فوتو: elorda.info
ەكسكۋرسيا – تانىمدىق ماقساتقا قۇرىلعان ۇجىمدىق ساپار. حالىق اراسىندا مادەني اعارتۋ جۇمىسىنىڭ ماڭىزدى بولىگى بولىپ ەسەپتەلەتىن بۇل سالا ەلىمىزدە ءبىرشاما جولعا قويىلعانىمەن, جەتىلدىرەتىن تۇستارى جەتەرلىك. وسى ورايدا ماماندار قازاقستانداعى ءتۋريزمدى دامىتۋ, ەكسكۋرسوۆودتاردىڭ بىلىكتىلىگىن ارتتىرۋ جانە جۇمىس ساپاسىن جاقسارتۋ العىشارتتارى توڭىرەگىندە وي-پىكىرلەرىن ورتاعا سالىپ, اشىق ديولوگ الاڭىن وتكىزدى.
ەۋرازيا ۇلتتىق ۋنيۆەرسيتەتىنىڭ ستراتەگيالىق دامۋ جونىندەگى پرورەكتورى دۋمان ايتماعامبەتوۆ فورۋمعا قاتىسۋشىلاردى كاسىبي مەرەكەسىمەن قۇتتىقتاپ, جيىننىڭ كەلەر جىلى دا جالعاسىن تابۋىنا تىلەكتەستىگىن جەتكىزدى.
«ەكسكۋرسيا – سان ءتۇرلى سالانى قامتيتىن, سينكرەتتى جۇمىس. سوندىقتان كەلەسى جىلى وتەتىن فورۋمعا ۋنيۆەرسيتەتىمىزدىڭ تاريحشىلارى مەن ادەبيەتشىلەرىن دە جۇمىلدىرساق, نۇر ۇستىنە نۇر. بۇل ماسەلەنى جان-جاقتى زەرتتەپ, جاقسى ناتيجەگە قول جەتكىزۋىمىزگە سەبەپ بولادى», دەدى ول.
«Kazakh Tourism» ۇك» اق باسقارما توراعاسىنىڭ ورىنباسارى دانيەل سەرجان ۇلى وتاندىق ءتۋريزمدى ورتالىقتاندىرۋ ماقساتىندا گيدتەر مەن ەكسكۋرسوۆودتاردىڭ قىزمەتىن تسيفرلاندىرۋ كەرەك ەكەنىن ايتىپ, قاناتقاقتى جوبانى تانىستىردى. جوبا ماقساتى – ەلدەگى بارلىق ەكسكۋرسوۆود پەن گيدتەردى ارنايى بازاعا بەكىتىلگەن بەيدجبەن قامتاسىز ەتۋ. ونداعى QR كود ارقىلى تۋريستەر ەكسكۋرسوۆود نەمەسە گيدتىڭ بىلىكتىلىگىن جانە اقپارات ءماتىنىن وقي الادى.
«اقپاراتتىڭ كوپتىگىنەن ەكسكۋرسوۆودتارتىڭ عىلىممەن راستالماعان دەرەكتەردى كەلتىرىپ جۇرگەنى بايقالدى. وسى ماسەلەنى قولعا الۋ ماقساتىندا بارلىق ەكسكۋرسيا قىزمەتكەرلەرىنە بەيدجدەر ارقىلى ناقتى تەكسەرىلگەن ورتاق ءماتىن ۇسىنىلادى. بۇل حالىق اراسىندا جالعان اقپاراتتىڭ تاراۋىنا جول بەرمەيدى», دەيدى ول.
پەداگوگيكا عىلىمدارىنىڭ دوكتورى, تۋريزم سالاسىنىڭ ارداگەرى ەۆگەني نيكيتينسكي ەكسكۋرسياداعى پەداگوگيكالىق جانە پسيحولوگيالىق ۇدەرىسكە توقتالىپ, قىزمەتكەرلەردىڭ حالىقپەن قارىم-قاتىناسىن جاقسارۋعا كۇش جۇمساۋ كەرەكتىگىن اتاپ ايتتى.
فورۋم ۇيىمداستىرۋشىسى, «اrman tour» تۋريستىك اگەنتتىگىنىڭ ديرەكتورى سالتانات ءابجانوۆا بولسا, قازاقستانداعى ەكسكۋرسيالىق ءىستىڭ قالىپتاسۋ تاريحىن بايانداي كەلە شەشىلۋگە ءتيىس بىرقاتار ماسەلەنى كوتەردى.
«ماسەلەن, كادرلاردى اككرەديتتەۋدىڭ بىرىڭعاي جۇيەسىن قۇرۋ, ساراپتامالىق-ادىستەمەلىك كەڭەستىڭ ەرەجەسىن دايىنداۋ, قىزمەتكەرلەردىڭ قۇقىقتىق مارتەبەسىن ناقتىلاۋ, بارلىق ەكسكۋرسوۆود پەن گيدتەردىڭ بىرىڭعاي كيىم ۇلگىسىن جاساپ شىعارۋ سەكىلدى ماقساتىمىز بار. سونىمەن قاتار كاسىبي مەرەكەمىزگە وراي رەسپۋبليكانىڭ ءار ايماعىندا حالىقارالىق دارەجەدەگى فورۋم, فەستيۆالدار ۇيىمداستىرىپ وتىرۋىمىز كەرەك. سول ءىس-شارادا «ەڭ ۇزدىك گيد-ەكسكۋرسوۆود» سەكىلدى جۇلدەلى بايقاۋلاردى وتكىزسەك, ەل نازارىن كوبىرەك اۋدارا الامىز دەپ سەنەمىن», دەدى س.ءابجانوۆا.
«تاۋ گيدتەرىنىڭ ۇلتتىق قاۋىمداستىعى» قوعامدىق بىرلەستىگىنىڭ باسشىسى ولەسيا لاۆرەنوۆا تۋريزم جانە سپورت مينيسترلىگى مەن دەنساۋلىق ساقتاۋ مينيسترلىگى اراسىندا تىعىز بايلانىس ورناتۋدىڭ ماڭىزىن باسا ايتتى.
«قازاقستانداعى تاۋ ءتۋريزمى – ءتيىستى نازار اۋدارىلماي كەلە جاتقان سالا. قاتار ورنالىستىرسا, گەرمانيانىڭ 50 پايىزىن, فرانتسيانىڭ 30 پايىزىن جايلايتىن تاۋلارىمىز بار. الايدا ءبىز وسىنداي مۇمكىندىكتى پايدالانا الماي وتىرعانىمىز وكىنىشتى. قازاقستانداعى تاۋ ءتۋريزمىنىڭ دامۋىنا كەدەرگى بولىپ وتىرعان بىرنەشە تۇيتكىلدى تۇيىندەر بار. مىسالى, تۋريستەردىڭ وقىس تاۋ اۋرۋىنان ساقتاندىرۋ جوق. قۇتقارۋ قىزمەتى تۋريستەردىڭ تاۋعا شىعۋىن باقىلامايدى, تەك ونىڭ سالدارىمەن عانا جۇمىس ىستەيدى. تۋريستەردى مارشرۋتقا تىركەلۋى ەشقانداي قۇجاتسىز جۇزەگە اسىرىلىپ كەتەدى», دەدى ول.
ءىس-شارانىڭ قورىتىندى بولىمىندە ەڭبەگى سىڭگەن ەكسكۋرسيا قىزمەتكەرلەرىنە العىسحات تابىستالدى.
