اتىندا تۇرعانداي, «Birlik» الەم حالىقتارىنىڭ مادەنيەتىن ناسيحاتتايدى. ءار حالىقتىڭ ءانى مەن ءبيىن اسپاپتىق سۇيەمەلدەۋمەن ورىندايتىن حالىقارالىق ۇجىمنىڭ قۇرامىنا ەلىمىزدە تۇراتىن ەتنوس وكىلدەرىنىڭ اراسىنان ۇزدىك 20 ءبيشى مەن مۋزىكانت ىرىكتەلىپ الىنعان. ۇجىمنىڭ ەرەكشە ءارى ەكسكليۋزيۆتى بي كومپوزيتسيالارىن قويۋعا رەسەي, تاتارستان, وزبەكستاننان شاقىرىلعان كورنەكتى شەتەل ماماندارى جانە قازاقستاننىڭ ەڭبەك سىڭىرگەن قايراتكەرلەرى اتسالىسىپتى. العىس ايتۋ كۇنىنە ورايلاستىرىلعان بۇگىنگى كونتسەرتكە قىزۋ دايىندىقتى كەشە قويۋشى رەجيسسەر سايان مىرزا, حورەوگرافتار انەل ماراباەۆا, ايدا بەكيشوۆا, بالەتمەيستەر جاناتاي قوجابەكوۆ جۇرگىزىپ جاتىر.
«Birlik» ءانسامبلىنىڭ ەرەكشەلىگى ءبىزدىڭ ەلدە تۇراتىن ەتنوس وكىلدەرىنىڭ ارتىستەرىنەن جاساقتالىپ وتىر. «وتانىمىزداعى ءار حالىقتىڭ ونەرى مەن مادەنيەتىن, فولكلورىن, ءتىپتى ۇمىتۋعا اينالىپ بارا جاتقان قۇندىلىقتارىن كورسەتۋدى كوزدەدىك. ولاردىڭ ارقايسىسىنىڭ ءانى مەن بيىنەن بولەك اسپاپتارى – ءوز الدىنا ءبىر توبە. سونىمەن قاتار ەلىمىزدەگى ەتنوستاردان قۇرالعان انسامبل ارقىلى رۋحاني تۇتاستىقتى ايگىلەگىمىز كەلەدى. انسامبلدە انشىلەر, بيشىلەر, ءارتۇرلى اسپاپتا ورىنداۋشىلار ونەر كورسەتەدى. ونەرپازداردى ءبىز نەبارى ءبىر جارىم ايدىڭ ىشىندە ىرىكتەپ الدىق», دەيدى كونتسەرتتىڭ قويۋشى رەجيسسەرى سايان مىرزا.
حورەوگراف, مادەنيەت قايراتكەرى ايدا بەكيشەۆانىڭ ايتۋىنشا, انسامبلدە قازاق قىزدارىمەن قاتار وزگە ۇلت وكىلدەرى دە بارشىلىق. «اتاپ ايتقاندا, ورىس, كارىس, وزبەك, تاعى باسقا ەتنوس وكىلدەرى بار. بۇلاردىڭ ءبارى استانالىق ەمەس, باسقا دا ايماقتاردان ىرىكتەلدى. ماسەلەن, ورىستىڭ قىزى وزبەك ءبيىن, ۋكراين قىزى كارىس ءبيىن, تاتار, ورىس قىزى قازاقتىڭ ءبيىن بيلەگەنىن تاماشالاي الاسىزدار. تەك قانا بي ەمەس, ءارتۇرلى جانر قامتىلدى. ءان, مۋزىكا, حور, ەتنوستاردىڭ ۇلتتىق اسپاپتارى. بۇيىرسا, بارلىعىن ون بەس نومىرگە سىيدىرۋدى جوسپارلاپ وتىرمىز. شاما كەلگەنشە قىسقا-نۇسقا قويۋعا تىرىستىق. ءبىر بۇرىشتان بيشىلەر شىقسا, ءبىر شەتتەن بارابان, ەكىنشى جاقتان ارفا, انا جەردە «استانا سازى» ويناپ تۇرادى دەگەندەي. مىسالى, تاتار ءبيىنىڭ دايىندىعىن قازاننان كەلگەن تاتارستاننىڭ ەڭبەك سىڭىرگەن ارتىستەرى ۇيىمداستىرىپ كەتتى. وزبەكتەردىڭ ءبيىن فەرعانادان كەلىپ قويدى. چەشەن-ينگۋشتاردىڭ ونەرىن كىرىكتىرۋگە الماتىدان وزدەرىنىڭ مادەني بىرلەستىگىنەن «باھور» ءبيىن بيلەۋشى ۇجىم اتسالىسۋدا. جالپى ايتقاندا, مۇندا ءبىز ورتاق وتانداعى باۋىرلاستىقتى نەگىز ەتەمىز», دەيدى ول.
قاي حالىقتىڭ بولسىن ءتولتۋما سيپاتى ۇلتتىق ءان-كۇيى مەن بيىنەن كورىنەتىنى بەلگىلى. ال سونىڭ ءبارىن ءبىر ارناعا بىرىكتىرىپ, حالىققا ۇسىنۋدا شىعارماشىلىق ۇجىمنىڭ ەڭبەگى وراسان ەكەنى ايتپاسا دا تۇسىنىكتى.
«بۇرىن قازاقستان اسسامبلەياسى كۇنىندە ونەرپازداردى بۇكىل ايماقتان جيناپ اۋرەگە تۇسەتىن ەدىك. ول ايتارلىقتاي قيىندىق تۋدىراتىن. ەندى سونىڭ ءبارى وسى «Birlik» ءانسامبلىنىڭ قۇرامىنان تابىلادى. جانە بارلىعىن جوعارى دەڭگەيدە ۇيىمداستىرۋعا تىرىستىق. بولاشاقتا بۇل ۇجىم كەڭەيتىلىپ, كوركەيە تۇسەدى دەگەن ويدامىز. ەلىمىزدە تۇرىكتەر, بەلورۋستار, مولدوۆاندار, ۋكرايندار دا بار ەمەس پە؟ كەلەسى دايىندىقتارعا ولار دا شىعادى. بولاشاقتا استانادا عانا قالىپ قويماي, قازاقستاننىڭ باسقا دا قالالارىن ارالاۋىمىز مۇمكىن», دەيدى بالەتمەيستەر-حورەوگراف جاناتاي قوجابەكوۆ.
«Birlik» ءانسامبلىنىڭ قۇرامىندا ونەر كورسەتەتىن جاس ءبيشى الەكساندرينا حوميتسكايا كورەي حالقىنىڭ ءبيىن بيلەيتىنىن ايتادى.
ء«بيدى الەم حالىقتارى ءبيىنىڭ ءسوليسى انەل ماراباەۆا قويدى. كەزىندە وسى ءبيدى ءوزى بيلەگەن ەكەن. ەندىگى كەزەك ماعان كەلگەن سياقتى. مەن ءۇشىن بۇل – ۇلكەن مارتەبە. ورىندايتىنىم فيلوسوفيالىق ءنومىر دەسە بولادى. ەرجۇرەك قىزدىڭ جاندۇنيەسىنىڭ تەرەڭدىگىن بي ارقىلى كورسەتە الۋىم كەرەك. ارينە, ۇلكەن جاۋاپكەرشىلىكتى تالاپ ەتەتىن بي. جالپى, كونتسەرت كورەرمەننىڭ كوڭىلىنەن شىعادى دەگەن ويدامىن», دەدى ءبيشى.
