جيىنعا 80-گە جۋىق بوكسشى قاتىسىپ جاتىر. ولاردىڭ اراسىندا ءالەمدىك ليتسەنزيالىق تۋرنيرگە قاتىساتىن التى بوكسشىدان بولەك, ۇلتتىق قۇرامانىڭ وزگە دە مۇشەلەرى مەن ءار وبلىستىڭ قۇرامالارى بار.
«جىگىتتەردىڭ دايىندىقتارى جاقسى. باستى كۇشتى ليتسەنزيالىق تۋرنير الدىندا بوكسشىلاردىڭ تاكتيكالىق جانە تەحنيكالىق دايىندىقتارىنا قويىپ وتىرمىز. قازاقستان بوكس فەدەراتسياسى تاراپىنان بارلىق جاعداي جاسالدى. ەندى 29 اقپان كۇنى يتالياعا ۇشامىز», دەدى ۇلتتىق قۇرامانىڭ باس باپكەرى مىرزاعالي ايتجانوۆ.
ايتا كەتەيىك, اپەننين تۇبەگىندەگى تۋرنيرگە ساكەن بيبوسىنوۆ (51 كگ), ماحمۇد سابىرحان (57 كگ), مۇحامەدسابىر بازارباي ۇلى (63,5 كگ), اسلانبەك شىمبەرگەنوۆ (71 كگ), نۇربەك ورالباي (80كگ) جانە ايبەك ورالباي (92 كگ) قاتىسادى. يتالياداعى تۋرنيرگە قاتىسپايتىن بوكسشىلارىمىز سەربيا, ليتۆا, ءازەربايجان ەلدەرىندەگى حالىقارالىق تۋرنيرلەردە ونەر كورسەتەدى. سونداي-اق وقۋ-جاتتىعۋ جيىنىنان كەيىن بوكسشىلاردىڭ بىرقاتارى اتىراۋدا وتەتىن بولات تەمىروۆتى ەسكە الۋعا ارنالعان حالىقارالىق تۋرنيردە باقتارىن سىنايدى.
ال يتاليانىڭ بۋستو-ارسيتسيو قالاسىندا وتەتىن الەمدىك ليتسەنزيالىق تۋرنيردە ەرلەر اراسىندا 28 ليتسەنزيا ساراپقا سالىنادى. قازىرگى تاڭدا قازاقستان ەرلەر قۇراماسى پاريج وليمپياداسىنىڭ ءبىر عانا ليتسەزياسىن يەلەنگەن. بىلتىرعى جازعى ازيا ويىندارىندا اسا اۋىر سالماقتاعى قامشىبەك قوڭقاباەۆ ەنشىمىزدەگى جالعىز عانا جولدامانى جەڭىپ العان.
