«بۇگىن جامبىل اۋدانىنىڭ سپورتتىق ينفراقۇرىلىمى تاعى ءبىر تاماشا عيماراتپەن تولىعىپ وتىر. بۇل عيمارات تەك وسى قاراقاستەك اۋىلىندا عانا ەمەس, اۋداندا سپورتتىڭ دامۋىنا جاڭا سەرپىن بەرەدى دەپ ويلايمىن. اۋىل – ناعىز چەمپيوندار مەكەنى. تابيعات اياسىندا شىمىر بولىپ وسكەن بالالار كەز كەلگەن سپورتقا يكەمدى بولىپ كەلەدى. سوندىقتان اۋىلدى جەرلەردە سپورتتىق نىساندار كوپتەپ سالىنىپ جاتىر», دەگەن وبلىس اكىمىنىڭ ءبىرىنشى ورىنباسارى نۇرلان ءابدىراحىم تۇرعىنداردى قۋانىشىمەن قۇتتىقتادى.
اتالعان سپورت كەشەنىنە بيۋدجەتتەن 719,7 ملن تەڭگە بولىنگەن. ەڭسەلى ەكى قاباتتى سپورت كەشەنىنىڭ جالپى اۋماعى 1509,8 شارشى مەتردى قۇرايدى. سپورت كەشەنىندە بوكس, كۇرەس زالدارى, ۆولەيبول, باسكەتبول, فۋتبول باسقا دا سپورت تۇرلەرىنەن دايىندالۋعا بولاتىن ويىن زالدارى ورنالاسقان. وندا 14 جاتتىقتىرۋشى 600-گە جۋىق ءجاسوسپىرىمدى سپورتقا باۋلىماق. جاڭا اشىلعان سپورت كەشەنىنە ىرگەلەس اققاينار, سۇرانشى باتىر, بەسمويناق, ۇڭگىرتاس, بەرىكتاس, اقتەرەك اۋىلدارىنىڭ جاستارى دا كەلىپ, جاتتىعۋىنا مۇمكىندىك تۋدى.
بۇگىندە اۋدان بويىنشا 232 سپورتتىق نىسان جۇمىس ىستەپ تۇر. ونىڭ ىشىندە 2 ستاديون, 5 سپورت كەشەنى, 84 سپورت زال, 9 جاپسارلاس سپورت زال, 1 يپپودروم, 2 ءجۇزۋ باسسەينى جانە 129 ءارتۇرلى سپورتتىق قۇرىلىم بار.
سونداي-اق اۋداندا بالالار سپورتىن, بۇقارالىق سپورتتى جانە سپورت ينفراقۇرىلىمىن دامىتۋ ماقساتىندا وسى جىلدىڭ اقپان ايىندا «جامبىل اۋدانىنىڭ №2 بالالار مەن جاسوسپىرىمدەر سپورت مەكتەبى» كوممۋنالدىق مەملەكەتتىك مەكەمەسى قۇرىلدى. قازىرگى تاڭدا اۋدان اۋماعىندا جالپى 2 سپورت مەكتەبى جاسوسپىرىمدەردى سپورتقا باۋلىپ جاتىر.
بۇعان قوسا وسى جىلى تارعاپ اۋىلىنا سپورت كەشەنىن سالۋعا قارجى ءبولۋ قاراستىرىلماق. سونىمەن قاتار ۇڭگىرتاس اۋىلىنا دا سپورت نىسانىن سالۋ ءۇشىن جوبالىق-سمەتالىق قۇجات ازىرلەۋ باستالعان.
الماتى وبلىسى
