فوتو: تولعاناي باتىرحان
مەملەكەت باسشىسى ق.توقاەۆتىڭ «وقۋعا قۇشتار مەكتەپ» جوباسىن, «بالالار كىتاپحاناسى» باعدارلاماسىن جۇزەگە اسىرۋ ماڭىزدى شارۋانىڭ ءبىرى. وسىعان وراي وسى جىلدىڭ قاڭتار ايىندا الماتى قالاسىندا وقۋ-اعارتۋ ءمينيسترى ع.بەيسەمباەۆ پەن مادەنيەت جانە اقپارات ءمينيسترى ا.بالاەۆانىڭ قاتىسۋىمەن «شىعارماشىلىق ينتەلليگەنتسيا - قازاقستان بالالارىنا» اتتى كەزدەسۋ وتكەن ەدى. وسى باسقوسۋدا جۇكتەلگەن تاپسىرماعا وراي 26 اقپاندا استاناداعى №59 مەكتەپ-ليتسەيدە باس قالاداعى مەكتەپ ديرەكتورلارى, مۇعالىمدەر, اتا-انالار, كىتاپحاناشىلار بالالار باسىلىمدارىنىڭ جەتەكشىلەرىمەن ديدارلاسىپ, باسىلىم مەن وقىرمان اراسىنداعى تۇيتكىلدى ماسەلەنى تالقىعا سالدى.
ءىس-شاراعا جازۋشى تولىمبەك ءابدىرايىم, قۇرامىنا 11 باسىلىم كىرەتىن, سونىڭ ىشىندە بالالارعا ارنالعان «ۇلان», «درۋجنىە رەبياتا» گازەتتەرى, «اق جەلكەن», «بالدىرعان» جۋرنالدارى قارايتىن «قازاق گازەتتەرى» جشس باس ديرەكتورىنىڭ ورىنباسارى – الماتى باسىلىمدارىنىڭ جەتەكشىسى دۋمان اناش, «ايگولەك» جۋرنالىنىڭ باس رەداكتورى اقىن قىمبات ابىلداقىزى, ء«مولدىر بۇلاق» جۋرنالىنىڭ باس رەداكتورى اقىن داۋلەتبەك بايتۇرسىن ۇلى جانە وزگە دە بالالار باسىلىمدارىنىڭ وكىلدەرى ءسوز الىپ, جاس وقىرمان مەن ءباسپاسوز اراسىنداعى بايلانىس الشاقتاپ بارا جاتقانىنا الاڭداۋشىلىق ءبىلدىردى.
«ەكى-ءۇش جىل بۇرىن وتكەن جازۋشىلار وداعىنىڭ قۇرىلتايىندا ولجاس سۇلەيمەنوۆ ء«بىزدىڭ تاۋەلسىزدىك العانىمىزعا 30 جىل بولدى, وسى 30 جىلدىڭ ىشىندە ءبىز كىتاپ وقۋدى دوعاردىق» دەگەن ەدى. شىندىقتى مويىنداۋ كەرەك, تاۋەلسىزدىكتەن بەرى قاراي راسىندا دا وقىرمان گازەت-جۋرنال, كىتاپ وقۋدان اجىراپ قالدى. بەسىكتەن بوساپ شىققان ءبۇلدىرشىننىڭ ءوزى سمارتفونعا ۇڭىلەتىن قازىرگى قوعامدا جاس وقىرماندى بالالار باسىلىمىمەن قاۋىشتىرىپ, بايلانىس ءجىبىن شيراتۋ ماڭىزدى شارۋا. بۇگىنگى باسقوسۋدىڭ كوزدەگەنى دە وسى جايت», دەدى حالىقارالىق الاش ادەبي سىيلىعىنىڭ لاۋرەاتى ت.ءابدىرايىم.
قىمبات ابىلداقىزى مەكتەپ ديرەكتورلارى مەن مۇعالىمدەرگە ءھام اتا-انالارعا جەتكىنشەكتەردى بالالار باسىلىمىمەن دوستاستىرۋعا ۇندەدى. داۋلەتبەك بايتۇرسىن ۇلى بىلتىر جەتى وبلىستى ارالاپ, وقىرماندارمەن جۇزدەسۋدە ءتۇرلى كەدەرگىلەرگە كەزىككەنىن, بۇل تۇيتكىلدى وقۋ-اعارتۋ ءمينيسترى عاني بەيسەمباەۆقا دا ەسكەرتكەنىن ايتتى.
«مەكتەپ پەن بالالار باسىلىمدارى اراسىنداعى بايلانىستىڭ شىلبىرى ۇزىلگەلى تۇر. ۇزىلمەلى ءجىپ قيىلىپ, وقىرمان ازايسا, بالالار باسىلىمدارى جابىلادى», دەدى د.بايتۇرسىن ۇلى.
دۋمان اناش وقىرماندى قىزىقتىرىپ, تالعامىنا تاتيتىن تۇشىمدى دۇنيەلەر ۇسىنۋ باستى مۇرات ەكەنىن جەتكىزدى. رەسپۋبليكالىق «اق جەلكەن» جۋرنالىنىڭ ۇجىمى وقىرماندار اراسىندا ءتۇرلى بايقاۋ ۇيىمداستىرۋ ارقىلى دا وقۋشى قاۋىمنىڭ ۇدەسىنەن شىعىپ كەلە جاتقانىن جەتكىزدى.
بۇگىنگى كۇندە ەلىمىزدە 30-عا جۋىق بالالار باسىلىمدارى جارىق كورەدى. بارلىعى دەرلىك تومەن تيراجبەن تارالادى. ەلىمىزدەگى 7 مىڭنان استام مەكتەپتىڭ وقۋشىلارى مەرزىمدى باسىلىمدارمەن دوستاسسا, بۇل ولقىلىقتىڭ ورنى تولار ەدى دەسكەن قالامگەرلەر پەداگوگتەرگە وراسان سەنىم ارتاتىنىن جەتكىزدى. جيىندا بالالار اراسىندا وقۋ مادەنيەتىن نىعايتۋدىڭ ماسەلەسى دە قامتىلدى.
«وقۋعا قۇشتار مەكتەپ» جوباسى, «بالالار كىتاپحاناسى» باعدارلاماسى اياسىندا جاڭا يدەيالار جانە تاجىريبەلىك ۇسىنىستار ايتىلدى. بالالار باسىلىمىنىڭ وكىلدەرى مەكتەپ كىتاپحانالارىنا جاسوسپىرىمدەرگە ارنالعان گازەت-جۋرنالداردى جازدىرتۋ ارقىلى كەلەشەك ۇرپاققا كوركەم شىعارمالاردى وقىتۋدى قولعا الساق دەگەن ۇسىنىس ءبىلدىردى.
