كىم بولساڭ دا, قايدا جۇرسەڭ دە تۋعان جەرىڭدى ۇمىتپاعان ابزال. مەملەكەت باسشىسى قاسىم-جومارت توقاەۆ الدىمەن اۋىلعا سول توپىراقتان تۇلەگەن ازاماتتاردىڭ جانى اشۋى كەرەك ەكەنىن ايتقان ەدى. سەبەبى سىرتتان كەلىپ ەشكىم قۇشاق جايمايدى. سوندىقتان كاسىپكەردىڭ ەرلىگى كوڭىل سۇيىندىرەدى.
سارقان اۋدانى اكىمدىگىنىڭ مالىمەتىنشە, مەتسەنات اۋداندىق اۋرۋحانانىڭ بوس تۇرعان ءۇي-جايىنىڭ شاعىن بولىگىنە جوندەۋ جۇمىستارىن جۇرگىزىپ, گەمودياليز قىزمەتى ءۇشىن ارنايى جابدىقتار اكەلىپ ورناتقان. ورتالىق ورنالاسقان الاڭنىڭ كولەمى – 85,2 شارشى مەتر. ورىندى جالعا الۋ اقىسى مەملەكەتتىك بيۋدجەتكە تولەنەدى.
وسىلايشا, 19 مىڭ تۇرعىنى بار سارقان قالاسىندا بۇيرەكتىڭ سوزىلمالى جەتكىلىكسىزدىگى اۋرۋىنا شالدىققان ادامداردىڭ قانىن تازالاپ, قالىپتى ءومىر ءسۇرۋىن قامتاماسىز ەتەتىن ورتالىق ىسكە كىرىستى. بۇرىن سىرقاتتار گەمودياليز الۋ ءۇشىن سارقاننان 151 شاقىرىم جەردەگى وبلىس ورتالىعىنا قاتىنايتىن بولسا, ەندى ولارعا الىسقا جول تارتۋدىڭ قاجەتى جوق. تۇرعىنداردىڭ مەرەيى تاسىپ, كوڭىلى الىپ-ۇشىپ ءجۇر. اۋەلى ورتالىقتىڭ اشىلۋىمەن تۇرعىنداردى اۋدان اكىمى عالىمجان مامانبەۆ قۇتتىقتاپ, ەلجاندى ازاماتقا العىسىن ءبىلدىردى.
«وسى ۋاقىتقا دەيىن اۋداندا مۇنداي ورتالىق بولماعاندىقتان, سوزىلمالى بۇيرەك اۋرۋلارى بار ازاماتتاردىڭ تالدىقورعان قالاسىنا بارۋىنا تۋرا كەلدى. جول الىس ەمەس, دەگەنمەن كەزەك كۇتىپ, سىرقات ادامنىڭ ءارى-بەرى قاتىناۋى وڭاي ەمەس. ونىڭ ۇستىنە قالاعا اۋىل-اۋىلدان ەم ىزدەپ كەلەتىندەر قانشاما؟ ادام ءومىرى – ەڭ قىمبات قۇندىلىق, دەنساۋلىق ەشقانداي اقشامەن ولشەنبەيدى. وسى رەتتە ازامات باۋىرىمىزدىڭ يگى ىسىنە العىس بىلدىرەمىن», دەدى ع.مامانباەۆ.
ورتالىقتا گەرمانيادا جاسالعان قۇرال-جابدىقتار ورناتىلعان. مۇندا ءبىر مەزگىلدە 4 ناۋقاس ەم قابىلداي الادى. مەديتسينالىق قىزمەت تەگىن مەديتسينالىق كومەكتىڭ كەپىلدەندىرىلگەن كولەمى اياسىندا ءمامس جۇيەسى ارقىلى تەگىن كورسەتىلەدى. تۇرعىندار الدىن الا دارىگەردىڭ انىقتاماسى ارقىلى تەكسەرىلۋىنە بولادى.
«ەمدەۋ ۇدەرىسى ءار ادامعا اپتاسىنا 3 رەت جۇرگىزىلەدى. ءبىر سەانسقا شامامەن 4 ساعات جۇمسالادى. بۇگىندە سارقان اۋدانىنان بولەك اقسۋ جانە الاكول اۋداندارىنىڭ جاقىن ايماقتارىنىڭ ناۋقاستارىن قوسا العاندا 10 ازامات ەم الىپ جاتىر. ولاردىڭ دەنساۋلىعى ءجىتى قاداعالاۋىمىزدا. قالادا كورسەتكەن ەم-دومدى وسىندا الۋعا بولادى», دەيدى دارىگەر ولجاس بايجانوۆ.
الماتى قالاسىنىڭ «Bios» كلينيكالىق بازاسىنان ارنايى ءبىلىم العان بىلىكتى دارىگەر ارىپتەسى مۇرات بولەگەنوۆپەن بىرگە ورتالىقتا ناۋقاستارعا ارنايى مەديتسينالىق كومەك كورسەتەدى. قازىر قوس دارىگەرگە قارالۋعا اسىق الىس-جاقىن اۋدانداردان كەلگەن حالىقتىڭ قاراسى كوپ. ولار ارنايى كەزەكپەن كەلىپ, تەكسەرىلىپ جاتىر.
وسى رەتتە جەتىسۋلىق دارىگەرلەردىڭ ىسىنە ادالدىعىن ايتا كەتۋ كەرەك. ارينە, مەديتسينا سالاسىندا كۇندەلىكتى ءارتۇرلى جاعدايلار ورىن الىپ جاتادى. ونىڭ بارىنە اق جەلەڭدىلەردى كىنالاي بەرگەنىمىز دۇرىس ەمەس. ماسەلەن, وتكەن جىلدىڭ جەلتوقسان ايىندا ۇشتوبە قالاسىنداعى ۇيلەردىڭ بىرىندە جىلۋ جۇيەسىنىڭ جارىلۋى سالدارىنان 2017 جانە 2021 جىلى تۋعان ەكى بالا تەرميالىق كۇيىك پەن جاراقات العان ەدى. ءسويتىپ, قوس ءبۇلدىرشىن كوپسالالى وبلىستىق بالالار اۋرۋحاناسىنا اۋىر جاعدايدا تۇسكەن ەدى. دارىگەرلەردىڭ دەر كەزىندە كورسەتكەن مەديتسينالىق كومەگىنىڭ ناتيجەسىندە ەكى بالا دا امان قالدى. ولارعا مەديتسينالىق اۆياتسيا جەلىسى بويىنشا كومەك كورسەتىلىپ, بالالار رەانيماتسيادا ەم الدى.
«دەنەنىڭ 85 پايىزى تەرميالىق كۇيىك العان بالا رەانيماتسيا بولىمىندە باقىلاۋدا ءبىر اي بولدى. ولارعا جوعارى تەحنولوگيالىق مەديتسينالىق كومەك كورسەتىلدى. بۇگىن بالا ۇيگە امان-ەسەن شىعارىلدى. ونىڭ ءىنىسى رەانيماتسيا بولىمىنە بەت, مويىن, كەۋدە قۋىسىنىڭ الدىڭعى جاعى, ەكى جوعارعى اياق-قول ايماعىندا, دەنەنىڭ الدىڭعى قابىرعاسىندا, تومەنگى ەكى اياقتاعى كۇيىكپەن تۇسكەن بولاتىن. ءساتتى ەمدەۋدەن كەيىن 12 قاڭتاردا اۋرۋحانادان شىعارىلدى», دەيدى بالالار حيرۋرگى داۋرەن تاسبولاتوۆ.
ونىڭ ايتۋىنشا, دەنەنىڭ 40 پايىزدان استامى كۇيىك العان جاعدايلاردا وتە اۋىر جاراقات بولىپ سانالادى. بۇل بالالاردا دەنەنىڭ زاقىمدانۋى 80 پايىزدان اسقان. قايتا دارىگەرلەردىڭ بىلىكتىلىگىمەن وڭالعان.
تالدىقورعان قالاسىنىڭ رەانيماتولوگ, تراۆماتولوگ جانە حيرۋرگ دارىگەرلەردىڭ كاسىبي جانە جانقيارلىق ارەكەتتەرىنىڭ ناتيجەسىندە عانا بالالاردا اسا اۋىر اسقىنۋلاردى بولدىرماي, زاقىمدالعان اياق-قولداردىڭ فۋنكتسيالارىن تولىعىمەن قالپىنا كەلتىرە وتىرىپ قۇتقاردى. بۇگىندە كىشكەنتاي پاتسيەنتتەردىڭ ءومىرى مەن دەنساۋلىعىنا ەشقانداي قاۋىپ ءتونىپ تۇرعان جوق.
جەتىسۋ وبلىسى
