انا قۋانىشى, ايەل باقىتى – وتباسىنىڭ, قوعامنىڭ, وتاننىڭ مەرەيى. مەملەكەت باسشىسى قاسىم-جومارت توقاەۆ اتاپ وتكەندەي: ء«اربىر ادام ءۇشىن انادان ۇلى, انادان قىمبات ەشكىم جوق. ەڭ قاستەرلى قۇندىلىقتارىمىز «جەر-انا», «وتان-انا» ۇعىمدارىمەن تىعىز بايلانىستى. «اتا ۇلدى, انا ۇلتتى تاربيەلەيدى» دەيدى. بۇل ءسوزدىڭ ايرىقشا ءمان-ماڭىزى بار. ۇلت بولاشاعى ۇرپاق تاربيەسىنەن باستالادى. ءار بالانىڭ جەتىستىگى – انا ماحابباتىنىڭ جەمىسى. ۇلى اباي ايتقان «تولىق ادامعا» ءتان اسىل قاسيەتتەر ۇرپاقتىڭ بويىنا انا ارقىلى داريدى».
قوعامنىڭ وركەنيەتتىلىگى ايەل-اناعا دەگەن كوزقاراسىنان كورىنەدى, سىي-قۇرمەتىنەن بىلىنەدى. ەلىمىزدە ەرتەدەن ايەل-اناعا دەگەن ەرەكشە قۇرمەت قالىپتاسقان. ەڭ اسىلىمىز, ەڭ قىمباتىمىز ابزال اناعا دەپ, انانىڭ ومىردەگى ورنىن بارىنشا باعالايتىن اتا سالتىمىز ءبىر دە بۇلجىعان ەمەس. سوناۋ ات اۋىزدىعىمەن سۋ ىشكەن, ەر ەتىگىمەن ساز كەشكەن قادىم زامانداردان كەشەگى تاۋەلسىزدىكتىڭ تاعدىرلى جىلدارىنا دەيىنگى تاريحي شەجىرەدە قاسيەتتى ايەل-انانىڭ ايقىن قولتاڭباسى بار. سوندىقتان دا حالقىمىزدىڭ بۇگىنگى كۇنگە امان جەتىپ, تاۋەلسىز مەملەكەت قۇرىپ, الەمدىك قوعامداستىقتان ءوز ورنىن ويىپ العانى ءۇشىن دە ءبىز ەڭ الدىمەن كۇرەسكەر ۇلداردى دۇنيەگە اكەلگەن قازاق ايەلدەرىنىڭ الدىندا باس يۋگە ءتيىسپىز.
تاۋەلسىزدىك تۇعىرىنا قونىپ, ەگەمەندىك العالى بەرى ەلىمىز وتباسىنىڭ, انا مەن بالانىڭ جاعدايىن جاساۋ باعىتىندا قولدان كەلەتىن شارالاردىڭ بارلىعىن جۇيەلى ۇيىمداستىرىپ كەلەدى. پرەزيدەنت جانىندا ايەلدەر ىستەرى جانە وتباسىلىق-دەموگرافيالىق ساياسات جونiندەگi ۇلتتىق كوميسسيا تۇراقتى جۇمىس ىستەيدى. ەڭبەك جانە حالىقتى الەۋمەتتىك قورعاۋ, وقۋ-اعارتۋ, عىلىم جانە جوعارى ءبىلىم, دەنساۋلىق ساقتاۋ مينيسترلىكتەرى مەن وسى سالاداعى مەكەمەلەردىڭ الدىندا تۇرعان اۋقىمدى ءىس-شارالاردىڭ ورىندالۋى دا جىلدان جىلعا جاقسارىپ, وڭ ارناعا ءتۇسىپ كەلەدى. قازىرگى كەزدە وبلىستاردا, قالالار مەن اۋدانداردا دا ايەلدەرگە ناقتى باعىتتالعان ءتۇرلى الەۋمەتتىك قولداۋ شارالارى جۇزەگە اسىرىلىپ جاتىر.
مەملەكەت باسشىسىنىڭ سىندارلى ساياساتىنىڭ ارقاسىندا قوعامىمىزدا قالىپتاسىپ وتىرعان رۋحاني كەلىسىم مەن ۇلتارالىق تاتۋلىق, تۇراقتىلىق پەن بىرلىكتىڭ بۇلجىماي جۇزەگە اسۋىندا قازاق ايەلدەرىنىڭ دە زور ۇلەسى بار. بۇگىندە قوعامدىق-ساياسي ومىرىمىزدە ايەلدەر وزدەرىنىڭ قارىم-قابىلەتى مەن قامقورلىعىن تانىتپايتىن ءبىر دە ءبىر سالا جوق.
وتكەن جىلدار ىشىندە ايەلدەردىڭ ازاماتتىق بەلسەندىلىگى دە ەلەۋلى دارەجەدە ءوستى. مەملەكەت جانە وكىلەتتى ورگاندارداعى ايەلدەر سانى ارتا ءتۇستى. پارلامەنتتە 28 ايەل دەپۋتات, ۇكىمەتتە ءۇش ايەل مينيستر بار. ونەركاسىپتىڭ نەگىزىنەن ايەلدەر جۇمىس ىستەيتىن سالالارىن جانداندىرۋ جونىندە بىرنەشە مەملەكەتتىك باعدارلاما جۇزەگە اسىرىلىپ جاتىر. ايەلدەردىڭ دەنساۋلىعىنا قامقورلىق كورسەتۋ باعىتىندا دا بىرقاتار ءىس تىندىرىلدى. كەيىنگى كەزەڭدەردەگى قوعامداعى ءتۇرلى جاعدايلارعا بايلانىستى ايەلدەردىڭ, انا مەن بالانىڭ قۇقىقتارىن قورعاۋ ءۇشىن قاجەتتى زاڭنامالار ۇزدىكسىز جەتىلدىرىلىپ, تولىقتىرىلىپ جاتىر.
تەگىندە تەك مەرەكە كۇندەرىندە ەمەس, ارقاشان, بارلىق ۋاقىتتا دا ايەل-انالاردىڭ ءال-اۋقاتىنا, تۇرمىس-تىرشىلىگىنە نازار اۋدارىپ وتىرۋ قاجەت. سوندا عانا ءومىردى باقىت پەن شاتتىققا اينالدىرۋعا, انانىڭ قاس-قاباعىنا قاراي وتىرىپ, قوعامنىڭ قيلى ماسەلەلەرىن قاپىسىز شەشۋگە بولادى. «انا جۇرەگى – الدامايتىن تارازى», «اناسىن رەنجىتكەندەردى اللا تاعالا دا جاقتامايدى», «انانىڭ الاقانى – ايدىندى قونىس» سىندى ماقال-ماتەلدەر دە حالقىمىز ءۇشىن انانىڭ ورنى قانشالىقتى قادىرلى ەكەنىن اڭعارتادى. سوندىقتان ايەل-انالاردىڭ جان الەمى ارقاشان باقىتقا, قۋانىش-شاتتىققا, مەرەيگە تولا بەرۋى ءۇشىن قولدان كەلگەننىڭ ءبارىن جاساۋ كەرەك.
وشاقتىڭ وتىن مازداتىپ, شاڭىراقتىڭ شىرايىن كىرگىزىپ, بەرەكە مەن بىرلىكتىڭ ۇيىتقىسى بولىپ وتىرعان, وتانىمىزدىڭ كەلەشەگى – جاس ۇرپاق تاربيەلەۋگە جۇرەگىنىڭ كۇشىن, بويىنداعى قايرات-جىگەرىن سارقا جۇمساپ كەلە جاتقان ابزال انالارعا قۇرمەت كورسەتۋ – قوعام ءۇشىن, ءاربىر سانالى ادام ءۇشىن بيىك مارتەبە, زور عانيبەت.
