اتالعان جارىستىڭ تۇساۋى 1985 جىلى كەسىلدى. سول كەزدەن بەرى 18 مارتە ۇيىمداستىرىلعان دودا تورتكۇل دۇنيەنىڭ ءار قيىرىندا ءوتتى. ول باسەكەلەردە ەڭ كوپ ولجاعا كەنەلگەن – اقش قۇراماسى. امەريكالىقتار 231 (101 التىن+63 كۇمىس+67 قولا) جۇلدە ولجالادى. ەكىنشى ورىندا – رەسەي. ولار 145 (52+48+45) مەدالدى يەلەندى. سونداي-اق ەفيوپيا, ۇلىبريتانيا, گەرمانيا, يامايكا جانە كۋبا سپورتشىلارى كەمىندە 15 رەتتەن جەڭىس تۇعىرىنىڭ ەڭ بيىك ساتىسىنا كوتەرىلدى.
جەكەلەگەن جەڭىل اتلەتتەر اراسىنان ناتاليا نازاروۆا مەن ماريا مۋتولانى ايرىقشا اتاپ وتۋگە بولادى. 400 مەتر جانە 4ح400 مەترلىك ەستافەتادا سايىسقا تۇسكەن رەسەي سپورتشىسى 1999-2010 جىلدار ارالىعىندا قاتارىنان توعىز جارىستا 7 التىن مەن 2 قولا ولجالادى. 1993-2008 جىلدارى ونەر كورسەتكەن موزامبيكتىڭ جەلاياعى 800 مەترگە جۇگىرۋدە 7 التىن, 1 كۇمىس جانە 1 قولانى ەنشىلەدى. كۋبالىق ۇزىندىققا سەكىرۋشى يۆان پەدروسو مەن بولگاريالىق بيىكتىككە سەكىرۋشى ستەفكا كوستادينوۆا بەس رەتتەن تەڭدەسسىز دەپ تانىلدى.
قازاقستاننىڭ جەڭىل اتلەتتەرى جابىق عيماراتتاعى الەم چەمپيوناتىنا سان مارتە قاتىستى. العاشقى جۇلدەگە 1995 جىلى قول جەتكىزدىك. بارسەلوناداعى باسەكەدە ولگا شيشيگينا (60 مەترگە كەدەرگىلەر ارقىلى جۇگىرۋ) مەن ولەگ پوتاپوۆيچ (سىرىقپەن سەكىرۋ) كۇمىس مەدالدى موينىندا جارقىراتتى. شيشيگينا كۋبالىق اليۋسكا لوپەستىڭ الدىن وراي الماسا, پوتاپوۆيچ ۋكراينانىڭ ماقتانىشى سەرگەي بۋبكادان قالىپ قويدى. ەسەسىنە جوعارىدا ەسىمدەرى اتالعان ايگىلى وتانداستارىمىز ۋاقىت وزا وزدەرىنىڭ كۇمىس جۇلدەلەرىن التىنعا الماستىردى. تارقاتىپ ايتساق, 1997 جىلى پاريجدە پوتاپوۆيچ جانە 1999 جىلى جاپونيانىڭ ماەسابي قالاسىندا شيشيگينا قازاقستاننىڭ ءانۇرانىن شىرقاتتى.
2008 جىلى يسپانيادا ونسايىسشى دميتري كارپوۆ ءۇشىنشى ورىندى يەلەندى. ءدال سول كەزدەرى 24 جاستاعى ولگا رىپاكوۆانىڭ ءداۋىرى باستالدى. ءۇش قارعىپ سەكىرۋشىلەر سايىسىندا ول ۆالەنسيادا قولاعا قول سوزسا, 2010 جىلى دوحادا التىن الىپ, 2012 جىلى ىستانبۇلدا كۇمىسپەن كۇپتەلدى. سودان كەلەسى جۇلدەنى باقانداي 10 جىل كۇتۋگە تۋرا كەلدى. 2022 جىلى بەلگرادتا بيىكتىككە سەكىرۋشى نادەجدا دۋبوۆيتسكايا ءۇشىنشى ورىنعا تابان تىرەدى. مىنە, جەرلەستەرىمىزدىڭ اتالعان جارىستا قول جەتكىزگەن تابىستارى وسىنداي.
وسىدان ەكى جىل بۇرىن سەربيانىڭ استاناسىندا ۇيىمداستىرىلعان سوڭعى الەم چەمپيوناتىندا اقش قۇراماسى جۇلدەلەر سانى جاعىنان بارلىق قارسىلاسىنان قارا ءۇزدى. امەريكالىقتار 19 رەت جەڭىس تۇعىرىنا كوتەرىلگەنىمەن, جالپى ەسەپتە كوش باستاي المادى. اۋىزىن ايعا بىلەگەن الپاۋىت مەملەكەتتىڭ اتلەتتەرى ەفيوپيادان قالىپ قويدى. قارا قۇرلىقتىڭ جەلمەن جارىسقان جەلاياقتارى نەبارى 9 جۇلدەنى قاناعات تۇتتى. ەسەسىنە ولاردىڭ مەدالدارى ساپالى بولدى. انىقتاپ ايتساق, اقش 3 التىن, 7 كۇمىس جانە 2 قولانى ولجالاسا, افريكالىقتار 4 التىن, 3 كۇمىس جانە 2 قولانى قورجىنعا سالدى. سپورتتىق ەرەجەگە ساي قاي كوماندانىڭ التىنى كوپ بولسا, سول العا شىعادى.
گلازگوعا اتتاناتىن ەكى سپورتشىمىزدىڭ اراسىنان نادەجدا دۋبوۆيتسكاياعا زور سەنىم ارتامىز. 25 جاستاعى سەمەي ءوڭىرىنىڭ تۋماسى بەلگرادتاعى جارىستان بولەك, ازيا ويىندارىندا ەكى رەت جانە قۇرلىق چەمپيوناتىندا ءبىر رەت جۇلدەلى ورىندى يەلەندى. جابىق عيماراتتاعى ازيادادا التىننان القا تاقتى. وليمپيا ويىندارىنا قاتىسىپ, الەم چەمپيوناتىنىڭ ءفيناليسى بولدى. ەندى نادەجدا گلازگودا دا بارىنشا بيىككە سەكىرىپ, ەل سەنىمىن اقتايدى دەپ ۇمىتتەنەمىز.
داۆيد ەفرەموۆتىڭ دە جاسى – 25-تە. ول دۋبوۆيتسكايامەن بىرگە وسكەمەندە ىرگەتاسى قالانعان «التاي اتلەتيكس» كلۋبىندا جاتتىعادى. جەرلەسىمىز بىلتىر جابىق عيماراتتا 110 مەترگە كەدەرگىلەر ارقىلى جۇگىرۋدە 7,65 سەكۋندتىق ناتيجەمەن استانادا ازيا چەمپيونى اتاندى. دەسەك تە الەمدىك دودادا جەڭىل اتلەتيكانىڭ بۇل تۇرىندە باسەكەلەستىك وتە كۇشتى. سوندىقتان دا ەفرەموۆكە گلازگودا جەڭىس تۇعىرىنا كوتەرىلۋ قيىن بولادى.
