سونىمەن تالاي قازاق اقش-تى ارمانداپ, سول جاققا كوز تىگىپ جۇرگەندە, امەريكادان بىزگە اڭساپ جەتكەن جىلقى جانۋاردىڭ تۇقىمى بولدى. جەتى اتاسىن بىلەتىندەر اكەسى – دۋبايدا الاماندى بەرمەگەن «كاليفورنيا حروم» دەيدى.
سايگ ۇلىك ساۋداسى دەگەن ءوز الدىنا ءبىر الەم عوي. ەستۋىمىزشە, تاي كۇنىندە-اق اسىل سويىنا تارتىپ تۇرعانىن كورگەن اتسەيىس ءنادىر حاسانوۆ ونى كينەلەند اۋكتسيونىندا ساتىپ الىپتى. «ەكى اپتالىق اۋكتسيوندا 4 مىڭ بايگە جىلقى ىشىنەن تاڭداپ العان» دەيدى بىلگىشتەر. سودان تاي كابىرحان قۇنانعا وتەر شاعىندا الماتى يپپودرومىنا كەلگەن. مۇندا اتجارىسقا ۇيرەتىپ باتپاعان ازامات رۋسلان يۋلداشەۆ ەكەن. بۇگىنگى يەسى كاسىپكەر تىلەك مۇحانبەتقاليەۆ كابىرحاندى 2022 جىلى 12 مىڭ دوللارعا ساتىپ الىپتى. جالپى, بۇل – وسى ازاماتتىڭ جەتى سايگ ۇلىگىنىڭ ءبىرى. ءبارى اعىلشىن تۇقىمدى جىلقىلار. كابىرحاندى دۋبايداعى الامانعا امەريكالىق باپكەر دايىنداپتى.
ات سپورتى ساراپشىلارىنىڭ ايتۋىنشا, دۋبايداعى سايىستا كابىرحانىمىز حيروۋ مو, بۋكرەۆيۋ, ناكسوس, كافۋ, ميستەر رادج, سەلتيك پرينگس سەكىلدى ايگىلى الەم جۇيرىكتەرىن ارتقا قالدىرعان.
تۇلپار يەسى «سايگ ۇلىگىم ءبىرىنشى بولىپ كەلگەندە ايەلىم ۇل تاپقانداي قاتتى قۋاندىم. بۇعان دەيىن رەسەيدەگى 6 بايگەنىڭ 5-ەۋىندە توپ جارىپ ەدى. مىنا دۋباي جارىسىنداعى تۇلپاردىڭ ءبارى الەمنىڭ ۇزدىك ارعىماعى ەسەبىندە. كىل مىقتىنى كورىپ, شەتەلدىكتەر بىزگە كوپ ءمان بەرمەدى. كابىرحاننىڭ تۇياعى مارە سىزىعىن ءبىرىنشى باسقاندا, ساراپشىلار مەن بۋكمەكەرلەر قازاق جىلقىسى تۋرالى ايتا باستادى», دەيدى.
ەسكە سالايىق, قاڭتارداعى المانعا قاتىسۋ ءۇشىن كابىرحان دۋبايعا 11 قاراشادا ارنايى ۇشاقپەن جەتكىزىلگەن. ەندى 30 ناۋرىزداعى شەشۋشى الاماندى سول جاقتا كۇتەدى. ياعني ابدەن باپتالادى.
وقىرمان: «2023 جىلدىڭ قاراشاسىندا بىرىككەن اراب امىرلىگىنە جەتكەن كابىرحان 2 جارىسقا قاتىسىپتى. يەسىنىڭ قانجىعاسىنا بايلاعان ولجاسى قانداي ەكەن؟» دەپ سۇرايدى. وعان جاۋاپتى اشىق دەرەك كوزدەرىنەن تاپتىق: بىرىنشىسىندە – 15,5 ميلليون تەڭگە, ەكىنشىسىندە (12 قاڭتار) 1 ميلليون دوللار ۇتقان. ءدال سول جەڭىستەن سوڭ تىلەك مۇحانبەتقاليەۆكە «اتىڭدى سات. سۇراعان اقشاڭدى بەرەمىز» دەۋشىلەر كوبەيگەن. يەسى: «كابىرحان ساتىلمايدى!» دەپ ءبىر-اق كەسكەن دەسەدى. ءدال وسى تۇستا بىزگە تىلەك مىرزانىڭ كەسەك پايىمى ۇنادى: «بۇل – قازاق حالقىنىڭ تۇلپارى. ەندى ونىڭ جەڭىسىن ەل بولىپ تىلەيىك!».
ات سپورتى ماماندارىنىڭ پىكىرىنشە, الەمدىك جارىستارعا ءبىر سايگ ۇلىكتى 7-8 ادام باپتايدى. ونىڭ بارلىق شىعىنىن جارىسقا قاتىسۋشى ءوزى كوتەرەدى. سوندىقتان وسىعان دەيىنگى جارىستارداعى كابىرحاننىڭ جەڭىس قارجىسىنىڭ كوپ بولىگى ءوزىنىڭ كۇتىمىنە كەتەدى. اسىل تۇقىمدى تۇلپاردىڭ كۇتىمى دە, جەمشوبى دە, ءۆيتامينى دە بەلگىلەنگەن ستاندارتقا ساي بولۋى كەرەك.
الدا – الەمنىڭ 16 سايگ ۇلىگى باق سىنايتىن ۇلكەن بايگە. قازاقستانداعى بۇكىل اتبەگى, اتسەيىس, اتباپكەر قاۋىمى مەن جالپى جىلقى ءدۇبىرىن ساعىناتىن جۇرتشىلىق دونەن كابىرحانعا زور ءۇمىت ارتىپ وتىر. بىرىككەن اراب امىرلىگىندەگى «باس بايگە» سالىمىنىڭ قۇنىن دا ايتا كەتەيىك – 7 ميلليون 200 مىڭ اقش دوللارى!
ەندى ءبىراۋىز ءسوز سايگ ۇلىكتىڭ نىسپىسى تۋرالى.
الەۋمەتتىك جەلىلەردە ەل ازاماتتارى: «ونىڭ اتى نەگە بايشۇبار, تايبۋرىل, اقبوزات, كوكبوزات, قۇلاگەر, لاشىن, كوكداۋىل, ت.ب. ەمەس؟ قالاي دەگەنمەن قازاق نامىسىن قورعاپ ءجۇر عوي» دەپ سۇراق قويا باستادى. ءتىپتى كەيبىرى: «قابىرى نەسى؟ تۇلپارعا مولا اتاۋىن بەرەتىندەي نە كۇن تۋدى؟» دەپ تە جاتتى. ءبىز وسى ەسىمىنىڭ ءتۇپ-توركىنى, ەتيمولوگياسى جونىندە اراب ءتىلىنىڭ پروفەسسورى سامال تولەۋباەۆا حانىمنان پىكىر سۇراپ ەدىك. ماقالامىزعا وسىنى قوسا ۇسىنىپ وتىرمىز.
ايتۋعان دوسبي
