بيىل 8 قىركۇيەكتە استانادا V دۇنيەجۇزىلىك كوشپەلىلەر ويىندارىنىڭ الاۋى تۇتاناتىنى بەلگىلى. جاۋاپتى جارىسقا تىڭعىلىقتى دايارلانۋ ماقساتىندا اتالعان فەدەراتسيانىڭ مۇشەلەرى دايىندىق جۇمىستارىن الاتاۋ باۋرايىندا وتكىزۋدى ءجون كورگەن ەكەن. قازىرگى كەزدە ارمياشىلاردىڭ ورتالىق سپورت كلۋبىنىڭ (اوسك) بازاسىندا 37 سپورتشى شەبەرلىكتەرىن شىڭداپ جاتىر. ولاردىڭ 20-سى – اسىقشى جىگىتتەر, ال 11-ءى – بەساسىقشى قىزدار.
– العاشقى وقۋ-جاتتىعۋ جيىنىمىز ءساتتى ءوتىپ جاتىر, – دەپ باستادى ءوز اڭگىمەسىن قازاقستان ۇلتتىق قۇراماسىنىڭ باس باپكەرى جومارت سابىرجان ۇلى. – اسەم شاھار الماتىدا ەش الاڭسىز دايارلانۋىمىزعا بارلىق جاعداي جاسالدى. الدىمىزدا ءالى شىمكەنت پەن كوكشەتاۋ قالالارى جانە قىرعىزستاننىڭ شولپان-اتاسى مەن تۇركيانىڭ انتالياسىندا وتەتىن ءتورت جيىن بار. دۇنيەجۇزىلىك كوشپەلىلەر ويىندارىندا قۇرامامىز ەل نامىسىن ابىرويمەن قورعاپ, اسىق اتۋ مەن بەس اسىقتان توپ جارادى دەپ سەنەمىز. ءدۇبىرلى دودادا قىرعىزدىڭ وردو ويىنىنان دا سايىسقا تۇسەمىز. سوندىقتان شولپان-اتاعا ساپار شەككەندە قىرعىزداردىڭ ءتول ونەرىنىڭ قىر-سىرىنا ابدەن قانىعۋدى كوزدەپ وتىرمىز.
اسىق اتۋدان پاۆلودار وبلىسىنىڭ اعا جاتتىقتىرۋشىسى, الەم جانە ەۋرازيا كۋبوگىنىڭ جەڭىمپازى, «التىن تۇعىر» يەگەرى قاليبەك قۋان ۇلى كۇن وتكەن سايىن قۇراما مۇشەلەرىنىڭ شەبەرلىكتەرى شىڭدالىپ كەلە جاتقانىن ايتتى.
– دايىندىعىمىز جاقسى. جەرلەستەرىمىزدىڭ اراسىنان باس جۇلدەدەن ۇمىتكەر مىنا سپورتشى دەپ ەشكىمدى بولە-جارا اتاعىم كەلمەيدى. ءبارىنىڭ دەڭگەيى بىردەي. ەڭ باستىسى, ولاردىڭ فيزيكالىق دايىندىقتارىن پسيحولوگيالىق تۇرعىدان دا پىسىقتاۋ جۇمىستارى جۇرگىزىلىپ جاتىر. ماقساتىمىز – الەم كۋبوگى, الەم جانە ازيا چەمپيوناتى جانە كوشپەلىلەر ويىندارىندا ۇزدىكتەر قاتارىنان كورىنۋ, – دەيدى ول.
ءدۇبىرلى دوداعا دايىندىقتارىن پىسىقتاپ جاتقانداردىڭ قاتارىندا اقمولا وبلىسىنان كەلگەن بەساسىقشى كوگەرشىن دۋمان دا بار. ول – كوكشەتاۋداعى جوعارى مەديتسينالىق كوللەدجىنىڭ ءتورتىنشى كۋرس ستۋدەنتى. كوگەرشىننىڭ بەس اسىقپەن اينالىسقانىنا بەس جىل بولدى. سول ارالىقتا قازاق قىزى الەم جانە قازاقستان كۋبوگىنىڭ يەگەرى, ەۋرازيا كۋبوگىنىڭ كۇمىس جۇلدەگەرى اتانىپ ۇلگەردى. ول ءوز بولاشاعىن ۇلتتىق سپورتپەن بايلانىستىرىپ, سپورتتىق مانسابىن اياقتاعاننان كەيىن باپكەر بولۋدى كوزدەپ وتىر.
الاتاۋ باۋرايىندا ءوتىپ جاتقان وقۋ-جاتتىعۋ جيىنىنىڭ قورىتىندىسى بويىنشا الداعى ۋاقىتتا وتەتىن حالىقارالىق جارىستاردا ەل نامىسىن قورعايتىن اسىقشىلار انىقتالادى.
ەسكە سالا كەتەيىك, رەسپۋبليكالىق «اسىق اتۋ» فەدەراتسياسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە «بايگە», «كوكپار», «اۋدارىسپاق», «ساداق اتۋ», «جامبى اتۋ», «قۇسبەگىلىك», «توعىزقۇمالاق», «تەڭگە ءىلۋ», «JORYQ» ات سپورتى فەدەراتسيالارى بار.
