فوتو: profi-detox.com.ua
باسقوسۋدا لۋدومانياعا جانە زاڭسىز ويىن بيزنەسىنە قارسى كۇرەس شارالارىن قامتيتىن قۇجاتتى ازىرلەۋ بارىسى تالقىلاندى. مەملەكەتتىك كەڭەسشىنىڭ ايتۋىنشا, لۋدومانيا بۇگىندە ەلىمىزدىڭ ۇلتتىق قاۋىپسىزدىگىنە قاتەر توندىرە باستاعان. كوبىنە جاستار قۇمار ويىنداردىڭ تۇزاعىنا ءتۇسىپ جاتىر. سوندىقتان جاستار ساياساتى جونىندەگى كەڭەس لۋدومانيا مەن زاڭسىز ويىن بيزنەسىنە قارسى كۇرەستىڭ ورتالىعى رەتىندە وسى سالاداعى جۇمىستى ۇيلەستىرىپ كەلەدى.
– قولىمىزداعى قۇجات 25 پۋنكتتەن تۇرادى. ونىڭ 15-ءى كەڭەس مۇشەلەرىنىڭ ۇسىنىستارى نەگىزىندە دايىندالدى. بۇل – جاقسى كورسەتكىش. كوماندا رەتىندە ماڭىزدى قۇجاتتىڭ قابىلداۋىنا كۇش سالۋ كەرەك. قابىلدانعاننان كەيىن دە قۇجاتتىڭ قالاي جۇمىس ىستەپ جاتقانىن, ورىندالۋىن باقىلاۋدا ۇستاۋىمىز قاجەت, – دەدى ەرلان قارين.
بۋكمەكەرلىك كەڭسەلەردە سپورتتىق ويىندارعا ءباس تىگىپ, اۆتوماتتارعا اقشا سالاتىندار جىل ساناپ كوبەيىپ بارادى. دەنساۋلىق ساقتاۋ مينيسترلىگىنىڭ بىلتىرعى قىركۇيەك ايىنداعى دەرەگىندە 36 مىڭنان استام وتانداسىمىز قۇمار ويىنعا تاۋەلدى دەپ كورسەتىلگەن. دەرتتىڭ قۇرساۋىنا اسىرەسە, جاستار ءتۇسىپ جاتىر. سوندىقتان كەڭەس وسى سالاداعى جۇمىستى بارىنشا ۇيلەستىرىپ كەلەدى.
كەڭەس مۇشەلەرىنىڭ پايىمداۋىنشا, قوعام مەن مەملەكەتتىك ورگاندار لۋدومانياعا قارسى كۇرەستى جانە ونىڭ الدىن الۋ شارالارىن جۇيەلى تۇردە ءارى بىرلەسە جۇرگىزۋى كەرەك. نەگىزى ەلىمىزدە ءار سالادا بۇل باعىتتاعى جۇمىستار كۇشەيتىلگەن. دەسەك تە, تۇيتكىلدىڭ تارقاۋى قيىن بولىپ تۇر. ماسەلەن, جاقىندا دەنساۋلىق ساقتاۋ مينيسترلىگىنىڭ القا وتىرىسىندا ءماجىلىس دەپۋتاتى اسحات ايماعامبەتوۆ لۋدومانيا جانە ەسىرتكىگە تاۋەلدىلىكپەن كۇرەستە جۇيەلىلىك جوق ەكەنىن اشىپ ايتتى.
«قازىر لۋدومانيا, ىشىمدىك پەن ناشاعا تاۋەلدىلىك ماسەلەسى وزەكتى بولىپ وتىر. وسىنداي الەۋمەتتىك ماڭىزى بار دەرتپەن كۇرەستە جۇيەلىلىك جوق. اسىرەسە, لۋدومانيا بويىنشا. ءبىزدىڭ ويىمىزشا, ەمدەۋدىڭ زاماناۋي كلينيكالىق حاتتامالارى بولۋى كەرەك. ءبىز ءمامس نەمەسە مكبزك بويىنشا جەكە قارجىلاندىرۋ قاراستىرۋ كەرەك دەپ ويلايمىز. سەبەبى لۋدوماندار سانى ارتىپ بارادى. ىشىمدىك پەن ەسىرتكىگە تاۋەلدىلەر دە كوبەيىپ وتىر. وسى ورايدا, دەنساۋلىق ساقتاۋ سالاسى تاراپىنان ولارعا ساپالى, قولجەتىمدى قىزمەتتى جانە قۇپيالىقتى قامتاماسىز ەتۋ كەرەك. قاجەت بولسا, جەكە سەكتوردى تارتىپ, ولارعا مەملەكەتتىك تاپسىرىس بەرۋگە بولادى», دەدى دەپۋتات.
قارجىلىق مونيتورينگ اگەنتتىگىنىڭ اقپاراتى بويىنشا 2022 جىلى 5,5 مىڭ ونلاين-كازينو سايتتارى مەن اككاۋنتتارى, 2023 جىلى 2 مىڭنان اسا سايت بۇعاتتالىپتى. تاياۋدا عانا «ادىلدىك جولى» رقب باستاماسىمەن 300-دەن اسا لوتو كلۋبتاردىڭ جۇمىسىن زاڭسىز ۇيىمداستىرعان قىلمىستىق توپ ۇستالعان.
مەملەكەتتىك كەڭەسشى جيىندى قورىتىندىلاي كەلە, ەلىمىزدەگى رەفورمالاردىڭ ۇرپاق بولاشاعى ءۇشىن جاسالىپ جاتقانىن جانە جاستار قازىردىڭ وزىندە ەلدەگى وزگەرىستەردىڭ بەل ورتاسىندا جۇرگەنىن اتاپ ءوتتى. ەرلان قارين ءسوزىنىڭ سوڭىندا كەڭەس اياسىندا جاستار ماسەلەسى كوتەرىلىپ قانا قويماي, سول ماسەلەلەر شەشىلىپ جاتقانىنا نازار اۋداردى.
ەسكە سالا كەتسەك, كەڭەستىڭ تىكەلەي قاتىسۋىمەن ازىرلەنگەن تاعى ءبىر ماڭىزدى قۇجات – ناشاقورلىققا جانە ەسىرتكى بيزنەسىنە قارسى كۇرەستىڭ 2023-2025 جىلدارعا ارنالعان كەشەندى جوسپارى. سينتەتيكالىق ەسىرتكىگە قارسى ءىس-قيمىلدىڭ ماڭىزدىلىعى دا العاش رەت وسى كەڭەس الاڭىندا ايتىلدى.
