- 2022 جىلدىڭ ماۋسىم ايىنان بەرى «استانا» باسكەتبول كلۋبىنىڭ باس باپكەرى قىزمەتىن اتقارعان ولەگ كيسەلەۆ ءوز ورنىن بوساتتى. ونىڭ ورنىنا فوتيوس تاكيانوس كەلدى. 55 جاستاعى گرەكيالىق مامان 1994 جىلى پاوك-پەن بىرگە كوراچ كۋبوگىن ولجالادى. 2004 جىلدان بەرى جاتتىقتىرۋشىلىق قىزمەتتە. سول كەزدەن بەرى ءوز ەلىندە, قاتار, كيپر جانە كوسوۆودا ەڭبەك ەتتى. 2021/22 جىلعى ماۋسىمدا تاكيانوس گرەكيانىڭ ەڭ بىلىكتى باپكەرى دەپ تانىلدى.
- ءفيليپپيننىڭ نيۋ-كلارك سيتي قالاسىندا سۋ سپورتىنان ءۇش جاس ەرەكشەلىگى بويىنشا شىمىلدىعى تۇرىلگەن ازيا چەمپيوناتىندا قازاقستاننىڭ 21 سپورتشىسى ونەر كورسەتىپ جاتىر. جارىستىڭ العاشقى كۇنى جەرلەستەرىمىز بىرنەشە جۇلدەگە قول جەتكىزدى. اتاپ ايتساق, ادەلايدا پچەلينتسەۆا, كسەنيا يگناتوۆ جانە ەگور پوپوۆ سىندى جۇزۋشىلەر جەڭىمپاز اتاندى. سول سپورت ءتۇرىن سەرىك ەتكەن ديانا تاسجانوۆا جانە سينحروندى سەكىرۋشىلەردىڭ ديانا جۇماعۇلوۆا مەن انابەللا كوچكينا جۇبى كۇمىسپەن كۇپتەلدى.
- ەل اراسىندا «سپورت وسكارى» دەگەن اتاۋعا يە بولعان «Laureus World Sports Awards» جۇلدەسىنەن ۇمىتكەرلەردىڭ ەسىمدەرى بەلگىلى بولدى. قازىرگى كەزدە دۋالى اۋىزدى مامانداردىڭ وزدەرى «جىل سپورتشىسى» اتالىمىندا كىمنىڭ وزاتىنىن ءدوپ باسىپ ايتا الماي وتىر. ويتكەنى التى ۇمىتكەردىڭ بارلىعى دا – كىل مىقتىلار. ولار – فۋتبولشى ليونەل مەسسي (ارگەنتينا) مەن ەرلينگ حولاند (نورۆەگيا), «فورمۋلا 1» دوداسىنىڭ ءۇش دۇركىن جەڭىمپازى ماكس فەرستاپپەن (نيدەرلاند), سىرىقپەن سەكىرۋشى ارمان ديۋپلانتيس (شۆەتسيا), تەننيسشى نوۆاك دجوكوۆيچ (سەربيا) جانە جەلاياق نوا لايلس. ايەلدەر اراسىندا بۇل اتاق اياقدوپ شەبەرى ايتانا بونماتي (يسپانيا), تەننيستەن الەمنىڭ ءبىرىنشى راكەتكاسى يگا شۆيونتەك (پولشا), تاۋ شاڭعىشىسى ميكاەلا شيففرين (اقش) مەن شەريكا دجەكسون (يامايكا), فەيت كيپەگون (كەنيا) جانە شا’كارري ريچاردسون (اقش) سىندى جەڭىل اتلەتتەردىڭ بىرىنە بۇيىرادى. اتالعان جۇلدەنى تابىس ەتۋ ءراسىمى 24 ساۋىردە مادريدتە وتەدى.
- ازەربايجاننىڭ باس شاھارى باكۋدە وتكەن باتۋتتا سەكىرۋدەن الەم كۋبوگىنىڭ كەزەڭدىك باسەكەسىندە دانيل مۇساباەۆ پەن ءپىرمامماد اليەۆ جۇبى كۇمىس مەدالدى موينىنا ءىلدى. باس جۇلدە قىتاي سپورتشىلارىنا بۇيىرسا, اقش وكىلدەرى قولاعا قول سوزدى.
- قۇرلىقتىق حوككەي ليگاسىنداعى (قحل) سوڭعى كەزدەسۋىندە «بارىس ءنوۆوسىبىردىڭ «سيبير» كلۋبىن 1:0 ەسەبىمەن قاپى قالدىردى. جالعىز گولدىڭ اۆتورى – اركادي شەستاكوۆ (27-مينۋت). بىراق بۇل جەڭىسكە جانكۇيەرلەردىڭ كوڭىلى تولمادى. سەبەبى 68 ويىندا نەبارى 50 ۇپاي جيعان جەرلەستەرىمىز تۇراقتى بىرىنشىلىكتىڭ جارىس كەستەسىندە 22-ورىندا قالىپ قويدى. ارتىمىزدا – پودولسكىنىڭ «ۆيتيازى» عانا. سونىڭ سالدارىنان ولار پلەي-وفف سايىستارىنا قاتىسىپ, گاگارين كۋبوگى ءۇشىن تالاسۋ مۇمكىندىگىنەن ايىرىلدى. بۇل – «بارىستىڭ» قحل-داعى ەڭ ءساتسىز ماۋسىمى.
- ازيا كۋبوگىنىڭ ىرىكتەۋ تۋرنيرىندە قازاقستان باسكەتبولشىلارى سىرت الاڭدا قاتار قۇراماسىمەن كۇش سىناستى. وتە شيەلەنىستى وتكەن كەزدەسۋ 73:68 (12:19, 25:14, 13:15, 18:25) ەسەبىمەن جەرلەستەرىمىزدىڭ پايداسىنا شەشىلدى. بۇل – ەۆگەني وۆسيانيكوۆ جاتتىقتىراتىن كوماندانىڭ وسى جارىستاعى ەكىنشى جەڭىسى. بۇعان دەيىن ءۇندىستاندى ۇتقان ەدى. وسى تابىسى ارقىلى ولار يران قۇراماسىمەن بىرگە ءبىرىنشى جانە ەكىنشى ورىنداردى ءوزارا ءبولىسىپ تۇر.
