باعدارلاما بىزدەگى «اليانس بانك» ارقىلى جۇزەگە اسىرىلدى. سول جەردە ەكى جىل جۇمىس ىستەگەننەن كەيىن «ەۋرازيالىق بانكتەن» شاقىرتۋ ءتۇستى. ونداعى قىزمەتىم شاعىن جانە ورتا بيزنەس قىزمەتىنە ارنالدى. سول جەردە ون جىل قىزمەت اتقاردىم جانە بانك ىشىندەگى بارلىق باسپالداقتى باسىپ ءوتتىم. جەتەكشى مامان, باس مامان, ءبولىم باسشىسى, باسقارما باسشىسىنىڭ ورىنباسارى, باسقارما باسشىسى بولىپ, باسقارۋشى ديرەكتور لاۋازىمىنا دەيىن جەتتىم. سول قىزمەتتى ءبىراز ۋاقىت اتقارىپ, ودان كەيىنگى جولىمدى قالاي جالعاستىرامىن دەپ وتىرعاندا مەنى «تۇرعىن ءۇي قۇرىلىس جيناق بانكىنە» شاقىردى. قازىرگى – «وتباسى بانك». باسقارما ءتورايىمىنىڭ ورىنباسارى بولىپ سول جەردە دە ۇزاق مەرزىم جۇمىس ىستەدىم.
تابانىم تيگەن قاي ۇيىمنىڭ مەن ءۇشىن ماڭىزى بيىك. «اليانس بانك» پەن «ەۋرازيالىق بانك» تە شاعىن جانە ورتا بيزنەسكە نەسيە بەرۋ سالاسىنا جاۋاپتى بولدىم. ول قۇرىلىمداردا ازاماتتاردىڭ نەسيە الىپ, كاسىپ باستاۋىنا, ءسويتىپ ءوزىنىڭ دە, ەلدىڭ دە جاعدايىن جاقسارتۋىنا بارىنشا ۇلەسىمدى قوستىم. ال «وتباسى بانكتە» باسپانا الۋعا قاتىستى نەسيەلەر عانا بەرىلەدى عوي, مەن وسى ورتاعا كەلۋ ارقىلى ادامعا ودان سايىن جاقىنداي تۇسكەندەي بولدىم. ازاماتتاردىڭ ءۇي الۋىنا سەبەپشى بولۋ ادامعا ەرەكشە باقىت سىيلايدى. ودان كەيىن 2020 جىلدىڭ سوڭىندا اياعىمنىڭ اۋىرلىعىنا قاراماستان, ءۇمىت شاياحمەتوۆا حانىم «حالىك-Life» كومپانياسىنا شاقىردى. ميسسيالىق تۇرعىدان قارايتىن بولساق, مەن ادامعا ودان سايىن جاقىنداي ءتۇستىم. ياعني بۇل جەردە ادامداردىڭ ءومىرىن ساقتاندىرۋعا بەلسەنە ارالاسىپ كەلەمىن.
قازىر ءبىزدىڭ كومپانيا ازاماتتار ءار تيىننىڭ ماڭىزىن ءتۇسىنىپ, ارتىق اقشانى ءومىرىن ساقتاندىرۋعا, بالاسىنىڭ بىلىمىنە جيناسا دەگەن وي اياسىندا ستراتەگيا قالىپتاستىرىپ وتىر. بۇل ورايدا كومپانيا جۇمىسىندا اعارتۋشىلىق سيپات باسىم. ساقتاندىرۋ نارىعىن دامىتۋعا قارجى نارىعىن رەتتەۋ جانە دامىتۋ اگەنتتىگى كوپ كومەگىن تيگىزىپ جاتىر. سونىڭ ارقاسىندا ەلىمىزدە العاش رەت ءومىردى ساقتاندىرۋ نارىعىندا مەملەكەتتىك قوردان سىياقى بولىنەتىن بولدى. ء«بىلىم-Life» ساقتاندىرۋ باعدارلاماسى بويىنشا اكە-شەشەسى اقشا جينايدى. ءبىز وعان 8 پايىز تولەماقى بەرىپ وتىرامىز. ەگەر كوپبالالى اتا-انا بولسا, وعان مەملەكەت 7 پايىز سىيلىقاقى بەرەدى. بيىلدان باستاپ تۋرا تۇرعىن ءۇي قۇرىلىس بانكىندەگىدەي سىيلىقاقى جۇيەسى ءومىردى ساقتاندىرۋ جۇيەسىنە دە كەلدى. سوندا اكە-شەشەسى «جيناعىما ساقتاندىرۋ كومپانياسى 8 پايىز سىيلىقاقى بەرەدى, سونىڭ ۇستىنەن بالام بىلىمگە قولجەتكىزسىن دەپ مەملەكەت تاعى 7 پايىز بەرەدى ەكەن, وندا اي سايىن تىم قۇرىسا ون مىڭ تەڭگە بولسا دا سالىپ وتىرايىن» دەپ ويلانا باستايدى. بالا ۋنيۆەرسيتەتكە تۇسكەندە سول اقشانى قولدانا الادى. ەگەر سول اقشانى جيناۋ بارىسىندا قولايسىز جاعداي كەسىرىنەن اكە-شەشەسى ومىردەن وزىپ كەتىپ جاتسا, ءبىز ول بالانى 17 جاسقا دەيىن جەتكىزىپ, ارمانداعان وقۋ ورنىنا ءتۇسىرىپ, وقۋ اقىسىن تولەپ بەرەمىز.
وتباسى قۇندىلىعى مەن مانساپ جولىن بارىنشا تەڭ ۇستاۋعا تىرىسىپ كەلەمىن. ءار بالام قىرقىنان شىققانشا انام كومەكتەسەدى. جولداسىم قاي باستامامدى دا قولداپ, تىلەۋلەس بولىپ وتىرادى. ايەل ءۇشىن مانساپ قۇرۋ, ەرلەر دەڭگەيىندە تابىس تابۋ قيىن عوي. سەبەبى ءبىزدىڭ كۇندەلىكتى ومىردە اتقاراتىن ءرولىمىز كوپ. جۇمىستان ۇيگە جەتكەنشە انا تاماقتى ىستەيمىن, مىنانى ىسىتىپ جىبەرەمىن, مىنانى جۋىپ تاستايمىن دەپ ويلانىپ بارامىز. سويتە ءجۇرىپ, جۇمىستى دا شەت قالدىرماۋ كەرەك. وتباسىما عانا ەمەس, حالقىما دا پايدام ءتيۋى كەرەك دەگەن قاعيدانى ۇستانامىن.
جىل سايىن قارجى سالاسىندا ۇلكەن جەتىستىككە جەتەتىن ايەلدەر قاتارى ارتىپ كەلەدى. 8 ناۋرىز مەرەكەسىندە ەڭ ءبىرىنشى انامىزدى قۇتتىقتاۋعا بارامىز. وتباسىمىزدىڭ اقىلشىسى, بەرەكەسى انامىز ريزا بولسا, ءبىز ءۇشىن سول عانيبەت. ودان كەيىن جۇمىستا قىز-كەلىنشەكتەردى, ارىپتەستەردى قۇتتىقتايمىن. ايەل ازاماتتار قۇلپىرا بەرسىن.
جانار جۇبانيازوۆا,
«حالىك-Life» اق ءومىردى ساقتاندىرۋ كومپانياسىنىڭ باسقارما توراعاسى
