قازاقستان مەن ازەربايجان اراسىنداعى ساۋدا-ەكونوميكالىق ىنتىماقتاستىق جونىندەگى بىرلەسكەن ۇكىمەتارالىق كوميسسيانىڭ 20-وتىرىسىنىڭ قورىتىندىسى بويىنشا وتكەن كەزدەسۋ بارىسىندا تاراپتار ەلدەردىڭ ەنەرگەتيكا, مۇناي ءترانزيتى, جاڭارتىلاتىن ەنەرگيا كوزدەرىنىڭ اۋقىمدى جوبالارىن ىسكە اسىرۋ سالاسىنداعى ىنتىماقتاستىعىنا قاتىستى بىرقاتار ماسەلەنى تالقىلادى.
ايتا كەتەيىك, 2022 جىلى پرەزيدەنت قاسىم-جومارت توقاەۆ ترانسكاسپي ءدالىزى بويىنشا مۇناي تاسىمالداۋ كولەمىن ارتتىرۋدى تاپسىرعان بولاتىن. سوعان سايكەس 2022 جىلدىڭ قاراشا ايىندا «قازمۇنايگاز» ۇك اق مەن ازەربايجان رەسپۋبليكاسىنىڭ «SOCAR» مەملەكەتتىك مۇناي كومپانياسى اراسىندا «اقتاۋ – باكۋ – تبيليسي – جەيحان» باعىتىندا مۇناي ءترانزيتى تۋرالى كەلىسىمگە قول قويىلدى.
2023 جىلى اقتاۋ پورتىنان «باكۋ – تبيليسي – جەيحان» باعىتىندا جونەلتىلگەن مۇناي 1 057 مىڭ توننا بولدى. ال بيىل قازاقستاندىق مۇنايدى بتد ارقىلى تاسىمالداۋدى 1,5 ملن تونناعا جەتكىزۋ جوسپارلانىپ وتىر.
«قازترانسويل» اق ءباسپاسوز قىزمەتىنىڭ حابارلاۋىنشا, 2024 جىلدىڭ العاشقى ايىندا اقتاۋ پورتى ارقىلى تاسىمالدانعان قازاقستاندىق مۇناي ەكسپورتىنىڭ كولەمى 287 مىڭ توننانى قۇرادى. ونىڭ ىشىندە اقتاۋ پورتىنان باكۋ پورتىنا قاراي مۇناي تاسىمالداۋ كولەمى 60 مىڭ تونناعا ارتىپ, 116 مىڭ توننانى قۇرادى.
بۇعان دەيىن ۇكىمەت تەڭىز, قاراشىعاناق جانە قاشاعان كەن ورىندارىن كەڭەيتۋ جوبالارى جۇزەگە اسىرىلىپ جاتقانىن مالىمدەگەن ەدى. كەيىنگى ۋاقىتتا مۇناي تاسىمالىن ءارتاراپتاندىرۋ, ەۋروپاعا باعىتتالعان مۇنايدى رەسەيدى اينالىپ ءوتىپ تاسىمالداۋ ماسەلەسى بارىنشا وزەكتى بولىپ وتىر. الداعى ەكى جىلدا ترانسكاسپي باعىتىمەن مۇناي تاسىمالداۋ 3 ملن تونناعا دەيىن جەتكىزىلەدى. جوبا كەزەڭ-كەزەڭىمەن جۇزەگە اسىرىلادى.
ء«بىزدىڭ ۇلتتىق كومپانيالارىمىزدىڭ الدىنا قازاقستاندا ءوندىرىستىڭ ءوسۋىن ەسكەرە وتىرىپ, مۇناي جەتكىزۋ كولەمىن ۇلعايتۋ مىندەتى قويىلدى. وسىعان بايلانىستى ءبىز قازاقستاندىق مۇنايدى جەتكىزۋ كولەمىن ۇلعايتۋدى جوسپارلاپ وتىرمىز», دەپ اتاپ ءوتتى كەزدەسۋ بارىسىندا ا.ساتقاليەۆ.
ەنەرگەتيكا مينيسترلىگىنىڭ باسشىلارى كاسپي تەڭىزىنىڭ تۇبىنە تەرەڭ سۋ كابەلىن توسەۋ ارقىلى كاۆكاز ءوڭىرى مەن ورتالىق ازيانىڭ ەنەرگيا جۇيەلەرىن قوسۋعا باعىتتالعان جوبانى ىسكە اسىرۋ جونىندەگى الدا اتقارىلار جۇمىستاردى دا تالقىلادى.
