قازاقشا ۇيرەنىپ, ءتىلدى تەرەڭ تانىعىسى كەلگەندەرگە ارنالعان بۇل قوسىمشادا ۇلتتىڭ ۇلى تۇلعالارىنىڭ قاناتتى سوزدەرى, ەل اراسىندا كەڭ قولدانىس تاپقان ماقال-ماتەلدەر جانە تۇراقتى تىركەستەر بار. قوسىمشا ويلاپ تاپقان قوس قۇربى اۋەلگى بولىمدە سوزدەردى اۆتورلارى بويىنشا جىكتەپ, ماقال-ماتەلدەردى تاقىرىپقا بولگەن. «تۇراقتى تىركەستەر» بولىمىندەگى سوزدەر الىپپە رەتتىلىگىمەن ورنالاسىپ, ءار ءسوزدىڭ ورىس, اعىلشىن تىلىندەگى اۋدارماسى مەن اۋديو جازباسى قوسا ۇسىنىلىپ وتىر. جوبا جەتەكشىسى وسى مەكتەپتىڭ ينفورماتيكا ءپانى مۇعالىمى ءادىلجان ناۋان. قوسىمشا اۆتورلارى جوبا ارقىلى قوعامدا قازاق ءتىلىنىڭ مارتەبەسىن كوتەرىپ, ونىڭ قولدانۋ اياسىن كەڭەيتۋدى كوزدەگەنىن ايتادى.
«مىسالى, ءبىزدىڭ قاتارلاستارىمىزدىڭ كوپشىلىگى تۇراقتى تىركەستەردىڭ, ماقال-ماتەلدەردىڭ ماعىناسىن تۇسىنە بەرمەيدى. ال ولار جانىنان تاستامايتىن ۇيالى تەلەفونداعى قوسىمشا كۇندەلىكتى ومىردە قولداناتىن سوزدىك قورىمىزعا ءتۇرلى تۇراقتى تىركەستەردى, قاناتتى سوزدەردى ەنگىزۋدىڭ ءتيىمدى جولىن ۇسىنادى. جوبا قازاق تىلىنە تەرەڭ لينگۆيستيكالىق تالداۋ جۇرگىزىپ, سونىمەن قاتار ولاردىڭ ءمان-ماعىناسىن, قولدانۋ اياسىن زەرتتەپ قولدانۋشىعا ءتىلدى تەرەڭىرەك مەڭگەرۋگە مۇمكىندىك بەرەدى», دەيدى اۆتورلار.
قازىر قوسىمشاداعى دەرەك قورى تولىقتىرىلىپ جاتىر. جاقىندا «Naqyl söz»-ءدى اركىم ءوز سمارتفونىنا Play Market, AppStore ەلەكتروندى دۇكەندەر ارقىلى جۇكتەي الادى. بىلتىر عىلىمي جوبالار بايقاۋىندا جەڭىمپاز اتانعان قوسىمشانىڭ demo نۇسقاسىن العاش وسى مەكتەپ وقۋشىلارى پايدالانىپتى.
قوس قۇربى جوبانى قولعا الۋدان بۇرىن قازاق ءتىلىن ۇيرەنۋگە ارنالعان ءموبيلدى قوسىمشالاردى جەتە زەرتتەگەن ەكەن. كوپ ءسوزدىڭ ءمان-ماعىناسىن ۇعىنا بەرمەيتىن قاتارلارىنا كومەك رەتىندە باستالعان جوبا ءتىل ۇيرەنىپ, حالىق ناقىلدارى ارقىلى سوزدىك قورىن بايىتقىسى كەلەتىندەردىڭ ءبارىن قامتيدى.
قىزىلوردا
