جيىن بارىسىندا امانگەلدى قۇسايىن ۇلىنىڭ ءبىلىم مەن عىلىمدى يگەرۋدەگى, ۇستازدىق جانە ۇيىمداستىرۋشىلىق تاجىريبەسىندەگى بەلەستەرى, وتاندىق تاريحىمىزداعى عالىمنىڭ ورنى جونىندە تۇشىمدى ويلار ايتىلىپ, جالپى تۇلعالاردى دارىپتەۋ, ۇرپاق ساناسىنا ءسىڭىرۋ ىزدەنىستەرى تالقىلاندى.
سەمينار مودەراتورى, تاريح عىلىمدارىنىڭ دوكتورى, پروفەسسور, اتالعان وقۋ ورنىنىڭ پرورەكتورى قادىر احمەتوۆ «تۇلعالاردىڭ ازاماتتىق ۇستانىمدارىن زەردەلەۋ – جاستاردىڭ بويىنا وتانشىلدىقتى قالىپتاستىرۋدىڭ تەتىگى» ەكەنىن ايتىپ, عىلىمي-زەرتتەۋ ورتالىعىنىڭ ماقسات-مىندەتتەرىن تانىستىردى.
«قازاق گازەتتەرى» سەرىكتەستىگىنىڭ باس ديرەكتورى, اكادەميك ديحان قامزابەك ۇلى: «عالىمنىڭ مۇراسىن, ەڭبەك جولىن, ءتان ساۋلىعى مەن جان ساۋلىعىنا قاتىستى باستامالارىن قوعامعا, ءبىلىم جۇيەسىنە كەڭىنەن ناسيحاتتاۋ قاجەت», – دەپ, امانگەلدى قۇسايىن ۇلىنىڭ اتقارعان ەڭبەگىن, ادامگەرشىلىك قاسيەتىن اتاپ ءوتتى.
ال ينستيتۋت دوتسەنتى, تاريح عىلىمدارىنىڭ كانديداتى سامات ەسقاليەۆ عالىمنىڭ ەل تاريحىنا قاتىستى وي-تولعانىستارى مەن بىرقاتار زەرتتەۋ ەڭبەكتەرىنە توقتالىپ, قايىرىمدىلىق, كوشباسشىلىق تۇجىرىمدارى نەگىزىندە جوعارى وقۋ ورىندارىندا «تۇلعاتانۋ» كۋرسىن جۇرگىزۋدىڭ ءمان-ماڭىزىن بايىپتادى. سونداي-اق تۇركيا رەسپۋبليكاسى توكات گازي وسمانپاشا ۋنيۆەرسيتەتىنىڭ پروفەسسورى, «تۇركى الەمى» عىلىمي-زەرتتەۋلەر ورتالىعىنىڭ ديرەكتورى ومەر فارۋك سونمەس ۇلت رۋحانياتىن قالىپتاستىرۋداعى تۇلعالاردىڭ ءرولىن زەردەلەپ, جوعارى مەكتەپتە تۇركى ەلدەرىنە ورتاق تۇلعالاردى جاڭاشا وقىتۋ مەن دارىپتەۋدى ۇسىندى.
جيىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى جانات ايمۇحامبەت, نازارباەۆ ۋنيۆەرسيتەتىنىڭ پروفەسسورى جانار بايتەليەۆا جاستاردىڭ ۇلتتىق سەزىمىن وياتۋ, ءتول تاريحىمىز بەن رۋحاني دۇنيەلەرىمىزدى ۇرپاق ساناسىنا ءسىڭىرۋ ماقساتىندا بىرىككەن جوبالار ازىرلەۋ تۋرالى پىكىرلەرىن ورتاعا سالدى.
ينستيتۋت رەكتورى, پسيحولوگيا عىلىمدارىنىڭ كانديداتى, پروفەسسور امانگەلدى يسمايىلوۆ تۇساۋى كەسىلگەن عىلىمي ورتالىق امانگەلدى قۇسايىن ۇلىنىڭ عىلىمداعى يگى جوسپارلارىن جالعاستىرىپ, بولاشاقتا گۋمانيتارلىق عىلىمداردىڭ وزەكتى ماسەلەلەرىنە ارنالعان زەرتتەۋلەر جۇرگىزەتىنىن ايتىپ, قاتىسۋشىلارعا العىسىن جەتكىزدى.
عىلىمي سەمينارعا ەلوردامىزدىڭ بىرقاتار عالىمدارى, قوعام قايراتكەرلەرى جانە جاستار قاۋىمى قاتىستى.
لاۋرا داۋرەنبەكوۆا,
ا.قۇسايىنوۆ اتىنداعى ەۋرازيا گۋمانيتارلىق ينستيتۋتىنىڭ دوتسەنتى, فيلولوگيا عىلىمدارىنىڭ كانديداتى
