پاۆلوداردىڭ ۋسولكا جانە زاتون شاعىن اۋداندارىنداعى 1 200 وقۋشىعا ارنالعان ءبىلىم شاڭىراعىنىڭ قۇرىلىسى بيىل باستالۋى ءتيىس. اۋەلى عيماراتتى اۋداننىڭ وزىندە تۇرعىزۋ جوسپارلانعان ەكەن. بىراق ول جەردە بوس ورىن تابىلماي, اكىمدىكتەگىلەر ءبىلىم بەرۋ سالاسىنا جاۋاپتى ۇيىمدارمەن اقىلداسا كەلە, ەرتىس وزەنىنىڭ ءدال جاعاسىنان سالامىز دەپ ۇيعارعان. ول ءۇشىن بىلتىر كەمە جوندەۋ زاۋىتىن وزگە جەرگە كوشىرمەكشى بولىپ, ۇلكەن شۋ شىققان ەدى. بۇل تۋرالى وتكەن جىلدىڭ قاراشا ايىندا گازەتىمىزدە «قوس كاسىپورىنعا قاۋىپ ءتونىپ تۇر» دەگەن ماقالا دا جاريالاعان ەدىك. اقىر-سوڭى قوعام وكىلدەرىنىڭ ارالاسۋىمەن كەمە جوندەۋ زاۋىتى ورنىندا قالدىرىلدى. ودان كەيىنگى نۇسقا – زاتون شاعىن اۋدانىنداعى 48 جەر ءۇيدى ءسۇرىپ تاستاپ, سول جەرگە تۇرعىزۋ ەدى. بىراق ءۇي يەلەرىمەن كەلىسۋ, ساتىپ الۋ كوپ ۋاقىتتى الاتىن بولعاندىقتان, شەنەۋنىكتەر ول يدەيادان دا باس تارتتى. ەڭ سوڭىندا جەرگىلىكتى اكىمدىك «قازاق زاعيپتار قوعامىنىڭ» پاۆلودارداعى فيليالى تۇرعان جەرگە سالامىز دەگەن بايلامعا كەلدى.
وتكەن اپتادا وبلىسقا جۇمىس ساپارىمەن كەلگەن ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا بۇل ماسەلەگە كوڭىل اۋدارىپ, اكىمدىكتىڭ جوسپارىمەن تانىستى.
«وبلىس باسشىلىعى زاعيپتار قوعامى ءۇشىن وزگە جەردەن جاڭا عيمارات بەرىلىپ, تىگىن تسەحى ءۇشىن جاڭا تىگىن ماشينكالارى ساتىپ اپەرىلەتىنىن ايتىپ وتىر. ءارى قازىرگى كەشەنگە جاقىن تۇراتىن جانداردى جاڭا ورىنعا تەگىن تاسىمالدايتىن اۆتوبۋس ۇيىمداستىرىلادى. مەنىڭشە, بۇل قولايلى جاعداي. اتالعان كاسىپورىندا 40 ادام جۇمىس ىستەيدى. ال جاڭادان سالىناتىن مەكتەپتىڭ قىزىعىن 1 200 وقۋشى كورەتىن بولادى», دەدى سۆەتلانا جاقىپوۆا بۇقارالىق اقپارات قۇرالدارىنا بەرگەن سۇحباتىندا.
قالالىق ءبىلىم بەرۋ ءبولىمىنىڭ باسشىسى قۋانىش قىدىراليننىڭ سوزىنشە, ۋسولكا مەن زاتون شاعىن اۋداندارىنداعى وقۋشىلار ورنىنىڭ جەتىسپەۋشىلىگى مىڭ جارىمنىڭ ۇستىندە. كەيىنگى ءۇش جىلدا وقۋشىلار سانى ەسەلەپ ارتىپ, جاڭا مەكتەپ سالۋ جوباسىن تەزدەتۋدى قاجەت ەتىپ وتىر.
پاۆلودار
