ەكيپاج مۇشەلەرىنىڭ كاسىبي ديپلومدارىن ءوزارا تانۋ تۋرالى كەلىسىم;
- 2017 جىلعى 3 ساۋىردەگى قازاقستان رەسپۋبليكاسىنىڭ ءبىلىم جانە عىلىم مينيسترلىگى مەن ازەربايجان رەسپۋبليكاسىنىڭ ءبىلىم مينيسترلىگى اراسىنداعى ءبىلىم بەرۋ سالاسىنداعى ىنتىماقتاستىق, ونىڭ ىشىندە دوكتورانتۋراعا ورىن ءبولۋ تۋرالى كەلىسىمگە وزگەرىستەر ەنگىزۋ تۋرالى حاتتاما;
- قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەن ازەربايجان رەسپۋبليكاسىنىڭ تسيفرلىق دامۋ جانە كولىك مينيسترلىگى اراسىنداعى عارىش كەڭىستىگىن بەيبىت ماقساتتاردا زەرتتەۋ جانە پايدالانۋ سالاسىنداعى ءوزارا تۇسىنىستىك تۋرالى مەموراندۋم;
- قازاقستان رەسپۋبليكاسىنىڭ مادەنيەت جانە اقپارات مينيسترلىگى مەن ازەربايجان رەسپۋبليكاسىنىڭ مادەنيەت مينيسترلىگى, ازەربايجان رەسپۋبليكاسىنىڭ جاستار جانە سپورت مينيسترلىگى اراسىنداعى 2024-2025 جىلدارعا ارنالعان ءىس-شارالار جوسپارى;
- «سامۇرىق-قازىنا» اق مەن ازەربايجان ينۆەستيتسيالىق حولدينگى (AIH) اراسىنداعى ستراتەگيالىق سەرىكتەستىك تۋرالى كەلىسىم;
- «قازمۇنايگاز» ۇلتتىق كومپانياسى» اق مەن ازەربايجان رەسپۋبليكاسىنىڭ مەملەكەتتىك مۇناي كومپانياسى اراسىنداعى ازەربايجان رەسپۋبليكاسىنىڭ اۋماعى ارقىلى قازاقستاندىق مۇناي ءترانزيتىنىڭ كولەمىن كەزەڭ-كەزەڭىمەن ۇلعايتۋ تۋرالى كەلىسىم;
- «قازمۇنايگاز» ۇلتتىق كومپانياسى» اق مەن ازەربايجان رەسپۋبليكاسىنىڭ مەملەكەتتىك مۇناي كومپانياسى اراسىنداعى قازاقستاندىق مۇنايدى ساتىپ الۋ-ساتۋ سالاسىنداعى ستراتەگيالىق ىنتىماقتاستىق تۋرالى مەموراندۋم;
- قازاقستان رەسپۋبليكاسى پرەزيدەنتىنىڭ جانىنداعى «ورتالىق كوممۋنيكاتسيالار قىزمەتى» رەسپۋبليكالىق مەملەكەتتىك مەكەمەسى مەن ازەربايجان رەسپۋبليكاسىنىڭ مەديانى دامىتۋ اگەنتتىگى اراسىنداعى ىنتىماقتاستىق تۋرالى مەموراندۋم;
- قازاقستان رەسپۋبليكاسىنىڭ «دامۋ» كاسىپكەرلىكتى دامىتۋ قورى» اق مەن ازەربايجان رەسپۋبليكاسىنىڭ «شاعىن جانە ورتا بيزنەستى دامىتۋ اگەنتتىگى» جاريا قۇقىق زاڭدى تۇلعاسى اراسىنداعى ىنتىماقتاستىق تۋرالى مەموراندۋم;
- اتىراۋ قالاسىنىڭ اكىمدىگى (قازاقستان رەسپۋبليكاسى) مەن شيرۆان قالاسىنىڭ اتقارۋشى بيلىگى (ازەربايجان رەسپۋبليكاسى) اراسىنداعى ىنتىماقتاستىقتى دامىتۋدىڭ 2024-2026 جىلدارعا ارنالعان ءىس-شارالار جوسپارى;
- اقتاۋ قالاسىنىڭ اكىمدىگى (قازاقستان رەسپۋبليكاسى) مەن سۋمگايت قالاسىنىڭ اتقارۋشى بيلىگى (ازەربايجان رەسپۋبليكاسى) اراسىنداعى ىنتىماقتاستىقتى دامىتۋدىڭ 2024-2026 جىلدارعا ارنالعان ءىس-شارالار جوسپارى;
- «دامۋ» كاسىپكەرلىكتى دامىتۋ قورى» اق مەن ازەربايجان رەسپۋبليكاسىنىڭ شاعىن جانە ورتا بيزنەستى دامىتۋ اگەنتتىگى (KOBIA) اراسىنداعى ىنتىماقتاستىق تۋرالى مەموراندۋم شەڭبەرىندە شاعىن جانە ورتا بيزنەستى قولداۋ شارالارىن ىسكە اسىرۋ جونىندەگى جول كارتاسى;
- قازاقستان رەسپۋبليكاسىنىڭ «مەملەكەتتىك تەحنيكالىق قىزمەتى» اق مەن ازەربايجان رەسپۋبليكاسىنىڭ ارناۋلى بايلانىس جانە اقپاراتتىق قاۋىپسىزدىك قىزمەتى اراسىنداعى اقپاراتتىق قاۋىپسىزدىك سالاسىنداعى ءوزارا تۇسىنىستىك تۋرالى مەموراندۋم.
