فوتو: اقوردانىڭ ءباسپاسوز قىزمەتى
مەملەكەت باسشىسى اتالعان سالادا ۇزاق جىل ەڭبەك ەتكەن تاجىريبەلى ماماندارمەن تەمىرجولدىڭ دامۋ پەرسپەكتيۆاسى جونىندە پىكىر الماستى.
«جول – تىرشىلىك كوزى. تەمىرجول بولماسا, ەكونوميكا دامىمايدى. مەن تەمىرجول سالاسىن وركەندەتۋگە باسا ءمان بەرەمىن. بۇگىن سيان قالاسىندا جاڭا قۇرعاق پورتتىڭ اشىلۋىنا بايلانىستى ماڭىزدى شارا ءوتتى. شىن مانىندە, كولىك-لوگيستيكا سالاسى – باسىمدىققا يە باعىت. قازىر مەملەكەتتەر كولىك-لوگيستيكا مۇمكىندىكتەرىنە يە بولۋ ءۇشىن باسەكەگە ءتۇسىپ جاتىر. قازىر, ەڭ باستى الەۋەت – تابيعي رەسۋرستار ەمەس, تاۋار تاسىمالداۋ, لوگيستيكالىق تىزبەكتەردى جولعا قويۋ. ەڭبەكتەرىڭىزدى باعالايمىن. ەڭ باستىسى, سىزدەردىڭ قىزمەتتەرىڭىزدى قوعام ايرىقشا قۇرمەتتەيدى. سىزدەر مول تاجىريبەلەرىڭىزگە سۇيەنە وتىرىپ, ءتيىستى مينيسترلىك پەن تەمىرجول باسشىلارىنا ۇسىنىستار مەن قۇندى كەڭەس بەرەسىزدەر دەپ سەنەمىن. سوندىقتان بىرگە جۇمىس ىستەۋىمىز كەرەك», دەدى قاسىم-جومارت توقاەۆ.
ءوز كەزەگىندە ارداگەرلەر تەمىرجول سالاسىندا كادر ماسەلەسى كوپ نارسەنى شەشەتىنىن ايتتى. ولاردىڭ پىكىرىنشە, تەمىردەي ءتارتىپ, ەڭبەكقورلىق, بەرىلگەن تاپسىرمانى بۇلجىتپاي ورىندايتىن كاسىبيلىكتىڭ ارقاسىندا تەمىرجولشىلار وزدەرىنە جۇكتەلگەن مىندەتتى ورىنداپ كەلە جاتىر.
سونىمەن قاتار ولار كولىك سالاسى ەل ەكونوميكاسىندا جەتەكشى ءرول اتقاراتىنىن اتاپ ءوتىپ, سوڭعى جىلدارى جۇك تاسىمالىنىڭ كولەمى ۇلعايا تۇسكەنىن, ارنايى كولىك مينيسترلىگىن قۇرۋ ناتيجەسىندە سالانى دامىتۋعا ەرەكشە كوڭىل ءبولىنىپ جاتقانىن جەتكىزدى.
ارداگەرلەر بيىل نەگىزى قالانعانىنا 120 جىل تولعان, ەل ەكونوميكاسىنىڭ كۇرەتامىرى سانالاتىن تەمىرجول توقتاۋسىز جۇرە بەرسىن دەگەن تىلەكپەن مەملەكەت باسشىسىنا شويىنجول قىزمەتكەرىنىڭ قولشامىن تارتۋ ەتتى.
