قوستاناي مەن توبىل قالاسىن جالعاپ جاتقان كوپىر كۇتپەگەن جەردەن جابىلىپ, ءتارتىپ ساقشىلارى قالاعا كىرىپ-شىعىپ جاتقان اۆتوكولىكتەردى توقتاتىپ, جاپپاي تەكسەرە باستاعان.
كوپ كەشىكپەي توبىل قالاسىندا قىلمىس جاساعان كۇدىكتىنىڭ ىزدەستىرىلىپ جاتقانىن حابارلاعان پد ءباسپاسوز ورتالىعى تۇرعىنداردان جول ۇستىندەگى جەدەل-ىزدەستىرۋ شارالارىنا سابىرلىق تانىتىپ, تۇسىنىستىكپەن قاراۋدى جانە تەك رەسمي اقپاراتقا عانا سەنۋدى سۇراعان.
كوپ ۇزاماي قارۋلى قاراقشىلىق جاساعان ەر ادام ۇستالدى. كۇدىكتى قازىر قاماۋدا وتىر دەگەن حابار الدىق. وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, كۇدىكتى 24 اقپاندا تاپا تال تۇستە توبىل قالاسىنداعى مەتالل قابىلداۋ پۋنكتتەرىنىڭ ءبىرىن توناپ كەتكەن. جۇمىس باسىندا وتىرعان ادامداردى قارۋمەن قورقىتىپ, كاسسادا جاتقان 792 مىڭ تەڭگەنى الىپ, ءىز سۋىتقان.
جۇرتتىڭ از ۋاقىت ابىگەرگە ءتۇسۋىنىڭ سەبەبى وسى. پوليتسيا ارنايى ۇيىمداستىرىلعان جەدەل ىزدەستىرۋ ءىس-شارالارى اياسىندا اۆتوكولىكتەردى دە جاپپاي تەكسەرگەن. بۇلاي ەتپەسە, تاعى بولمايدى, كۇدىكتى ءارى-بەرى اعىلىپ جاتقان كولىكتىڭ كەز كەلگەن بىرەۋىنە ءمىنىپ كەتۋى مۇمكىن.
ء«بىز كۇدىكتىنى رۋدنىي قالاسىندا ۇستادىق. تاپانشا, اقشا, بالاكلاۆاعا, ياعني بەتبۇركەمەسى بار باسكيىمگە ۇقساس زاتتى تاركىلەدىك. قازىر قاجەتتى تەرگەۋ امالدارى جۇرگىزىلىپ جاتىر. تاركىلەنىپ الىنعان قارۋعا ارنايى ساراپتاما تاعايىندالدى», دەدى پد كريمينالدىق پوليتسيا باسقارماسىنىڭ باسشىسى يۋري پوليۋحوۆ.
كۇدىكتىنىڭ مۇلكى تاركىلەنىپ, 5 جىلدان 10 جىلعا دەيىن باس بوستاندىعىنان ايىرىلۋى مۇمكىن. پوليتسيا دەپارتامەنتى سەنبى كۇنى تۋىنداعان جول قولايسىزدىعىنا تۇسىنىستىكپەن قاراعان تۇرعىندارعا العىس بىلدىرەدى.
قوستاناي وبلىسى
