ەڭ العاش پەترۋچچيو رولىندە شاكەن ايمانوۆ ويناسا, كاتارينانى كسرو حالىق ءارتىسى حاديشا بوكەەۆا كەمەلىنە كەلتىرە كەيىپتەپ, كوركەمدىك بيىكتە قۇيقىلجىتقان ەدى. ساڭلاقتار سالعان سارا جولدى اراعا 70 جىل سالىپ ەلوردالىق جاستار تەاترى ساحناسىندا تاماشا تاندەم – قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى ءادىل احمەتوۆ پەن اكتريسا اينۇر راحيپوۆا زاماناۋي كوزقاراس, جاڭاشا ساراپتاۋدا كورەرمەنىنە قايتا ۇسىندى. العاش ساحنالانعان كۇننەن-اق كوپشىلىك كوڭىلىنەن شىققان قويىلىم 10 جىل بويى انشلاگپەن ءوتىپ كەلە جاتقانىنا كۋامىز. 2013 جىلدىڭ جەلتوقسان ايىندا وتكەن پرەمەراداعى ءنوپىر كورەرمەن 10 جىلدان بەرى تيتتەي دە سەيىلگەن ەمەس. كەرىسىنشە, قاي كەزدە كورسەڭ دە ايتۋلى كومەدياعا بيلەت تابا الماي سارىلعان, سابىلعان حالىق. وسىدان-اق سپەكتاكلدىڭ دەڭگەيىن باعامداي بەرۋگە بولاتىن شىعار. 10 جىل بويى رەپەرتۋار رەيتىنگىسى مەن تەاتر فەستيۆالدارىنىڭ الدىن بەرمەي كەلە جاتقان سپەكتاكلدىڭ ساحناداعى 10 جىلدىق جەمىستى جەتىستىگىن كەشە تەاتر ۇجىمى كورەرمەنىمەن بىرگە تاعى ءبىر مارتە ەسكە ءتۇسىرىپ, تەاتر ءىشىن ناعىز ونەر مەرەكەسىنە ۇلاستىردى.
دراماتۋرگيا ءدۇلد ۇلى قالتاي مۇحامەدجانوۆتىڭ سوزىمەن ايتساق, شەكسپير شىعارماسىن ساحناعا قويۋ – ءاربىر ونەر يەسىنىڭ بۇعاناسى بەكىپ ەسەيۋىندەگى ۇلى ەمتيحان. ال جاستار تەاترىنىڭ وسى سىناققا باتىلدىقپەن كەلىپ, كلاسسيكالىق كومەديانىڭ پەرنەسىن ءدوپ باسۋى, ۇلكەن جەتىستىك دەر ەدىك. رەجيسسەر, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى نۇرقانات جاقىپباي قولتاڭباسىنا ءتان جاڭاشىلدىق پەن توسىننان, تىڭنان ورىلەر رەجيسسەرلىك تاپقىرلىقتار شەكسپير شىعارماسىنىڭ شىن مانىندە شىرايىن كىرگىزدى.
ۇزاق جىلدار بويى كورەرمەن قاۋىمنىڭ سۇيىكتى سپەكتاكلىنە اينالعان «اساۋعا تۇساۋدا» اكتەر ءادىل احمەتوۆ ايرىقشا جارقىرادى. شاكەن ايمانوۆ سالعان تۇڭعىش سۇرلەۋدى كەيىن ىدىرىس نوعايباەۆ جالعاسا, بۇل قويىلىمدا ەستافەتا اكتەر ءادىل احمەتوۆكە ءتيىپتى. فاكتۋرا, قيىمىل-ارەكەت, سىر-سىمبات جاعىنان كەيىپكەر بولمىسىن تاپ باسىپ تانىعان رەجيسسەر تاڭداۋى ءدوپ تۇسكەن. وزىنە جۇكتەلگەن جاۋاپكەرشىلىكتى اكتەردىڭ دە ءجىتى سەزىنگەندىگى ءسوز ساپتاسى مەن ساحناداعى ءجۇرىس-تۇرىسىنان ايقىن اڭعارىلادى. ءسوزى انىق, ارەكەتى نىق. كەيىپكەرىن بارىنشا جاندى ەتىپ شىعارۋعا تىرىسقان. سەرىلىك پەن سەرگەكتىك, فاكتۋرا مەن ىشكى تەرەڭدىك قاتار ورىلگەن پەترۋچچيو بەينەسى ءادىل احمەتوۆتىڭ كەيىپتەۋىندە كوركەمدىك بيىككە كوتەرىلگەن. اكتەر كەيىپكەر كىلتىن اداسپاي تاپقان. ءارتىستىڭ ءبىتىم-بولمىسى, رولگە قونا كەتكەن كەلىستى كەلبەت, ساحناداعى ءابجىل قوزعالىسى مەن ەسەپسىز ەنەرگياسى ناعىز پەترۋچچيونى كوز الدىمىزعا اكەلدى. ءسوزىمىزدىڭ ايعاعى – اكتەر ءادىلدىڭ سومداۋىنداعى ايتۋلى ءرول ماماندار تاراپىنان جوعارى باعالانىپ, قازاقتىڭ تۇڭعىش رەجيسسەرى ج.ءشانيننىڭ 125 جىلدىعىنا ارنالعان تۇركى الەمى تەاترلارىنىڭ «تەاتر كوكتەمى – 2017» حالىقارالىق فەستيۆالىندە پەترۋچچيو رولىمەن «قويىلىمداعى ۇتىمدى بەينە» اتالىمىندا توپ جارعان ەدى. تالانتتى ءارتىستىڭ شەبەرلىگى مەن جالپى قويىلىمنىڭ كوركەمدىك ساپاسىنا بەلگىلى رەسەيلىك شەكسپيرتانۋشى عالىم الەكسەي بارتوشەۆيچ: «اساۋعا تۇساۋدى» اۆتور جاستىق شاعىندا جازعان, سوندىقتان دا پەسانىڭ ءون بويى جاستىق جالىنعا تۇنىپ تۇر. وسىنى رەجيسسەر تەاتردىڭ جاس ەرەكشەلىگىنە, اۋديتورياسىنا ساي وتە ۇتقىر دا ءدوپ تاڭداعان. جاستاردىڭ ىشكى ەنەرگيا, جالىندى جاسامپازدىعى, ساحناداعى كوز ىلەستىرمەس شاپشاڭ قيمىلى شىن مانىندە سۇيسىنتەدى. اسىرەسە پەترۋچچيوعا ء(ادىل احمەتوۆ) ءتانتى بولدىم. اكتەر تەك بوي سۇڭعاقتىعى, سىرتقى كەلبەت كوركەمدىگىمەن عانا ەمەس, ىشكى اكتەرلىك شەبەرلىگىمەن دە, داۋىس مانەرىمەن دە كوڭىلگە بەرىك ورنىعىپ, كورەرمەن قويىلىم سوڭىندا ءوز پەترۋچچيوسىمەن قيماي قوشتاسادى. مەنىڭ دە كوڭىلىمدە سونداي ءبىر قيماستىق سەزىم قالدى», دەپ قازاق اكتەرىنە تاڭداي قاعا قول سوققان ەدى.
ال كەزىندە اتالعان بەينەنى ءبۇتىن وبراز بيىگىنە كوتەرگەن كسرو حالىق ءارتىسى حاديشا بوكەەۆا جولىن جالعاعان اكتريسا اينۇر راحيپوۆانىڭ دا كەيىپكەر بولمىسىن بارىنشا بويىنا سىڭىرۋگە تىرىسقانى كورىنىپ تۇر. بۇل – اكتەرلىك شەبەرلىكتەن بولەك, شىنايى ماڭداي تەر, تولاسسىز ەڭبەكتىڭ جەمىسى ەكەنى انىق. پەترۋچچيوداي جىگىت سەرىسىنىڭ سۇيگەنىن ويناۋ ساحناگەردەن ىشكى تەرەڭدىكتەن وزگە, فيزيكالىق كۇش-جىگەر مەن پلاستيكالىق ورگانيكانى تالاپ ەتەدى. ودان باسقا م.اۋەزوۆتىڭ قۇنارعا باي پوەزيا تىلىمەن اۋدارىلعان ءتارجىماسىن قوسىپ قويىڭىز. وسىنىڭ ءبارىنىڭ باسىن قوسىپ, شاشاۋىن شىعارماي سايراتۋ – كەز كەلگەن اكتيرساعا قول ەمەس. كاتارينا – مىقتىلاردىڭ ۇلەسى! مىنە, وسىلايشا ەسىمى اڭىزعا اينالعان حاديشا بوكەەۆادان كەيىن شەكسپيردىڭ «اقىلدى تەنتەگىن» تۇپ-تۋرا 70 جىلدان كەيىن اينۇر وزگەشە جاڭعىرتتى. دۇرىسى, جارقىراتتى. جاي عانا ويناپ قويعان جوق, ول – كاتارينانى عالامات بەينە بيىگىندە بەدەرلەدى. اكتريسانىڭ كاتارينا بەينەسىنە كەلۋدەگى وسى ەسەپسىز ەڭبەگى لايىقتى باعالانىپ, 2017 جىلى تۇركىستان قالاسىندا وتكەن قازاقتىڭ تۇڭعىش رەجيسسەرى ج.ءشانيننىڭ 125 جىلدىعىنا ارنالعان تۇركى الەمى تەاترلارىنىڭ «تەاتر كوكتەمى – 2017» حالىقارالىق فەستيۆالىندە كاتارينا ءرولى ءۇشىن «ۇزدىك ايەل بەينەسى» جۇلدەسىن ەنشىلەگەن بولاتىن.
كومەديانىڭ تاعى ءبىر كوڭىل مارقايتقان تۇسى – اكتەرلىك انسامبل ونەرىنىڭ بىرتۇتاستىقتا جۇيەلەنۋى. تولىق تەاتر ترۋپپاسى قاتىسقان قويىلىم وسى ۇيىمشىل ۇجىمدىق بىرلىكتىڭ ارقاسىندا كوكەيگە بەرىك ورنىقتى. ساحناداعى كەڭىستىكتىڭ كوپ بولىگىن قيمىل-قوزعالىسقا ساي بوس قالدىرىپ, ارتىستەردىڭ ءوزى جاندى دەكوراتسياعا اينالعان. تسيرك ارتىستەرىنە ءتان شەبەرلىكپەن ساحنانىڭ ارعى بەتىنەن بەرگى بەتىنە سەكىرىپ, شەڭبەر جاساي, دومالاي قوزعالعان ترۋپپا تالانتى مەن ءارتۇرلى دىبىس شىعارۋدا قاقپاق, وجاۋ, شىلاپشىن سىندى سان ءتۇرلى قۇرالدىڭ كومەگىنە جۇگىنۋى دە ەكسپەريمەنتتىك تەاتر ەلەمەنتتەرىن ەسكە سالدى. رەجيسسەردىڭ تاعى ءبىر ۇتىمدى شەشىمى – ساحنانى ويناتا ءبىلۋى. ءار جەردەن اشىلعان جەرتولە تەكتەس ەدەندەگى تەسىكتەر, ات ورنىنا پايدالانىلعان دوڭگەلەكتى اعاش بۇيىمدار – بارلىعى دا كومەديانىڭ كوركەمدىگىن ۇستەپ, كورىگىن قىزدىردى. ەزۋگە كۇلكى ءۇيىردى. كوستيۋم سۋرەتشىسىنىڭ (ەرلان تۇياقوۆ) اشىق ءتۇستى ماتالاردان ادىپتەپ تىككەن كيىم ۇلگىلەرى دە كومەديا تابيعاتىنان الشاق كەتپەدى. ەرتەدەگى يتاليا جەرىندەگى كارناۆالداردى ءبىر ساتكە كوز الدىمىزعا كەلتىرگەندەي, ەۋروپالىق ونەر دۋمانىنىڭ ىشىندە جۇرگەندەي اسەرگە بولەندىك. ون جىل بويى ساحنادان تۇسپەي, ونەردە جاڭالىق جاساعان, جىل سايىن كەمەلدەنىپ, وزەكتىلىگى مەن كوركەمدىك قۋاتى ارتىپ كەلە جاتقان جارقىن قويىلىمنىڭ عۇمىرى ءاماندا ۇزاق بولسىن دەيىك ەندەشە.
