سۋرەتتى تۇسىرگەن – سەرىك مايەمەروۆ
ماقالادا كەلتىرىلگەن مامانداردىڭ سوزدەرىنشە قوقيقازدار ءبىزدىڭ ەلگە افريكا, تۇرىكمەنستان, اۋعانستان ەلدەرىنەن ءساۋىر ايىندا ۇشىپ كەلىپ, كۇن سۋىتاتىن قىركۇيەك, قازان ايلارىنا دەيىن بولادى. قوقيقازداردىڭ ەلورداعا جاقىن جەردەگى نەگىزگى مەكەنى – قورعالجىن قورىعى, ولار دا سوندا مەكەندەپ, كوبەيەدى.
«قوقيقازدى ورىستار «فلامينگو» دەپ اتايدى, ول لاتىننىڭ «الاۋلاعان وت-جالىن» دەگەن سوزىنەن الىنىپتى. ال قازاقتار ونى قىزىلقانات قاز نەمەسە قىزىلقاز دەپ تە اتايدى. قىزعىلت قوقيقازدىڭ سىرتقى ءتۇرى باسقا قۇستارمەن سالىستىرعاندا ەرەكشە. تۇلعاسى جۇمىر, سيراقتارى ۇزىن, قۇيرىق قاۋىرسىنى قىسقا. قوقيقازدار – جەر بەتىندەگى ەڭ ۇزىن سيراقتى قۇستاردىڭ ءبىرى. تۇمسىعى ۇلكەن ءارى دوڭەس كەلەدى, ۇشى قارا, تومەن قاراي بىتكەن. سودان دا «قوقيقاز» دەپ اتالعان بولۋ كەرەك. بىلاي قاراساڭىز, سىرت كەلبەتى بالەت بيشىلەرىن ەسكە تۇسىرەدى. ايدىنعا توپتاسىپ قونعاندا الاۋلاعان جالىن ءتارىزدى كورىنەدى», دەيدى ماقالا اۆتورى.
ماقالادا قارت قۇستانۋشىلاردىڭ ايتۋىنداعى تسيفرلى دەرەكتەر دە كەلتىرىلگەن: «50-60 جىلدارى 50 مىڭنان اسا قوقيقاز بولسا, 1972-1976 جىلدار ارالىعىندا ولاردىڭ سانى كۇرت ازايىپ – 5-9 مىڭ, 1977 جىلى – 13,500, 1978 جىلى – 35-36 مىڭ, ال قازىر قاتاڭ قورعاۋدىڭ ناتيجەسىندە 25-30 مىڭنان اسادى».
«ەلىمىزدە قىزعىلت قوقيقازداردى قورعاۋ ءۇشىن 1968 جىلى ارنايى قورعالجىن مەملەكەتتىك-تابيعي قورىعى جانە تورعاي مەملەكەتتىك-تابيعي قورىقشاسى قۇرىلعان. قوقيقازدار – اتۋعا مۇلدە تىيىم سالىنىپ, ەرەكشە قورعاۋعا الىنعان قۇس. بۇل اسەم قۇستار تۋريستەر تارتۋدىڭ تاپتىرماس جولى. سول سەبەپتى دە ونىڭ ايدىنعا قونعانى – ەلگە ىرىس كەلگەنىمەن بىردەي», دەپ تۇيىندەيدى ماقالا اۆتورى.
