فوتو: unaids.org
مەملەكەتىمىزدىڭ ايتۆ-عا بايلانىستى قۇقىق قورعاۋ, كەمسىتۋدىڭ كەز كەلگەن تۇرىنە جول بەرمەۋ تۋرالى كەپىلدىكتەرى قازاقستان رەسپۋبليكاسىنىڭ كونستيتۋتسياسى مەن حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكستە زاڭنامالىق دەڭگەيدە بەكىتىلگەنى بارشاعا ايان.
قازىرگى تاڭدا ەلىمىزدە ايتۆ-ينفەكتسياسىنىڭ الدىن الۋ, تەستىلەۋ, ەمدەۋ مەن كۇتىمدى قامتاماسىز ەتۋگە باعىتتالعان يۋنەيدس 95-95-95 ستراتەگياسى جۇزەگە اسىرىلىپ كەلەدى. ايتۆ جۇقتىرىپ العانداردىڭ 82%-ى ءوزىنىڭ جاعدايىن بىلەدى, ونىڭ ىشىندە 88%-ى انتيرەتروۆيرۋستىق تەراپيا (ارت) قابىلدايدى, ايتۆ-احۋالدى 90%-ىندا ۆيرۋستىڭ اۋىرتپالىعى باسىلعان.
ەڭ باستىسى ەلىمىزدىڭ بارلىق وڭىرلەرىندە پروفيلاكتيكانىڭ يننوۆاتسيالىق ءادىسى – جاناسۋعا دەيىنگى ءتۇرى ەنگىزىلىپ جاتىر. جيتس, تۋبەركۋلەز جانە بەزگەكپەن كۇرەس جونىندەگى جاھاندىق قور جوباسىنىڭ ارقاسىندا ايتۆ-نىڭ الدىن الۋ جونىندەگى وڭىرلىك ورتالىقتاردىڭ 15 زەرتحاناسى اۆتوماتتاندىرىلعان پتر جابدىقتارىنا قول جەتكىزدى. جىل سايىن حالىقتىڭ وسال توبىنا جاتاتىن ينەكتسيالىق ەسىرتكى قولداناتىندار, جىنىستىق قىزمەت كورسەتەتىندەر, ەر ادامدارمەن جىنىستىق قاتىناسقا تۇسەتىن ەر ادامدار ايتۆ-عا تەكسەرىلىپ جاتادى. بارلىق مەديتسينالىق تالاپتاردى ورىنداعان جاعدايدا, ايتۆ-احۋالدى ايەلدەردىڭ 98%-ى ومىرگە دەنى ساۋ بالا اكەلە الادى. سول سياقتى ناۋقاستارعا دياگنوز قويىلعاننان كەيىن بىردەن تاعايىندالىپ, تەگىن بەرىلەتىن ارت بۇرىنعىدان دا قولجەتىمدى.
«ەگەر قوعامدا ايتۆ-عا قاتىستى تەرىس كوزقاراستار مەن كەمسىتۋشىلىك بەلەڭ الماعاندا, وسى ناتيجەلەردىڭ سالماعى الدەقايدا جوعارى بولۋى مۇمكىن ەدى. سوندىقتان ءالى دە الالاۋدى تولىعىمەن جويۋعا نازار اۋدارۋ قاجەت. بۇل ايتۆ-ينفەكتسياسىن جۇقتىرۋ قارقىنىن ايتارلىقتاي تومەندەتۋگە ىقپالىن تيگىزەدى», دەيدى دسم قازاق دەرماتولوگيا جانە ينفەكتسيالىق اۋرۋلار عىلىمي ورتالىعىنىڭ ديرەكتورى باۋىرجان بايسەركين.
ال بيىل, 2024 جىلى «نولدىك كەمسىتۋشىلىك» كۇنى الەمدە ونىنشى رەت اتالىپ وتىلەدى. ءار ادامنىڭ قۇقىعىن قورعاۋ – ءبىزدىڭ ورتاق مىندەتىمىز. ەگەر اركىمنىڭ قۇقىعى قورعالسا, ءبىز ايتۆ-نى تولىعىمەن جويا الامىز.
