وبلىس ورتالىعىنداعى دوستىق ۇيىندە وتكىزىلگەن «شۋاق شاشقان مەرەكە» اتتى كونتسەرتتىك باعدارلاما ءوزىنىڭ ءمان-ماڭىزىمەن كورەرمەن كوڭىلىن باۋراپ, سان ساناعا وي سالعانداي. قوعامدىق كەلىسىم مەكەمەسىنىڭ باسشىسى ەرمەك نۇعىمان نازىك جاندىلاردىڭ بۇگىنگى قوعامداعى وزىندىك ورنى تۋرالى تەرەڭنەن تولعاي ايتىپ بەردى. ءار وتباسىنىڭ التىن دىڭگەگىنە اينالىپ وتىرعان اسىل انالاردىڭ ءتول مەرەكەسى كوڭىلدەردى كوكتەم ەتەر ءان-جىرسىز وتكىزىلمەيتىندىگى بەلگىلى. بۇل كۇنى قىز-كەلىنشەكتەرگە الاۋلاعان قۇشاق-قۇشاق گۇل سىيلانىپ, جۇرەك جادىراتار قۇتتىقتاۋ سوزدەر ايتىلدى. ەڭ باستىسى, مەرەكەلىك شاراعا جينالعاندار ونداعان ۇلتتار مەن ۇلىستاردىڭ وكىلدەرى ەدى. ولاردىڭ ءبىر-بىرىنە دەگەن اقجارما سوزىنەن-اق سۇتتەي ۇيىعان تاتۋلىق پەن بەكەم بىرلىكتى ايقىن اڭعارۋعا بولادى. وبلىستىق سلاۆيان, ورىس جانە كازاك ۇيىمدارى قاۋىمداستىعىنىڭ توراعاسى گەننادي وسينەنكونىڭ دا قۇتتىقتاۋ ءسوزى كوپكە وي سالعانداي. ول ءوز سوزىندە ۇلى ونەردىڭ ۇلتتار مەن ۇلىستار اراسىنداعى دوستىقتىڭ التىن ارقاۋىن بەكىتە تۇسەتىن كۇش ەكەندىگىن ايتىپ بەردى.
ەتنومادەني ورتالىقتاردىڭ ونەرپازدارى ءار تىلدە اسەم اندەرىن ورىنداپ, مىڭ بۇرالعان بيلەرىن جينالعان قاۋىمنىڭ نازارىنا ۇسىندى. ءار تىلدە ايتىلعانىمەن, مازمۇن-ماعىناسى جارقىن دۇنيەنىڭ جاراستىعىن بىرگە ءبولىسىپ, ەل تاريحىن بىرگە ءورىسىپ جاتۋدىڭ ءوزى ءبىر باقىت ەكەندىگىن مەڭزەپ تۇرعانداي. قىس بويى قاباعى تۇكسيىپ تۇراتىن كوكشە اسپانى ءدال وسى كۇنى جادىراپ, باۋىرىنداعى تاعدىر تابىستىرعان ءتامام جۇرتتىڭ قۋانىشىنا ءوز شاتتىعىن ەسەلەپ, كوڭىل توستاعانىن شۇپىلدەتە تولتىرىپ تۇرعانداي ەدى.
تاتۋلىققا, ءبىر-ءبىرىن ۇعا بىلگەنگە نە جەتسىن, شىركىن!
كوكشەتاۋ
