فوتو: اسىلحان سەيداحمەت
ءىس-شارادا 70 انا ءبىر ءسات ءوزىن سۋرەتشى ءارى قولونەرشى سەزىنىپ كوردى.
«ەرەكشە قاجەتتىلىگى بار بالا تاربيەلەپ وتىرعان انالاردىڭ ساناسى سەرگىسىن دەگەن نيەتپەن مەرەكەلىك ءىس-شارا ۇيىمداستىردىق. ولار بۇلدىرشىندەرى ءۇشىن قولدان كەلگەننىڭ ءبارىن جاساپ جاتىر. ەرەكشە چەمپيونداردى تاربيەلەپ جۇرگەن جانداردىڭ ەسىل ەڭبەگى ەلەنە بەرسىن», دەدى «جاستار رۋحى» توراعاسىنىڭ م.ا. اقەركە يسكاندەروۆا.
ايتا كەتسەك, جاستار قاناتىنىڭ بەلسەندىلەرى «جاس جاۋىنگەر» كلۋبىنا جۇيەلى تۇردە قولداۋ كورسەتىپ كەلەدى.
« ۇلىم وسىندا 4 جىلدان بەرى كەلىپ ءجۇر. انالار قاۋىمىنا ارنالعان وسىنداي قىزىقتى, تارتىمدى ءىس-شارا وتەتىنىن كۇتپەپپىن. بۇگىن العاش رەت قىش بۇيىمىن جاساپ كوردىم. بارشاڭىزدى 8 ناۋرىز مەرەكەسىمەن قۇتتىقتايمىن, زور دەنساۋلىق تىلەيمىن, سەبەبى دەنساۋلىقتى ەشقانداي اقشاعا ساتىپ الا المايسىز», دەدى ەرەكشە بالانىڭ اناسى ايگۇل بەكتاەۆا.
استانا قالاسى تۇرعىنى شولپان ايتباەۆا اراعا 20 جىل سالىپ مولبەرتتى قايتا قولعا الدى.
«ونەر مەكتەبىنىڭ تۇلەگىمىن, الايدا سۋرەت سالماعانىما كوپ جىل بولعان. سوندىقتان وسىنداي شەبەرلىك ساعاتى ۇيىمداستىرىلعانىنا ءدان ريزامىن. وتە قىزىقتى ءوتتى, ءتىپتى, ءۇش ساعاتتىڭ قالاي وتكەنىن بايقاماي قالدىق», دەدى ول.
